ວ້າວ! ນາຍບ້ານ 70 ແຫ່ງໄດ້ຮັບເງິນເດືອນຜ່ານລະບົບ U-Money

ວ້າວ! ນາຍບ້ານ 70 ແຫ່ງໄດ້ຮັບເງິນເດືອນຜ່ານລະບົບ U-Money

3rd December 2020 0 By Education

ການເຮັດວຽກຂອງນາຍບ້ານ ເຊິ່ງເປັນການຈັດຕັ້ງຂັ້ນທ້ອງຖິ້ນພື້ນຖານຂອງປະເທດເຮົາໃນໄລຍະຜ່ານມາການໄປຮັບເງິນອຸດໜູນຕ້ອງຫຍຸ້ງຍາກໄປເຊັນຢູ່ເມືອງແຕ່ດຽວນີ້ພໍມີຢູມັນນີ່ (U-Money) ທຸກຢ່າງງ່າຍຂຶ້ນ ຫຼ້າສຸດແຂວງສະຫວັນນະເຂດໄດ້ເຊັນສັຍາເບີກຈ່າຍເງິນໃຫ້ 70 ບ້ານຜ່ານຊ່ອງທາງນີ້ແລ້ວ.

ພິທີເຊັນສັນຍາວ່າດ້ວຍການ ເບີກຈ່າຍເງິນອຸດໜູນ-ເງິນ ເດືອນໃຫ້ນາຍບ້ານຜ່ານ ຊ່ອງທາງ U-Money (ຢູມັນ ນີ້) ລະຫວ່າງຫ້ອງວ່າການ ປົກຄອງເມືອງອາດສະພອນ ແລະບໍລິສັດສະຕາໂທລະຄົມ ສາຂາສະຫວັນນະເຂດ ໄດ້ ຈັດຂຶ້ນໃນຕອນບ່າຍວັນທີ 30 ພະຈິກ 2020, ທີ່ສະໂມສອນເມືອງດັ່ງກ່າວ ໂດຍການເປັນກຽດເຂົ້າຮ່ວມໃນພິທີຄັ້ງນີ້ຂອງທ່ານ ສີວິໄລ ສີທຳມະວັນ ຮອງເຈົ້າເມືອງອາດສະພອນ, ທ່ານ ຫງວຽນ ເຖ ຈຸງ ຜູ້ອໍານວຍການບໍລິສັດສະຕາໂທລະຄົມສາຂາສະຫວັນນະເຂດ, ມີຄະນະນຳຂອງເມືອງ, ນາຍບ້ານທັງ 70 ບ້ານທົ່ວເມືອງ, ພະນັກງານພາຍໃນບໍລິ ສັດ ແລະພາກສ່ວນກ່ຽວຂ້ອງເຂົ້າຮ່ວມ.


ໂອກາດນີ້, ທ່ານ ສີສ່ວນ ເທມມະບຸດ ຮອງຜູ້ອຳນວຍການບໍລິສັດສະຕາໂທລະຄົມສາຂາແຂວງສະຫວັນນະເຂດ ກໍ່ໄດ້ກ່າວລາຍງານໃຫ້ຮູ້ວ່າ: ປະຈຸບັນນີ້, ໂລກໄດ້ມີວິວັດທະນາການໄປສູ່ຍຸກທີ່ທັນສະໄໝຂຶ້ນເປັນຕົ້ນແມ່ນການ ນໍາໃຊ້ເຕັກໂນໂລຊີຕ່າງໆ ເຂົ້າໃນວຽກງານການດໍາລົງຊີວິດປະຈໍາວັນຂອງຄົນເຮົາ ຊຶ່ງລະບົບ U-money ນີ້ ກໍ່ແມ່ນທາງເລືອກໜຶ່ງ ທີ່ຈະຊ່ວຍເຮັດໃຫ້ພໍ່ແມ່ປະຊາຊົນ ກໍ່ຄືພະນັກງານລັດ ຫຼືຜູ້ທີ່ໄດ້ຮັບເງິນອຸດໜູນ, ເງິນນະໂຍບາຍ ທີ່ຢູ່ຫ່າງໄກສອກຫຼີກ ໂດຍສະເພາະແມ່ນອໍານາດການປົກຄອງບ້ານ ສາມາດໄດ້ຮັບເງິນເດືອນຢ່າງວ່ອງໄວ ແລະທັນເວລາກັບຄວາມຕ້ອງການ.

ຢູມັນນີ້ ແມ່ນບໍລິການກະເປົ໋າເງິນເອເລັກໂຕຣນິກ ທີ່ສາມາດເຮັດທຸລະກຳທາງດ້ານການເງິນໄດ້ເທິງໂທລະສັບມືຖືເຊັ່ນ: ການໂອນ, ການຖອນເງິນ ແລະການຊຳລະ ພຽງແຕ່ທ່ານມີເບີໂທຂອງຢູນິເທວ(030, 020) ກໍ່ປຽບເໝືອນມີ 1 ບັນຊີທະນາຄານ ໂດຍລະບົບດັ່ງກ່າວນີ້, ສາມາດນຳໃຊ້ໄດ້ກັບໂທລະສັບມືຖືທຸກຮູບແບບ ພຽງແຕ່ມີສັນຍານຂອງຢູນິເທວ ກໍ່ສາມາດເຮັດທຸລະກຳຕ່າງໆໄດ້ ພ້ອມນີ້ກໍ່ຍັງມີລະບົບຄວາມປອດໄພສູງ ເຊິ່ງທຸກໆຄັ້ງທີ່ເຮັດທຸລະກຳສຳເລັດ ຈະມີຂໍ້ຄວາມແຈ້ງເຕືອນ.

ສຳລັບພິທີເຊັນສັນຍາໃນຄັ້ງນີ້ ກໍ່ເປັນບາດກ້າວໜຶ່ງ ທີ່ຈະຊ່ວຍໃຫ້ພໍ່ແມ່ປະ ຊາຊົນ ສາມາດເຂົ້າເຖິງລະບົບເຕັກໂນໂລຊີໃນຍຸກໃໝ່ໄດ້ງ່າຍຂຶ້ນ ຕາມແນວທາງນະໂຍບາຍຂອງພັກ-ລັດ ທີ່ຫັນເປັນທັນສະໄໝເທື່ອລະກ້າວ. ປະຈຸບັນ, ມີຜູ້ນຳໃຊ້ບໍລິການຂອງຢູນິເທວແລ້ວຫຼາຍກວ່າ 5 ແສນເລກໝາຍໃນຂອບເຂດທົ່ວປະເທດ.


ຫຼັງຈາກນັ້ນ, ໃນພິທີ ກໍ່ໄດ້ມີການລົງນາມໃນສັນຍາ ວ່າດ້ວຍການນໍາໃຊ້ລະບົບ U-money ເບີກຈ່າຍເງິນເືດອນ-ເງິນອຸດໜູນໃຫ້ບັນດາອໍານາດການປົກຄອງບ້ານທັງ 70 ບ້ານທົ່ວເມືອງອາດສະພອນ ລະຫວ່າງທ່ານ ສີວິໄລ ສີທຳມະວັນ ຕາງໜ້າໃຫ້ອຳນາດການປົກຄອງເມືອງ ແລະທ່ານ ຫງວຽນ ເຖ ຈຸງ ຕາງໜ້າໃຫ້ບໍລິສັດສະຕາໂທລະຄົມສາຂາສະຫວັນນະເຂດ ເຊິ່ງມີຄະນະນຳ ແລະພະນັກງານຂອງທັງສອງຝ່າຍເຂົ້າຮ່ວມເປັນສັກຂີພະຍານ.