ແຕ່ນີ້ຫາ 17 ພະຈິກ ພາກເໜືອ-ກາງລະວັງຝົນຕົກໜັກ

ແຕ່ນີ້ຫາ 17 ພະຈິກ ພາກເໜືອ-ກາງລະວັງຝົນຕົກໜັກ

15th November 2020 0 By Education

ແຈ້ງເຕືອນຫຼ້າສຸດມື້ນີ້ກ່ຽວກັບໄພພາຍຸໝຸນເຂດຮ້ອນ ວາມກໍ ຫົວທີ 22 ປະຈໍາປີ 2020, ຊຶ່ງໃນເວລາ 07 ໂມງ 00 ນາທີ ຂອງວັນທີ 15 ພະຈິກ 2020 ມີຈຸດສູນກາງຢູ່ເສັ້ນຂະໜານທີ 17.2 ອົງສາ ເໜືອ ແລະ ເສັ້ນແວງທີ 108.0 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກ-ຕາເວັນຕົກສ່ຽງເໜືອດ້ວຍຄວາມໄວ 15 ກິໂລແມັດຕໍ່ຊົ່ວໂມງ ແລະ ຄວາມໄວສູງສຸດຢູ່ໃກ້ຈຸດສູນກາງຂອງພະຍຸແມ່ນ 126 ກິໂລແມັດຕໍ່ຊົ່ວໂມງ.

ຄາດຄະເນວ່າ, ພາຍຸຫົວນີ້ ຈະເຄື່ອນຂຶ້ນຝັ່ງທາງພາກກາງຂອງ ສສ ຫວຽດນາມໃນຕອນເຊົ້າ ຫາ ຕອນທ່ຽງຂອງມື້ນີ້ ແລະ ອ່ອນກຳລັງລົງເປັນພາຍຸດີເປຼ່ຊັນເຄື່ອນທີ່ຜ່ານພາກາງ ຫາ ພາກເໜືອດ້ານຕາເວັນອອກຂອງ ສປປ ລາວ ຊຶ່ງຈະເຮັດໃຫ້ມີຝົນໃນລະດັບ ປານກາງ ຫາ ຕົກໜັກ ພ້ອມມີລົມພັດແຮງຢູ່ບັນດາແຂວງ ພາກກາງ ແລະ ພາກ ເໜືອດ້ານຕາເວັນອອກ ໃນໄລຍະວັນທີ 15 ຫາ 17 ພະຈິກ 2020.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໃສຢູ່ບັນດາແຂວງ: ແຂວງ ເຊກອງ, ສາລະວັນ, ສະຫວັນນະເຂດ, ຄໍາມ່ວນ, ບໍລິຄຳໄຊ, ແຂວງວຽງຈັນ, ໄຊສົມບູນ, ນະຄອນຫຼວງວຽງຈັນ, ຊຽງຂວາງ, ຫົວພັນ ແລະ ຫຼວງພະບາງ ຈົ່ງມີສະຕິລະມັດລະວັງຕໍ່ສະພາບຝົນຕົກ ແລະ ລົມພັດແຮງ ທີ່ອາດຈະເຮັດໃຫ້ມີຕົ້ນໄມ້ຫັກລົ້ມ ແລະ ເຮືອນຊານເປ່ເພ.

ພ້ອມນີ້ໃຫ້ກະກຽມເກັບມ້ຽນ ຜົນລະປູກໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.