ອັບເດດຫຼ້າສຸດ! ເຫດລົດຂົນສົ່ງຫີນກາວລະເບີດຢູ່ດ່ານສາກົນແດນສະຫວັນ ມີຜູ້ເສຍຊີວິດ 3ຄົນ ບາດເຈັບອີກເກືອບ 10ຄົນ

ອັບເດດຫຼ້າສຸດ! ເຫດລົດຂົນສົ່ງຫີນກາວລະເບີດຢູ່ດ່ານສາກົນແດນສະຫວັນ ມີຜູ້ເສຍຊີວິດ 3ຄົນ ບາດເຈັບອີກເກືອບ 10ຄົນ

4th December 2020 0 By Education

ຈາກກໍລະນີທີ່ລົດຂົນສົ່ງຫີນກາວເກີດລະເບີດແບບບໍ່ຮູ້ສາເຫດ ເມື່ອເວລາ 8:20 ໂມງ ຂອງວັນທີ 3 ທັນວາ 2020 ນີ້ຢູ່ດ່ານສາກົນແດນສະຫວັນ ເມືອງເຊໂປນ ແຂວງສະຫວັນນະເຂດ, ຫຼ້າສຸດຫົວໜ້າດ່ານສາກົນແດນສະຫວັນ ທ່ານ ກອງມະນີ ຊົມມີໄຊ ໄດ້ອອກມາຊີ້ແຈງສາເຫດທີ່ເກີດລະເບີດດັ່ງກ່າວ ພ້ອມລາຍງານຜົນເສຍຫາຍ ແລະ ຜູ້ເຄາະຮ້າຍຈາກເຫດການຄັ້ງນີ້ແລ້ວ.

ທ່ານ ກອງມະນີ ຊົມມີໄຊ ໃຫ້ຮູ້ວ່າ: ສາເຫດທີ່ລົດຂົນສົ່ງຫີນກາວລະເບີດ ເກີດຈາກກໍາມະກອນຜູ້ຊ່ວຍເຈົ້າໜ້າທີ່ພາສີ 8 ຄົນ ທີ່ໃຊ້ເຫຼັກ ຍາວປະມານ 2,5 ແມັດ ໃຊ້ງັດແງະ ແລະ ແທງລົງຫີນກາວຢູ່ເທິງລົດບັນທຸກຫີນກາວພາຍໃຕ້ການຊີ້ນໍາຂອງເຈົ້າໜ້າທີ່ພາສີ ກ່ອນທີ່ຈະປ່ອຍລົດບັນທຸກຫີນກາວ ອອກ ສສ ຫວຽດນາມ ໃນເວລານັ້ນໄດ້ເຮັດໃຫ້ມີສຽງແຕກ ແລະ ດັງຂຶ້ນຄ້າຍຄືລະເບີດ ຊຶ່ງໄດ້ເຮັດໃຫ້ມີຜູ້ເສຍຊີວິດຄາທີ່ 3 ຄົນ (ຍິງ 1 ຄົນ).

ສ່ວນຜູ້ເສຍຊີວິດເພດຊາຍ 2 ຄົນ ຊື່ ທ້າວອາລັອກ ອາຍຸ 25 ປີ ອາຊີບກຳມະກອນ ຜູ້ຊ່ວຍວຽກພາສີ ຢູ່ບ້ານແດນສະຫວັນ ເມືອງເຊໂປນ ແລະ ທ້າວອາວອນ ອາຍຸ 27 ປີ ອາຊີບກຳມະກອນ ຜູ້ຊ່ວຍວຽກພາສີ ຢູ່ບ້ານແດນສະຫວັນ ເມືອງເຊໂປນ. ສ່ວນເພດຍິງ ແມ່ນບໍ່ຮູ້ຊື່ ແລະ ບໍ່ຮູ້ວ່າເປັນຄົນສັນຊາດໃດ.

ນອກນັ້ນຍັງມີຜູ້ໄດ້ຮັບບາດເຈັບ ຈາກອຸບັດເຫດໃນຄັ້ງນີ້ອີກ ຈໍານວນ 8 ຄົນ (ຍິງ 1 ຄົນ) ໃນນັ້ນແມ່ນຄົນລາວ 3 ຄົນ ແລະ ຄົນຫວຽດນາມ 5 ຄົນ ເຊິ່ງຈໍານວນຄົນເຈັບໄດ້ນໍາສົ່ງໄປປິ່ນປົວຢູ່ໂຮງໝໍເມືອງເຊໂປນ 4 ຄົນ (ຄົນລາວ 3 ແລະ ຄົນຫວຽດນາມ 1) ແລະ ອີກ 4 ຄົນເປັນຄົນຫວຽດນາມຖືກນໍາຕົວໄປຮັກສາຢູ່ໂຮງໝໍ ສສ ຫວຽດນາມ.

ທ່ານກອງມະນີ ແຈ້ງໃຫ້ຮູ້ຕື່ມວ່າ: ສະເພາະຄວາມເສຍຫາຍທາງດ້ານຊັບສິນທີ່ກວດສອບເບື້ອງຕົ້ນມີ ສາງກາງແຈ້ງຂອງພາສີຈໍານວນ 2 ຫຼັງ, ສາງສໍາລັບກວດກາລົດເອັກສະເລ 1 ຫຼັງ, ຫ້ອງການບ່ອນເຮັດວຽກກວດກາ ຂອງເຈົ້າໜ້າທີ່ພາສີ 1 ຫຼັງ, ພາຫະນະຂົນສົ່ງສິນຄ້າ 4 ຄັນ, ລົດກະບະຂອງລັດ 1 ຄັນ ແລະ ລົດກະບະສ່ວນບຸກຄົນ 1 ຄັນ.

ທີ່ມາ: ວິທະຍຸກະຈາຍສຽງແຂວງສະຫວັນນະເຂດ