ກະເສມຣາດ ໂຮງໝໍໃໝ່ທັນສະໄໝໃນວຽງຈັນ ເລີ່ມຮັບພະນັກງານກຽມເປີດໄວໆນີ້ແລ້ວ

ກະເສມຣາດ ໂຮງໝໍໃໝ່ທັນສະໄໝໃນວຽງຈັນ ເລີ່ມຮັບພະນັກງານກຽມເປີດໄວໆນີ້ແລ້ວ

12th August 2020 0 By Education

ກະເສມຣາດໂຮງໝໍທັນສະໄໝໃນນະຄອນຫຼວງວຽງຈັນ ໂດຍການຮ່ວມທຶນລະຫວ່າງ ລາວກັບໄທ ພາຍຫຼັງໄດ້ລົງມືກໍ່ສ້າງມາແຕ່ທ້າຍເດືອນພຶດສະພາ 2018 ຮອດຕະຈຸບັນ ພື້ນຖານໂຄງລ່າງຂອງຕິກໂດຍສ່ວນໃຫຍ່ແມ່ນພ້ອມໃຊ້ງານ, ຕອນນີ້ລໍຖ້າສະຖານະການໂຄວິດ-19 ຄີຄາຍແລ້ວຜູ້ຊ່ຽວຊານກໍ່ຈະໄດ້ຕິດຕັ້ງອຸປະກອນການແພດ ແລະກ້າວສູ່ການທົດລອງໃຊ້ກ່ອນເປີດບໍລິການສັງຄົມຢ່າງເປັນທາງການໃນຕົ້ນປີ 2021.

ຄວາມຄືບໜ້າເມື່ອຕົ້ນປີ 2020

ທ່ານ ນາງ ວາລີ ເວດສະພົງ ຜູ້ຮ່ວມທຶນສ້າງໂຮງໝໍກະເສມຣາດ ວຽງຈັນອິນເຕີນເນັດຊັນແນວ ຝ່າຍລາວໄດ້ໂພສລົງໃນເຟສບຸກສ່ວນຕົວຫຼ້າສຸດນີ້ລະບຸວ່າ: ເຖິງແມ່ນ COVID19 ຈະມີຜົນກະທົບຕໍ່ໂຄງການສ້າງໂຮງຫມໍ ກະເສມລາດ ໃຫ້ມີຄວາມຊັກຊ້າອອກໄປ ບໍ່ໄປຕາມແຜນທີ່ວາງໄວ້ດ້ານເວລາ ແຕ່ພວກເຮົາກໍຈະພະຍານາມອົດທົນສືບຕໍ່ລໍຖ້າການຜ່ອນຄາຍຈິງຈັງ ເພື່ອໃຫ້ຊ່ຽວຊານຕ່າງປະເທດ ສາມາດເຂົ້າມາສືບຕໍ່ຕິດຕັ້ງເຄື່ອງມືອຸປະກອນການແພດແລະວຽກງານອື່ນໆທີ່ຍັງຄ້າງຄາໃນຂອດໃກ້ສຸດທ້າຍແລ້ວ 😅 ທີມງານເຮົາ ສູ້ໆ ✌️✌️.

ໂຮງໝໍກະເສມຣາດ ຕາມແຜນແມ່ນຈະໃຫ້ລະບົບພື້ນຖານໂຄງລ່າງໂດຍລວມແລ້ວ ພ້ອມໄດ້ທົດລອງນຳໃຊ້ໃນທ້າຍປີນີ້ ແຕ່ເນື່ອງຈາກຜົນກະທົບຈາກພະຍາດໂຄວິດ-19 ຕອນນີ້ຈິ່ງປະກາດຮັບເພື່ອນຮ່ວມງານໄປກ່ອນ ໂດຍທາງໂຮງຫມໍກະເສມລາດ ຕ້ອງການເພື່ອນຮ່ວມງານ ຫລາຍຕຳແຫນ່ງ ທ່ານໃດສົນໃຈ ຍື່ນໃບສະຫມັກງານ ຕາມລາຍລະອຽດທີ່ໂພສລົງມານີ້ເດີ້

ໂຮງໝໍກະ​ເສມຣາດ ອິນ​ເຕີ​ເນ​ຊັ້ນ​ແນວ ວຽງຈັນ  ໄດ້ເລີ່ມລົງມືກໍ່ສ້າງມາແຕ່ເດືອນພຶດສະພາ ປີ 2018 ໂດຍແບ່ງອອກເປັນ 2 ໄລຍະການກໍ່ສ້າງ, ດ້ານງົບລົງທຶນ 60 ລ້ານໂດລາສະຫະລັດ ຫຼື ປະມານ 480 ຕື້ກີບ, ມີອາຄານທັງໝົດ 4 ຫຼັງ ມີ 38 ຫ້ອງກວດ, 254 ຕຽງນອນ, ເຈົ້າຂອງໂຄງການຢືນຢັນທ້າຍປີ 2020 ນີ້ຈະໃຫ້ສຳເລັດ ແລະ ຄາດວ່າຈະເປີດໃຫ້ບໍລິການຕົ້ນປີ 2021.

