ຄົນລາວທີ່ຕິດຄ້າງຢູ່ຕ່າງປະເທດຍັງຈະໄດ້ຂີ່ຍົນກັບບ້ານ

ຄົນລາວທີ່ຕິດຄ້າງຢູ່ຕ່າງປະເທດຍັງຈະໄດ້ຂີ່ຍົນກັບບ້ານ

2nd September 2020 0 By Education

ປີ 2020 ນີ້ທຸກປະເທດໃນໂລກແມ່ນຢູ່ໃນພາວະວິກິດ ຍ້ອນການລະບາດຂອງພະບາດໂຄວິດ-19 ທີ່ແຜ່ລາມໄປຢ່າງວ່ອງໄວ ເຊິ່ງເຮັດໃຫ້ພົນລະເມືອງລາວທີ່ໄປຮຽນ, ໄປເຮັດວຽກ ຫຼື ຝືກອົບຮົມຢູ່ຕ່າງປະເທດກັບບ້ານລຳບາກ ເພາະມາດຕະການຕ່າງໆຂອງລັດຖະບານໃນແຕ່ລະປະເທດ ເຊັ່ນດຽວກັບຢູ່ພາຍໃນ ສປປ ລາວເຮົາເອງກໍ່ມີຈຳນວນບໍ່ໜ້ອຍທີ່ໄດ້ຮັບຜົນກະທົບຈາກເຊື້ອພະຍາດຕິດຕໍ່ຊະນິດນີ້ເຊັ່ນກັນ ແຕ່ຢູ່ບ້ານເຮົາຈັ່ງໃດກໍ່ດີກວ່າຢູ່ບ້ານເພິ່ນທີ່ທຸກຢ່າງຕ້ອງອາໄສເງິນເປັນແນວເບີກທາງ.

ດັ່ງນັ້ນ, ເພື່ອຄວາມສະບາຍໃຈຂອງພົນລະເມືອງທີ່ໄປຢູ່ຕ່າງປະເທດທີ່ຢາກກັບບ້ານເກີດເມືອງນອນ ເຖິງລັດຖະບານກໍ່ຄືຄະນະສະເພາະກິດຂອງປະເທດເຮົາຈະປິດສາຍການບິນຕ່າງໆ ລວມເຖິງດ່ານເຂົ້າ-ອອກປະເທດ ແຕ່ເພື່ອຊ່ວຍເຫຼືອປະຊາຊົນເມືອງລາວ ໄລຍະນີ້ ລັດຍັງໃຫ້ບໍລິການ! ຖ້ຽວບິນມະນຸດສະທໍາ ເພື່ອຄົນລາວທີ່ຍັງຕົກຄ້າງຢູ່ຕ່າງປະເທດ ໄດ້ເດີນທາງກັບບ້ານ ແຕ່ຕ້ອງຮັກສາມາດຕະການປ້ອງກັນຢ່າງເຂັ້ມງວດ.

ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 31 ສິງຫາ 2020 ຜ່ານມານີ້ວ່າ: ການປິດປະເທດຂອງລາວເຮົາ ບໍ່ໄດ້ໝາຍຄວາມຈະປິດແບບເຂົ້າ-ອອກ ບໍ່ໄດ້ເລີຍ, ເຊິ່ງຫລາຍປະເທດ ໄດ້ມີການຊອກຫາຊ່ອງທາງໃຫ້ມີການຜ່ອນຜັນໃຫ້ມີການດຳເນີນທຸລະກິດ ແລະ ການໄປມາຫາສູ່ໃຫ້ປົກກະຕິດີຂຶ້ນ.

ສະນັ້ນ,ຈຶ່ງມີຄຳແນະນຳຂອງຄະນະສະເພາະກິດວ່າ: ໃນກໍລະນີທີ່ມີຄວາມຈຳເປັນ ແລະ ຮີບດ່ວນນີ້ ຈຶ່ງຕ້ອງຮັກສາຖ້ຽວບິນມະນຸດສະທຳນີ້ໄວ້ ເນື່ອງຈາກວ່າຍັງມີນັກສຶກສາລາວ, ພະນັກງານຄົນລາວ ທີ່ໄປຝຶກອົບຮົມ, ໄປສຶກສາຢູ່ຕ່າງປະເທດ ເວລາເຂົາຈົບຫລັກສູດແລ້ວ ອັດຕາເບ້ຍລ້ຽງຕ່າງໆກໍຖືກຕັດ, ບ່ອນພັກບ່ອນເຊົາກໍບໍ່ໄດ້ມີແລ້ວ ເຂົາເຈົ້າຈະຢູ່ຈະກິນແນວໃດ.

ຖ້ຽວບິນມະນຸດສະທຳນີ້ ແມ່ນຂອງອົງການສະຫະປະຊາຊາດ ທີ່ໄດ້ມີແຈ້ງການ ແລະ ຄຳສະເໜີຈາກສະຫະປະຊາຊາດ ເຖິງລັດຖະບານລາວ, ເຊິ່ງຖ້ຽວບິນດັ່ງກ່າວແມ່ນຍັງສືບຕໍ່ປະຕິບັດ ໂດຍທີ່ມີມາດຕະການຄວບຄຸມຢ່າງເຂັ້ມງວດທີ່ສຸດໃນການປ້ອງກັນ ການຕິດເຊື້ອໂຄວິດ-19.

ໂດຍໄດ້ເປີດຊ່ອງທາງໃຫ້ບັນດານັກການທູດ, ຄົນລາວ ຫລື ຄົນຕ່າງປະເທດທີ່ຍັງຕົກຄ້າງຢູ່ຕ່າງປະເທດ ຢາກເຂົ້າມາ ສປປ ລາວ ແລະ ຢາກອອກຈາກ ສປປ ລາວ, ເຊິ່ງປັດຈຸບັນ ແມ່ນເປີດໃຫ້ບໍລິການໜຶ່ງອາທິດຕໍ່ຖ້ຽວ.

ຂໍ້ມູນ: ສຳນັກຂ່າວສານປະເທດລາວ