ດັງຂ້າມຄືນ ຕຳຫຼວດຖອດເຄື່ອງແບບໄປສົ່ງເຄື່ອງຫາເງິນສົ່ງແມ່

ດັງຂ້າມຄືນ ຕຳຫຼວດຖອດເຄື່ອງແບບໄປສົ່ງເຄື່ອງຫາເງິນສົ່ງແມ່

30th September 2020 0 By Education

ເລື່ອງລາວດີໆມື້ນີ້ຢາກເອົາມາຝາກແຟນຂ່າວ ສືກສາ-ໄອທີ ເພື່ອຫຼາຍຄົນເອົາໄປເປັນແບບຢ່າງໃນການທຳມາຫາກິນຍຸກທຸລະກິດອອນລາຍກຳລັງເຕີບໂຕແບບນີ້ ຈະປະກອບອາຊີບຫຍັງກໍ່ສາມາດມີແນວເສີມໄດ້ຂໍພຽງໃຈເອົາ ສອນໂຕເອງໄດ້ ຍິ່ງຖ້າເຮັດເພື່ອຜູ້ໃຫ້ກຳເນີດຍິ່ງປະເສີດກວ່າສິ່ງໃດຄືອ້າຍບ່າວຕຳຫຼວດຄົນນີ້.

ອ້າຍບ່າວຕຳຫຼວດໜ້າຄົມຄົນນີ້ເປັນຊາວໄທ ສັງກັດໜ່ວຍງານປ້ອງກັນປາບປາມ ເພິ່ນໃຊ້ເວລາວ່າງຫຼັງອອກປະຈຳການໄປສົ່ງສິນຄ້າໃຫ້ກັບບໍລິສັດຂາຍເຄື່ອງອອນລາຍ ເພື່ອຫາລາຍໄດ້ເສີມຊ່ວຍຕົນເອງ ແລະສົ່ງໃຫ້ພໍ່ແມ່ ເພາະລຳພັງເງິນເດືອນແມ່ນພໍແຕ່ກຸ້ມກິນ.

ອ້າຍຕຳຫຼວດບອກວ່າ ຕົນເອງຫຼັງຮຽນຈົບຕຳຫຼວດໄດ້ມາປະກອບອາຊີບສົມປາຖະໜາ ແຕ່ດ້ວຍສະຖານະການການເງິນທາງບ້ານຊ່ວງຜ່ານມາ ເມຍໂຕເອງກໍ່ຕ້ອງຢຸດວຽກຕົນເຮັດວຽກພຽງລຳພັງຈິ່ງຕ້ອງໄປຫາລາຍໄດ້ເສີມ ເພື່ອຊ່ວຍອີກແຮງ.

ອ້າຍຕຳຫຼວດຍັງບອກວ່າ ທີ່ຕັດສິນໃຈໄປສົ່ງເຄື່ອງເນື່ອງຈາກອາຊີບສົ່ງສິນຄ້າ ແລະການຄ້າອອນລາຍກຳລັງເປີດຮັບສະໝັກພະນັກງານຈຳນວນຫຼາຍ, ມາເບິ່ງແລ້ວຫຼັງເລີກວຽກຕຳຫຼວດຍັງສາມາດໄປເຮັດວຽກເສີມໄດ້ອີກ 5-6 ຊົ່ວໂມງ ເມື່ອຫັກຄ່າໃຊ້ຈ່າຍແລ້ວຍັງເຫຼືອເງິນມື້ລະປະມານ 700 ບາດ ຖ້າມື້ໃດເປັນວັນພັກກໍ່ມີລາຍໄດ້ເພີ່ມຂຶ້ນທົບເທົ່າປະມານ 1.500 ບາດ ສະເລ່ຍເບິ່ງແລ້ວ ວຽກເສີມນີ້ສາມາດຊ່ວຍແບ່ງເບົາພາລະຄອບຄົວໄດ້ຫຼາຍສົມຄວນ.

ສ່ວນເງິນເດືອນຈາກການເປັນຕຳຫຼວດກໍ່ເກັບໄວ້ ແລະສົ່ງໃຫ້ພໍ່ແມ່ຢູ່ຕ່າງແຂວງທີ່ຍັງລຳບາກຢູ່, ຖືວ່າການເຮັດວຽກສອງໜ້າທີ່ຊ່ວຍຄອບຄົວມີຫຼາຍແນວປ່ຽນໄປຂໍພຽງເຮົາຮູ້ແບ່ງເວລາໃຫ້ລົງຕົວ, ຫຼັງເລີກເວນຍາມຈາກຕຳຫຼວດກໍ່ນອນພັກກ່ອນ ພໍເຊົາເມື່ອຍແລ້ວໄປສົ່ງເຄື່ອງຕໍ່.

ໜຸ່ມຕຳຫຼວດຍັງບອກອີກວ່າ ການເປັນຕຳຫຼວດ ແລະສົ່ງເຄື່ອງລ້ວນເປັນວຽກບໍລິການປະຊາຊົນ ແລະເປັນອາຊີບທີ່ສຸດຈະລິດ ໂຕເອງທີ່ເປັນຕຳຫຼວດເວລາສົ່ງເຄື່ອງກໍ່ຈະພະຍາຍາມສັງເກດ ແລະສອດສ່ອງເລື່ອງຄວາມປອດໄພຂອງປະຊາຊົນໄປນຳ ເວລາພົບພໍ້ເຫດຜິດປົກກະຕິກໍ່ໂທໃຫ້ເຈົ້າໜ້າທີ່ຕຳຫຼວດມາດູແລຕໍ່ ບາງຄັ້ງກໍ່ລົງມືເອງຖ້າເປັນກໍລະນີຮຸນແຮງກໍ່ສົ່ງຄົນເຈັບໃຫ້ລົດໂຮງໝໍແລ້ວຄ່ອຍໄປສົ່ງເຄື່ອງຕໍ່.

ອ້າຍຕຳຫຼວດຍັງບອກອີກວ່າ ຊີວິດຄົນເຮົາຫຼັງມາຮັບສົ່ງເຄື່ອງຮູ້ເລີຍກັບຄຳວ່າບໍ່ເລືອກບໍ່ມີຈົນ ເຖິງບາງຄັ້ງຕ້ອງໄດ້ສູ້ແດດສູ້ຝົນແຕ່ກໍ່ຕ້ອງທົນ ເພາະບໍ່ມີສິ່ງໃດໄດ້ມາໂດຍງ່າຍ ຖ້າບໍ່ຍອມແລກມາດ້ວຍຄວາມລຳບາກ.