ຈັບໄດ້ລັອດໃຫຍ່ ຜູ້ຄ້າຢາເປັນໂຕ່ນ

ຈັບໄດ້ລັອດໃຫຍ່ ຜູ້ຄ້າຢາເປັນໂຕ່ນ

6th November 2020 0 By Education

ຜູ້ຄ້າຢາກຸ່ມນີ້ຄາດວ່າໃຫ້ລວຍໃຫຍ່ເລີຍກ້າຂົນຢາເປັນໂຕນ ແຕ່ຄວາມຈິງບໍເປັນດັ່ງຄວາມຄິດ ຖືກເຈົ້າໜ້າທີ່ຈັບໄດ້ໄລ່ທັນ ຄາວນີ້ໄດ້ນອນຄຸກຍາວເລີຍບ່າວ! ທີ່ໜ້າເສຍດາຍຄືອະນາຄົດຍັງຍາວໄກແຕ່ຕ້ອງໄປພັກຜ່ອນແລ້ວ ທີ່ສຳຄັນສ້າງຄວາມເປັນຫ່ວງໃຫ້ພໍ່ແມ່ຄອບຄົວໄວ້ເບື້ອງຫຼັງ.

ຜູ້ຄ້າຢາກຸ່ມນີ້ຖືກຈັບໄດ້ໃນວັນທີ 2 ພະຈິກ ຜ່ານມາ, ເຊິ່ງເຈົ້າໜ້າທີ່ ປກສ ແຂວງອຸດົມໄຊ ສະກັດຈັບເປົ້າໝາຍຢາລາຍໃຫຍ່ ໂດຍນຳໃຊ້ລົດກະບະ ຈຳນວນ 3 ຄັນ ຂົນຢາຈຳນວນຫຼາຍ ຈາກແຂວງບໍ່ແກ້ວ ມຸ້ງໜ້າມາຕາມເສັ້ນທາງເມືອງແບງ, ສາມາດຈັບເປົ້າໝາຍໄດ້ 3 ຄົນ ພ້ອມຂອງກາງເຮໂຣອິນ 400 ແທ່ງ ໜັກ 152 ກິໂລກຼາມ ແລະ ຢາໄອສ໌ 1.604 ກິໂລກຼາມ, ອາວຸດສົງຄາມ 1 ກະບອກ ພ້ອມລູກປືນ 27 ລູກ.

ເຈົ້າໜ້າທີ່ ປກສ ແຂວງອຸດົມໄຊ ເປີດເຜີຍວ່າ: ພາຍຫຼັງທີ່ໄດ້ລາຍງານ ຈະການລັກລອບຂົນຢາຈຳນວນຫຼາຍ ມາແຕ່ແຂວງບໍ່ແກ້ວ ໂດຍນໍາໃຊ້ເສັ້ນທາງຜ່ານແຂວງອຸດົມໄຊ,ຈຶ່ງໄດ້ປະສານສົມທົບກັບ ປກສ ເມືອງປາກແບງ ອອກຈຸດກວດກາຢູ່ເສັ້ນທາງກິໂລແມັດ 139 ຈຸດທາງແຍກຂຶ້ນໄປທາງເມືອງຜາອຸດົມ ແຂວງບໍ່ແກ້ວ, ພໍຮອດເວ ລາປະມານ 22:30 ໂມງ ຂອງວັນທີ 2 ພະຈິກ ໄດ້ພົບເຫັນລົດເປົ້າໝາຍ ຈໍານວນ 3 ຄັນ ໄດ້ແລ່ນມາຮອດແຍກດັ່ງກ່າວ, ເມື່ອໄດ້ພົບເຫັນເຈົ້່າໜ້າທີ່ ລົດເປົ້າໝາຍກໍລ້ຽວກັບຄືນ.

