ໝົດມື້ອື່ນຄ່ອຍວ່າກັນ ຝົນຈະໄປຫຼືຢູ່ຕໍ່ພາຍຸກຳລັງຜັນເປັນດີເປຼຊັ່ນ

ໝົດມື້ອື່ນຄ່ອຍວ່າກັນ ຝົນຈະໄປຫຼືຢູ່ຕໍ່ພາຍຸກຳລັງຜັນເປັນດີເປຼຊັ່ນ

19th September 2020 0 By Education

ແຈ້ງເຕືອນພາຍຸໝູນເຂດຮ້ອນປະຈຳວັນທີ 19/09/2020 ຈາກກົມອຸຕຸນິຍົມ ແລະອຸທົກກະສາດ ໃຫ້ຮູ້ວ່າ ພາຍຸໂນອືນທີ່ເຄື່ອນຕົວມາແຕ່ຫວຽດນາມນັ້ນ ມາຮອດມື້ນີ້ ໄດ້ອ່ອນຕົວລົງປ່ຽນເປັນດີເປຼຊັນ ເຊິ່ງຈະເຮັດໃຫ້ຟ້າລົມຝົນຕົກໜັກ ຢູ່ທົ່ວທຸກພາກຂອງປະເທດ ເຊິ່ງພາຍຸຫົວນີ້ຍັງຈະເຮັດໃຫ້ຝົນຕົກແກ່ຍາວຈົນໝົດວັນທີ 20 ກັນຍານີ້ ຈິ່ງຄ່ອຍໆຜ່ອນຄາຍລົງ.

ໂດຍ ກົມອຸຕຸນິຍົມ ແລະອຸທົກກະສາດ ແຈ້ງວ່າ ພາຍຸໝຸນເຂດຮ້ອນ ໂນອຶນ (Noul) ໄດ້ອ່ອນກຳລັງລົງເປັນພາຍຸດີເປຼຊັນ,ຊຶ່ງໃນເວລາ 7:00 ໂມງເຊົ້າຂອງວັນທີ 19 ກັນຍາ ມີຈຸດສູນກາງຢູ່ເສັ້ນຂະໜານທີ 17.6 ອົງສາເໜືອ ແລະ ເສັ້້ນແວງ 99.8 ອົງສາຕາເວັນອອກ ພວມເຄື່ອນທີ່ໄປທາງທິດຕາເວັນຕົກຕາເວັນຕົກສ່ຽງເໜືອດ້ວຍຄວາມໄວ 30 ກິໂລແມັດຕໍ່ຊົ່ວໂມງ, ຊຶ່ງຍັງຈະເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກພ້ອມຈະມີລົມພັດແຮງຢູ່ບັນດາແຂວງພາກເໜືອ ລົງຫາ ພາກກາງ ແລະ ພາກໃຕ້ ໃນໄລຍະວັນທີ 19 ຫາ 20 ກັນຍາ 2020 ນີີ້.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງ ທຸກພາກສ່ວນທີ່ອາໃສຢູ່ບັນດາແຂວງ ພາກເໜືອ, ພາກກາງ ແລະ ພາກໃຕ້ ເຊັ່ນ: ຫົວພັນ, ຊຽງຂວາງ, ບໍ່ແກ້ວ, ຫຼວງພະບາງ, ໄຊຍະບູລີ, ວຽງຈັນ, ນະຄອນຫຼວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນໍ້າຖ້ວມຊຸ, ດິນເຈື່ອນ ແລະ ນໍ້າຖ້ວມອັ່ງ. ພ້ອມນີ້ກໍ່ໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.

ຟ້າລົມຝົນຕົກໜັກຈະໝົດວັນທີ 20 ຈິ່ງເລີ່ມຢຸດເຊົາ