ພາຍຸມາອີກແລ້ວ ພາກກາງ-ໃຕ້ກຽມຕົວ 6 ພະຈິກນີ້

ພາຍຸມາອີກແລ້ວ ພາກກາງ-ໃຕ້ກຽມຕົວ 6 ພະຈິກນີ້

3rd November 2020 0 By Education

ຫົວແລ້ວຫົວເລົ່າ ບໍ່ຈົບສິ້ນຈັກເທື່ອປະຊາຊົນຕາດຳໆບໍ່ມີແນວຊິຢູ່ຊິກິນແລ້ວ ຝົນຟ້າອາກາດປີນີ້ ບຶດແຫ້ງແລ້ງບຶດຝົນຕົກນ້ຳນອງ ໂຫດຮ້າຍທຳລາຍຜົນລະປູກ ເຮືອນຊານບ້ານຊ່ອງໄປແລ້ວບໍ່ໜ້ອຍໃນເກືອບທຸກແຂວງ ຫຼ້າສຸດນີ້ມີລາຍງານພາຍຸຫົວໃໝ່ກຳລັງເຄື່ອນຕົວມາແຕ່ຫວຽດນາມ ຈະເຂົ້າປະເທດເຮົາມື້ວັນທີ 6 ຈິ່ງຝາກເຕືອນຜູ້ຢູ່ພາກກາງ-ໃຕ້ໃຫ້ມີສະຕິ ແລະກຽມພ້ອມຮັບມື.

ພາຍຸຫົວນີ້ເປັນພາຍຸໝຸນເຂດຮ້ອນຊື່ວ່າ (Goni) ເປັນຫົວທີ 19 ປະຈຳປີ 2020 ໃນເຂດດ້ານຕາເວັນຕົກຂອງມະຫາສະໝຸດປາຊີຟິກຕອນເໜືອ, ຊຶ່ງໃນເວລາ 7 ໂມງ 50 ນາທີ ຂອງວັນທີ 02 ພະຈິກ 2020 ມີຈຸດສູນກາງຢູ່ເສັ້ນຂະໜານທີ 14.5 ອົງສາເໜືອ ແລະ ເສັ້ນແວງທີ 118.6 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກດ້ວຍຄວາມໄວ 20 ກິໂລແມັດຕໍ່ຊົ່ວໂມງ.

ຄາດຄະເນວ່າພາຍຸຫົວນີ້ ຈະເຄື່ອນຂຶ້ນຝັ່ງເຂດເມືອງ ດານັງ ຂອງປະເທດ ສສ ຫວຽດນາມ ໃນວັນທີ 4 ຫາ 5 ພະຈິກ 2010 ນີ້ ແລະ ໃນຕອນເຊົ້າຂອງວັນທີ 6 ພະຈິກ 2020 ຈະອ່ອນກຳລັງລົງກາຍເປັນພາຍຸດີເປຼ່ຊັ້ນ ແລະ ຍ່ອມຄວາມກົດດັນອາກາດຕໍ່ປົກຄຸມພາກໃຕ້ ຫາ ພາກກາງ ຂອງ ສປປ ລາວ ຊຶ່ງຈະເຮັດໃຫ້ມີຝົນຕົກປານກາງ ຫາ ໜັກ ແລະ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກໃຕ້.


ດັ່ງນັ້ນ, ແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງພາກ
ກາງ ແລະ ພາກໃຕ້ ໂດຍສະເພາະແຂວງ ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີນ້ຳຖ້ວມຊູ, ນ້ຳຖ້ວມອັ່ງ, ຕົ້ນໄມ້ຫັກລົ້ມ ແລະ ເຮືອນຊານເປ່ເພໄດ້.