ທຸດົງຮອດໄຊພູທອງແລ້ວ ເປົ້າໝາຍປາຍທາງທີ່ຫຼວງພະບາງ

ທຸດົງຮອດໄຊພູທອງແລ້ວ ເປົ້າໝາຍປາຍທາງທີ່ຫຼວງພະບາງ

16th November 2020 0 By Education

ດັ່ງທີ່ແອັດສຶກສາ-ໄອທີໄດ້ນຳສະເໜີຂ່າວໄປກ່ອນໜ້ານີ້ກ່ຽວກັບການທຸດົງຈາກສະຫວັນນະເຂດສູ່ຫຼວງພະບາງຂອງຄະນະພະສົງວັດອຳພາພອນ ບ້ານວັງໂຄນຄຳ ເມືອງຊົນນະບູລີແຂວງສະຫວັນນະເຂດ ເຊິ່ງວັນທີ 15 ພະຈິກໄດ້ອອກຈາກວັດບ້ານນາເຕີຍ35ຜ່ານ-ບ້ານຕະຫລາດດົງ-ບ້ານໂພສີແກ້ວ-ບ້ານນາລະໂອງ-ບ້ານນາຄຳ-ພັກຈຳວັດທີ່ວັດບ້ານໂພນທັນ ເມືອງໄຊພູທອງ ແຂວງສະຫວັນະເຂດ.

ຫຼັງຈາກນັ້ນໃນວັນທີ 16 ພະຈິກ ຄະນະພະສົງໄດ້ເຂົ້າຂາບຄາຣະວະ ພໍ່ແມ່ຄູບາອາຈານ ຍາທ່ານບຸນຕົ້ນ ແສນບຸດດີ ວັດບ້ານໂພນທັນ ເມືອງໄຊພູທອງ ແຂວງສະຫວັນະເຂດ ຄວາມໝາຍຄືຕອນນີ້ຍັງບໍ່ທັນອອກຈາກຮາວຮົ້ວຂອງແຂວງສະຫວັນນະເຂດ ເນື່ອງຈາກການທຸດົງບໍ່ໄວເທົ່າໃດໜັກ, ຄະນະເພິ່ນຄ່ອຍໆທຸດົງໄປຄ່ຳໃສນອນຫັ້ນຈົນກວ່າຈະເຖິງຈຸດໝາຍ ເອົາເປັນວ່າແອັດຈະຄອຍອັບເດດການເດີນທາງເປັນແຕ່ລະໄລຍະໃຫ້ເດີ້ ສຳລັບຜູ້ທີ່ຢາກໃສ່ບາດເຮັດບຸນໄປນຳເພິ່ນ.

ຄະນະສົງ ວັດອຳພາພອນ ບ້ານວັງໂຄນຄຳ ເມືອງຊົນະບູລີ ແຂວງສະຫວັນະເຂດ ເຊິ່ງກ່ອນໜ້ານີ້ເຄີຍທຸດົງແຕ່ແຂວງສະຫວັນນະເຂດມາຍັງນະຄອນຫຼວງວຽງຈັນ ເພື່ອເຂົ້າຮ່ວມງານຊາປານະກິດຂອງ ພຣະມະຫາງອນດຳລົງບຸນ ຕອນນີ້ພວກເພິ່ນກຳລັງຈາຣິກທຸດົງ(ຍ່າງ)ໄປຍັງແຂວງຫຼວງພະບາງ ຖ້າຊາວພຸດທະສາສະໜາຮ່ວມໃສ່ບາດເພິ່ນລະຫວ່າງທາງຄົງເປັນບຸນໜັກແລ!

ຄະນະສົງນຳໂດຍ ພະອາຈານ ສົມຄວນ ທຳມະວົງສາ ພ້ອມສຳມະເນນອີກ 11 ອົງ ໄດ້ເລີ່ມອອກເດີນທາງແຕ່ວັນທີ 9 ພະຈິກ 2020 ນີ້ ຈາກວັດອຳພາພອນ ເພື່ອໄປຫາເປົ້າໝາຍປາຍທາງ.

ສຳລັບເສັ້ນທາງທີ່ຄະນະສົງຈະທຸລະດົງຜ່ານແມ່ນມີ ແຂວງສະຫວັນນະເຂດ, ຄຳມ່ວນ, ບໍລິຄຳໄຊ, ນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ ແລະສິ້ນສຸດປາຍທາງທີ່ຫຼວງພະບາງ.

ການຍ່າງຈາຣິກທຸດົງ ຂອງຄະນະສົງຄັ້ງນີ້ແມ່ນເພື່ອ ບູຊາພະລັດຕະນະໄຕ ຄື ພະພຸດທະເຈົ້າ,ພະທຳມະເຈົ້າ,ພະສັງຄະເຈົ້າ,ບູຊາແຜ່ນດິນລາວທີ່ໄດ້ພັກພາອາໄສ.

ບຸນກຸສົນທີ່ເກີດຈາກການຍ່າງຈາຣິກທຸດົງໃນເທື່ອນີ້,ຂໍອຸທິດສ່ວນບຸນສ່ວນກຸສົນໃຫ້ແດ່ວີລະບຸລຸດ,ວິລະສະຕີໃນຜືນແຜ່ນດິນລາວ,ແລະສັບພະສັດທັງຫຼາຍໂດຍບໍ່ມີປະມານຈົ່ງມີສ່ວນແຫ່ງບຸນໃນເທື່ອນີ້ດ້ວຍໄດ້ພະນິບພານດ້ວຍກັນທຸກທ່ານດ້ວຍເຖີດ