ຫຼາຍຄົນຫ່ວງ ປັດຈຸບັນຍັງມີຜູ້ເດີນທາງເຂົ້າລາວຢ່າງຕໍ່ເນື່ອງ ດ້ານສາທາແນະນໍາໃຫ້ສ້າງຄວາມຊິນເຄີຍກັບ New Normal

ຫຼາຍຄົນຫ່ວງ ປັດຈຸບັນຍັງມີຜູ້ເດີນທາງເຂົ້າລາວຢ່າງຕໍ່ເນື່ອງ ດ້ານສາທາແນະນໍາໃຫ້ສ້າງຄວາມຊິນເຄີຍກັບ New Normal

19th August 2020 0 By Education

ມາຮອດປັດຈຸບັນ ຫຼາຍທ່ານອາດສົງໄສວ່າເປັນຫຍັງໃນແຕ່ລະມື້ຍັງມີຄົນສືບຕໍ່ເດີນທາງເຂົ້າປະເທດເຮົາຢ່າງຕໍເນື່ອງ ເຂົາເຈົ້າລັກລອບເຂົ້າມາບໍ? ຫຼື ແນວໃດ? ແຕ່ຄວາມຈີງຄົນທີ່ເຂົ້າມາບໍ່ແມ່ນຫາກໍ່ມາມື້ນີ້ຫຼືມື້ວານນີ້ເທົ່ານັ້ນ ມີມາທຸກມື້ອີງຕາມາດຕະການຜ່ອນຜັນຂອງຄະນະສະເພາະກິດໃນການເອົາຄົນລາວກັບຄືນປະເທດ ແລະ ອະນຸຍາດໃຫ້ບັນດາຊ່ຽວຊານ, ນັກວິຊາການທີ່ມີຄວາມຈຳເປັນຮີບດ່ວນເຂົ້າມາ ລວມເຖິງລົດຂົນສົ່ງສິນຄ້າຕາມດ່ານສາກົນ ກໍ່ໄດ້ຜ່ານ-ໄປມາປົກກະຕິເພື່ອຮັບປະກັນບໍ່ໃຫ້ພາຍໃນຂາດແຄນເຄື່ອງຂອງໃຊ້ ແລະວັດຖຸຈຳເປັນ.

ແຕ່ທັງນີ້ທັງນັ້ນ, ທຸກຄົນທີ່ເຂົ້າມາພາກສ່ວນກ່ຽວຂ້ອງໄດ້ເຂັ້ມງວດປະຕິບັດມາດຕະການປ້ອງກັນໂຄວິຕໍ່ເຂົາເຈົ້າເຫຼົ່ານັ້ນ ໂດຍສະເພາະແມ່ນວັດແທກອຸນຫະພູມໄຂ້ ນໍາມາກວດຫາເຊື້ອ ແລະ ເຂົ້າສູນຈໍາກັດບໍລິເວນໃຫ້ຄົບ 14ວັນ.

ທ່ານ ນາງ ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ປະຈໍາວັນທີ 19 ສິງຫາ 2020 ວ່າ:  ຮອດ 5 ໂມງແລງ ຂອງວັນທີ 18 ສິງຫາ 2020 ການຕິດຕາມຜູ້ເດີນທາງຈາກຈຸດຜ່ານແດນຕ່າງໆທົ່ວປະເທດມີຜູ້ເດີນທາງເຂົ້າມາ ມີທັງໝົດ 1.649 ຄົນ.