ຕາມຂໍ້ມູນກ່ອນໜ້ານີ້ໃຫ້ຮູ້ວ່າ: ພາຍຫຼັງທີ່ການກໍ່ສ້າງສຳເລັດສົມບູນໃນທ້າຍປີ 2020 ຈະໃຊ້ເວລາປະມານ 3 ເດືອນ ໃນການທົດສອບລະບົບຕ່າງໆ ເຊັ່ນ: ລະບົບການບໍລິຫານຈັດການ, ພະນັກງານ, ລະບົບໄອທີ ລວມໄປເຖິງລະບົບທຸກຢ່າງໃນໂຮງໝໍແລ້ວຈຶ່ງເປີດໃຫ້ບໍລິການ ບໍ່ເກີນໄຕມາດທຳອິດຂອງປີ 2021.

ສຳລັບໂຮງໝໍກະເສມຣາດ ຄາດວ່າຈະເປັນທາງເລືອກໜຶ່ງຂອງຜູ້ທີ່ມີສັກກະຍະພາບໃນການໃຊ້ຈ່າຍ ຫຼື ຜູ້ມີລາຍຮັບສູງ ໂດຍສະເພາະແມ່ນຜູ້ທີ່ມັກໄປປິ່ນປົວຢູ່ຕ່າງປະເທດ, ລາຄາກໍຈະບໍ່ແພງເກີນໄປ ເຊື່ອວ່າພາຍຫຼັງໂຮງໝໍແຫ່ງນີ້ເປີດບໍລິການແລ້ວຈະຊ່ວຍຫຼຸດຜ່ອນບັນຫາການຂ້າມຂອງໄປປົວຢູ່ຕ່າງປະເທດຫຼາຍຂຶ້ນ.

ທ່ານນາງ ວາລີ ເວດສະພົງ ຍັງໃຫ້ຮູ້ຕື່ມວ່າ: ສ່ວນບຸກຄະລາກອນໃນເບື້ອງຕົ້ນ ຈະນໍາເຂົ້າຊ່ຽວຊານຈາກຕ່າງປະເທດ ແລະ ອາດຈະໃຊ້ເວລາຫຼາຍປີພໍສົມຄວນຈົນ ກວ່າຈະສ້າງຊ່ຽວຊານທີ່ເປັນຄົນລາວໄດ້, ໂຮງໝໍກະເສມຣາດ ຈະໃຫ້ບໍລິການດ້ານສຸຂະພາບແບບຄົບວົງຈອນທີ່ເປັນລະບົບອາຊຽນ ເພື່ອບັນລຸເປົ້າໝາຍໃຫ້ໄດ້ມາດຕະຖານ ເຈຊີໄອ.

ກະເສມຣາດ ຕັ້ງ​ຢູ່​ບ້ານດອນ​ນົກ​ຂຸ້ມ ເມືອງ​ສີ​ສັດ​ຕະ​ນາກ ນະ​ຄອນຫລວງວຽງ​ຈັນ, ເຊິ່ງ​ຈະ​ດຳ​ເນີນ​ການກໍ່​ສ້າງ​ໂດຍ​ການ​ຮັບ​ຮອງ ​ມາດ​ຕະ​ຖານ​ຄຸນ​ນະ​ພາ​ບ ​ສະ​ຖານ​ພະ​ຍາ​ບານ​ລະ​ດັບ​ສາ​ກົນ ຫລື JCI ແລະ ຈາກ​ສະ​ຖາ​ບັນ​ສະ​ຖາ​ປະ​ນິກ​ອາ​ເມ​ລິ​ກັນ (AIA), ໃນດ້ານການ​ໃຫ້​ບໍ​ລິ​ການຈະປະ​ກອບ​ດ້ວຍ: ການ​ບໍ​ລິ​ການ​ຜູ້​ປ່ວຍນອກ, ການ​ບໍ​ລິ​ການ​ຜູ້​ປ່ວຍອຸ​ບັດ​ເຫດ​ສຸກ​ເສີນ, ການ​ບໍ​ລິ​ການ​ຜູ້​ປ່ວຍວິ​ກິດ, ການ​ບໍ​ລິ​ການ​ຜູ້​ປ່ວຍໃນ ແລະ ຂະ​ແໜງ​ສະ​ໜັບ​ສະ​ໜູນ ​ທາງ​ດ້ານ​ການ​ແພດອື່ນໆ ດ້ວຍເຄື່ອງມືທີ່ທັນສະໄໝຄວບຄູ່ກັບຊ່ຽວຊານການແພດທີ່ເຊື່ອຖືໄດ້.