ຈາກນັ້ນ, ເຈົ້າໜ້າທີ່ ປະຈໍາຈຸດດັ່ງກ່າວ ໄດ້ແຈ້ງໃຫ້ ປກສ ກຸ່ມບ້ານແຕງແວງ ອອກລັດສະກັດ ດ້ວຍການເອົາທ່ອນໄມ້ມາຂວາງທາງລົດ ມາຮອດເວລາປະມານ 23:00 ໂມງ ຂອງວັນດຽວກັນ ລົດເປົ້າໝາຍແລ່ນຮອດຈຸດບ້ານແຕງແວງ ຖືກເຈົ້າໜ້າທີ່ລັດ ແຕ່ບໍ່ຍອມຈອດ ແລ່ນຜ່າດ່ານຂອງເຈົ້າ ໜ້າທີ່ ໄດ້ຕໍາເອົາໄມ້ທີ່ຂວາງທາງໄວ້ ເຮັດໃຫ້ລົດເປົ້າ ໝາຍ 2 ຄັນ ເສຍຫຼັກລົງຮ່ອງຂ້າງທາງ ແລະ ອີກ 1 ຄັນ ສົກອັບໜ້າຫັກ ບໍ່ສາມາດໄປຕໍ່ໄດ້, ເປົ້າໝາຍທັງໝົດລົງຈາກລົດ ແລ່ນໜີເຂົ້າປ່າ.ຈາກນັ້ນ, ເຈົ້າໜ້າທີ່ໄດ້ໄລ່ຕິດຕາມ ສາມາດຈັບຕົວ ໄດ້ 3 ຄົນ ຄື: ທ້າວ ເອຍວ່າ ອາຍຸ 24 ປີ ບ້ານຫ້ວຍເງິນ ເມືອງຄອບ ແຂວງໄຊຍະບູລີ, ທ້າວ ຝົງວ່າ ອາຍຸ 35 ປີ ບ້ານຫ້ວຍສາລາ ເມືອງຫ້ວຍຊາຍ ແຂວງ ບໍ່ແກ້ວ ແລະ ທ້າວ ໄກຢາງ ອາຍຸ 29 ປີ ບ້ານຜາສັງ ເມືອງເຟືອງ ແຂວງວຽງຈັນ, ອີກຈໍານວນໜຶ່ງເອົາຕົວຫຼົບໜີ.

ຜ່ານການກວດຄົ້ນລົດ ທັງ 3 ຄັນ ຄື: ລົດຄັນທີ 1. ລົດກະບະວິໂກ້ແຊັມ ສີປອນທອງ ໝາຍເລກທະບຽນ ກກ 0579 ໄຊຍະບູລີ ມີຂອງກາງ ເຮໂຣອິນ ຈໍານວນ 4 ເປົາ ມີ 400 ແທ່ງ ນໍ້າໜັກ 152 ກິໂລກຼາມ ແລະ ຢາໄອສ໌ 10 ເປົາ ມີ 400 ຫໍ່ ນໍ້າ ໜັກ 400 ກິໂລກຼາມ; ລົດຄັນທີ 2. ລົດກະບະ ວິໂກ້ແຊັມ ສີຂາວ ໝາຍເລກທະ ບຽນ 0091 ປກສ, ມີຢາໄອສ໌ 15 ເປົາ ມີ 592 ຫໍ່ ນໍ້າໜັກ 592 ກິໂລກຼາມ, ປືນສັ້ນ 1 ກະບອກ ພ້ອມລູກ ປືນ 27 ລູກ ແລະ ລົດຄັນທີ 3. ລົດກະບະຣິໂວ້ ສີປອນທອງ ໝາຍເລກທະບຽນ ກຂ 8031 ກໍາແພງນະຄອນ ມີຢາໄອສ໌ 16 ເປົາ ມີ 612 ຫໍ່ ນໍ້າໜັກ 612 ກິໂລກຼາມ.

+ ໃນການມ້າງຄະດີຄັ້ງນີ້, ສາມາດຢືດຂອງກາງໄດ້ທັງໝົດ ຢາໄອສ໌ 41 ເປົາ ມີ 1.604 ຫໍ່ ນໍ້າໜັກ 1.604 ກິ ໂລກຼາມ, ເຮໂຣອິນ 4 ເປົາ ມີ 400 ແທ່ງ ໜັກ 152 ກິໂລກຼາມ, ລົດກະບະ 3 ຄັນ, ລົດຈັກ 1 ຄັນ, ປືນສັ້ນ 1 ກະບອກ ແລະ ໂທລະສັບ 3 ເຄື່ອງ.