ໃນນັ້ນຈຸດຜ່ານດ່ານລາວ-ໄທ 1.051 ຄົນ (ແຮງງານລາວກັບມາແຕ່ໄທ 100 ຄົນ); ຈຸດຜ່ານດ່ານລາວ – ຈີນ 50 ຄົນ, ໃນນັ້ນ ມີແຮງງານຈີນ 31 ຄົນ, ແຮງງານລາວ 03 ຄົນ ຜ່ານດ່ານບໍ່ເຕັນ ແຂວງຫຼວງນໍ້າທາ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ 16 ຄົນ; ຈຸດຜ່ານດ່ານລາວ – ຫວຽດນາມ 546 ຄົນ, ໃນນັ້ນ ມີແຮງງານລາວ 04 ຄົນ ຜ່ານດ່ານນໍ້າພາວ, ແຂວງບໍລິຄໍາໄຊ, ແຮງງານຫວຽດນາມ 37 ຄົນ ຜ່ານດ່ານພູເກືອ, ແຂວງອັດຕະປື, ເຫຼືອນັ້ນ ແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ; ຈຸດຜ່ານດ່ານ ລາວ-ກຳປູເຈຍ 02 ຄົນ (ລາວ 01 ຄົນ ແລະ ກໍາປູເຈ້ຍ 01 ຄົນ); ເດີນທາງຜ່ານສະໜາມບິນສາກົນວັດໄຕ 00 ຄົນ.

ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ສໍາລັບການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 18 ສິງຫາ 2020, ໄດ້ເກັບຕົວຢ່າງມາກວດວິເຄາະທັງໝົດ 214 ຄົນ, ໃນນັ້ນ ແຮງງານລາວມາແຕ່ໄທ 195 ຕົວຢ່າງ, ບຸກຄົນທົ່ວໄປທີ່ມີອາການ 03 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 16 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອ ໝາຍຄວາມວ່າໃນວັນທີ 18 ສິງຫາ 2020 ບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 18 ສິງຫາ 2020 ໄດ້ເກັບຕົວຢ່າງມາກວດທັງໝົດ 35.022 ຕົວຢ່າງ, ກວດພົບເຊື້ອສະສົມ 22 ຄົນ. ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນມີຄົນເຈັບຕິດເຊື້ອພະຍາດ ໂຄວິດ-19 ປີ່ນປົວຢູ່ໂຮງໝໍມິດຕະພາບ ຈຳນວນ 3 ຄົນ.

ທ່ານ ກ່າວຕື່ມວ່າ:  ເພື່ອຫຼຸດຜ່ອນ ແລະ ຢັບຢັ້ງ ການລະບາດແຜ່ລາມຂອງພະຍາດ, ຈຶ່ງຮຽກຮ້ອງມາຍັງ ທຸກພາກສ່ວນໃນສັງຄົມ ຈົ່ງພາກັນເອົາໃຈໃສ່ ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ ເປັນຕົ້ນ ແມ່ນ: ອອກຈາກບ້ານເມື່ອຈຳເປັນ; ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ; ການລ້າງມືເລື້ອຍໆ ດ້ວຍນໍ້າສະອາດໃສ່ສະບູ ຫຼື ເຈວລ້າງມື; ການປະຕິບັດຮັກສາໄລຍະຫ່າງ 1-2 ແມັດຂຶ້ນໄປ; ການກິນອາຫານທີ່ປຸງສຸກໃໝ່.

ຄວນແຍກຂອງໃຊ້ສ່ວນຕົວ ບໍ່ໃຊ້ຮ່ວມກັບຜູ້ອື່ນ; ເມື່ອກັບຮອດບ້ານ ຄວນອາບນ້ຳ ແລະ ປ່ຽນເສື້ອຜ້າທັນທີ. ການປະຕິບັດທັງໝົດນີ້ ກໍ່ແມ່ນເພື່ອສະກັດກັ້ນ ການລະບາດຂອງພະຍາດໂຄວິດ-19 ບໍ່ໃຫ້ກັບຄືນມາຮອບໃໝ່ໃນປະເທດເຮົາ; ສຳລັບຜູ້ທີ່ຈະເດີນທາງເຂົ້າ-ອອກ ສປປ ລາວ ແມ່ນໃຫ້ປະຕິບັດຕາມແຈ້ງການຂອງກະຊວງການຕ່າງປະເທດ, ສະບັບເລກທີ 1861/ຕປທ.ສພກ, ລົງວັນທີ 31 ກໍລະກົດ 2020.