ໜຸ່ມໂພສດີໃຈ ຫຼັງພົບແມ່ນົມທີ່ຕາມຫາເກືອບ 20 ປີ ຕໍ່ຈາກນີ້ຂໍລ້ຽງດູຕະຫຼອດຊີວິດ

ໜຸ່ມໂພສດີໃຈ ຫຼັງພົບແມ່ນົມທີ່ຕາມຫາເກືອບ 20 ປີ ຕໍ່ຈາກນີ້ຂໍລ້ຽງດູຕະຫຼອດຊີວິດ

21st July 2020 0 By Education

ນັບເປັນເລື່ອງລາວດີໆທີ່ເກີດຂຶ້ນໃນສັງຄົມລາວເຮົາອີກເລື່ອງໜຶ່ງ ແລະ ແອັດຂໍນໍາມາແບ່ງປັນໃຫ້ທຸກຄົນໄດ້ອີ່ມໃຈນໍາກັນໃນມື້ນີ້ ຫຼັງຫຼາຍມື້ຜ່ານມາພົບເຫັນແຕ່ຂ່າວເສົ້າປະກົດການຫຍໍ້ທໍ້ຕ່າງໆທີ່ເກີດຂຶ້ນ, ໂດຍເລື່ອງລາວທີ່ແອັດຈະນໍາສະເໜີນັ້ນເປັນເລື່ອງຂອງການແທນຄຸນ ກະຕັນຍູຕໍ່ຜູ້ທີ່ມີບຸນຄຸນລ້ຽງເຮົາມາບໍ່ວ່າຈະຖານະໃດກໍ່ຕາມ ບຸກຄົນເຫຼົ່ານັ້ນຄືຜູ້ທີ່ເຮົາຕ້ອງຕອບແທນ.

ເລື່ອງລາວທີ່ແອັດກ່າວມາຂ້າງເທິງແມ່ນເກີດຂຶ້ນທີ່ນະຄອນໄກສອນ ແຂວງສະຫວັນນະເຂດ ໂດຍຜູ້ໃຊ້ເຟສບຸກຊື່ ຍາວ ສຸດທິວົງ ທີ່ໄດ້ອອກມາໂພສພາບ ພ້ອມບັນຍາຍຄວາມຮູ້ສຶກຫຼັງພົບແມ່ນົມທີ່ຕາມຫາມາເກືອບ 20ປີວ່າ: ເຈົ້າລ້ຽງເຮົາແຕ່ເຮົາເກີດ ຈົນເຮົາອາຍຸ 10ປີແລ້ວເຈົ້າໜີເຮົາໄປ; ເຈົ້າເປັນແມ່ນາງ ແມ່ລ້ຽງ ແມ່ນົມ ຂ້ອຍແຕ່ເກີດ, ຍັງຈື່ໄດ້ເຈົ້າປັ້ນເຂົ້າໜຽວຮ້ອນໆ ໂຮຍເກືອໃຫ້ເຮົາໄປຮຽນທຸກມື້.

ຂ້ອຍຕາມຫາເຈົ້າເກືອບ 20ປີ ມື້ນີ້ໄດ້ມາເຫັນແລ້ວ ຊວນໄປຢູ່ວຽງນຳກັນກະບໍ່ໄປ ເຈົ້າທຸກແຮງຈົນຂ້ອຍຮູ້ສຶກຜິດຫຼາຍ ຕໍ່ໄປນີ້ເຈົ້າບໍ່ທຸກແລ້ວ; ຂ້ອຍຊິປຸກເຮືອນງາມໆໃຫ້ຢູ່ເດີ້ ບໍ່ອົດທຸກອົດຍາກແລ້ວບາດນິນາ… ຊິຝາກເງິນໃຫ້ທຸກເດືອນ ຢາກຫຍັງກະຊື້ກິນບາດນິ ບໍ່ຕ້ອງໄປແບກນຳ້ຢູ່ແຄມຂອງມາໃຊ້ແລ້ວ ໃຊ້ນໍ້າປະປາໂລດ; ຊິເບິ່ງເຈົ້າຕະຫຼອດຊີວິດບາດນິນາ.

ສິ່ງທີ່ເກີດຂຶ້ນ ຖືເປັນເລື່ອງລາວທີ່ດີຫຼາຍ ເປັນແບບຢ່າງທີ່ດີໃຫ້ກັບທຸກຄົນໃນສັງຄົມ ໄດ້ລະນຶກຄືນເຖິງຜູ້ມີບຸນຄຸນຕໍ່ຕົນເອງ, ຜູ້ທີ່ໃຫ້ກໍາເນີດ ຫຼື ລ້ຽງເຮົາມາ. ແອັດມິນ ພ້ອມທີມງານ central update ຂໍຍ້ອງຍໍຊົມເຊີຍ ຕໍ່ການກະທໍາຂອງຊາຍໜຸ່ມຄົນນີ້ ພ້ອມຂໍຍົກໃຫ້ເປັນສຸດຍອດກະຕັນຍູທີ່ຄວນເອົາເປັນແບບຢ່າງອີກໜຶ່ງຄົນ.