ສະຫວັນໄຊດັງອີກແລ້ວ! ຕະຫຼາດໃຫຍ່ຊິງກາງເປັນສິບໜ່ວຍ ແຕ່ກໍ່ເອົາແມ່ຄ້າຫົວໃສບໍ່ຢູ່

ສະຫວັນໄຊດັງອີກແລ້ວ! ຕະຫຼາດໃຫຍ່ຊິງກາງເປັນສິບໜ່ວຍ ແຕ່ກໍ່ເອົາແມ່ຄ້າຫົວໃສບໍ່ຢູ່

15th August 2020 0 By Education

ກ່ອນໜ້ານີ້ເຄີຍເປັນກະແສໃຫຍ່ໂຕມະໂຫລານໄປແລ້ວຄັ້ງໜຶ່ງສໍາລັບເລື່ອງແມ່ຄ້າໂກງຕາຊິງຢູ່ຕະຫຼາດສະຫວັນໄຊ ແຂວງສະຫວັນນະເຂດ ແຕ່ແລ້ວພາກສ່ວນກ່ຽວຂ້ອງກໍ່ລົງມາແກ້ໄຂ ໄກ່ເກ່ຍເລື່ອງລາວດັ່ງກ່າວ ພ້ອມນໍາຊິງກາງມາວາງໃນຕະຫຼາດຫຼາຍສິບໜ້ວຍ ເພື່ອປ້ອງກັນບັນຫາດັ່ງກ່າວເກີດຊໍ້າອີກ.

ແຕ່ຫຼ້າສຸດ ຊິງເປັນສິບໜ່ວຍກໍ່ເອົາບໍ່ຢູ່ ກະແສເກົ່າມາອີກແລ້ວ ລູກຄ້າຖືກໂກງຕາຊິງຊື້ 3,5ກິໂລ ແຕ່ໄດ້ 2,5ກິໂລ, ເຊິ່ງກໍລະນີດັ່ງກ່າວຜູ້ໃຊ້ເຟສບຸກຊື່ ຮັກແມ່ ຄິດຮອດພໍ່ ໄດ້ໂພສພາບ ພ້ອມຂໍ້ຄວາມລະບຸໄວ້ວ່າ: ຕອນແລກວ່າສິບໍ່ເອົາລົງແລ້ວ ຕະຫຼາດສະຫວັນໄຊອີກແລ້ວ ຊື້ 3,5ໂລ ໄດ້ 2,5ໂລ ຂາດໄປ1ໂລ ຫອຍໂລລະ40ພັນກີບ, ເຮົາໄດ້ຈ່າຍເປັນເງິນຈຳນວນ 140.000ກີບໃຫ້ແມ່ຄ້າຄົນນີ້ຮຽບຮ້ອຍແລ້ວ.

ໂດຍຜູ້ກ່ຽວເລົ່າວ່າ: ມື້ນີ້ໄປຊື້ຫອຍແຄງສັ່ງຫອຍ 2ໂລແມ່ຄ້າກະຕັກໃສ່ຖົງແລ້ວຕິດຕາຊິງໃຫ້ໄດ້3.5ໂລແມ່ຄ້າວ່າເອົາເບິດເລີຍເນາະເຮົາກະວ່າເອົາກະໄດ້ເຮົາບໍມັກຍາກຢູ່ແລ້ວໆເຮົາກະຍ່າງອອກມາໄດ້ບໍ່ໄກ ເຮົາກະເອະໃຈມັນຄືເບົາແທ້ເຮົາກະເລີຍຂໍຕິດຊິງນຳແມ່ຄ້າໃນຕະຫຼາດໄດ້ 2,5ໂລ ຂໍຕິດອີກຮ້ານທີ2ກະໄດ້ 2,5ໂລເທົ່າກັນ ແລ້ວເຮົາກະຍ່າງກັບມາຖາມຮ້ານທີ່ເຮົາຊື້ວ່າມັນບໍ່ຮອດ 3,5 ໂລໄດ໊ ແມ່ຄ້າເລີຍວ່າບໍ່ຮອດກະສິຕື່ມໃຫ້ເພິ່ນວ່າ
ແລະແມ່ຄ້າທຳທ່າຕິດເບິ່ງກະໄດ້ແຕ່2,5ໂລ ບໍຮອດ3,5ໂລຊໍ່າທີ່ເຮົາຈ່າຍເງິນໄວ້.

ພໍເຮົາຖາມອີກວ່າແມ່ນຊິງເຈົ້າໄປແມ່ນບໍ່ເພິ່ນກະບອກວ່າໄປຢູ່ 5ຂີດເຮົາກະເລີຍວ່າໄປ 5ຂີດ ກະຕ້ອງເປັນ3ກິໂລເຕັມ ມັນກະບໍຮອດ 3,5ຄືເກົ່າ ທັງໆທີ່ຮູ້ໆຢູ່ວ່າຊິງໂຕເອງໄປກະຍັງຄິດລາຄາເຕັມ ແຖມຊິງອອນອີກ, ພ້ອມຝາກຂໍ້ຄວາມຖິ້ມທ້າຍວ່າຊື່ກິນບໍໝົດຄົດກິນບໍເຫິງເດີ້.

ແນວໃດກໍ່ຕາມ ເຫດການທີ່ເກີດຂຶ້ນໃນຕະຫຼາດນີ້ ຖືເປັນຄັ້ງທີສອງແລ້ວທີ່ສັງຄົມຍົກຂຶ້ນມາວິຈານ, ແຕ່ຄວາມຈິງເປັນແນວໃດແທ້ນັ້ນກໍ່ບໍ່ສາມາດຮູ້ໄດ້ ດັ່ງນັ້ນ ວອນພາກສ່ວນກ່ຽວຂ້ອງລົງກວດສອບ ແລະ ຄຸມເຂັ້ມຂຶ້ນຕື່ມ ບໍ່ດັ່ງນັ້ນ ຕະຫຼາດສະຫວັນໄຊອາດບໍ່ມີລູກຄ້າໄປຫາອີກ ຫາກແມ່ຄ້າມີພຶດຕິກໍາບໍ່ດີແບບນີ້ແທ້.