ເບຍລາວໃຈກວ້າງ ຊ່ວຍນັກຮຽນລາວຫຼາຍຄົນໄດ້ມີທຶນຮຽນວິຊາຊີບ

ເບຍລາວໃຈກວ້າງ ຊ່ວຍນັກຮຽນລາວຫຼາຍຄົນໄດ້ມີທຶນຮຽນວິຊາຊີບ

5th December 2019 0 By Education

ບໍລິສັດເບຍລາວຕິດພັນກັໍບຄວາມເອົາໃຈໃສ່ຜະລິດສິນຄ້າເພື່ອຜົນທາງທຸລະກິດແລ້ວ ຍັງໃຫ້ການຊ່ວຍເຫຼືອສັງຄົມເລື້ອຍມາ ໃນນັ້ນລວມທາງການໃຫ້ທຶນການສຶກສາແກ່ນັກຮຽນນັກສຶກສາຜູ້ທີ່ຮຽນດີຮຽນເກັ່ງແຕ່ຍັງຂາດທຶນຮອນໃນ 7 ສະຖາບັນນັບແຕ່ປີ 2010 ເປັນຕົ້ນມາ.

ສຳລັບປີນີ້ພິທີມອບທຶນການສຶກສາ ຈາກບໍລິສັດ ເບຍລາວ ຈໍາກັດ ໃຫ້ແກ່ນັກຮຽນ ຜູ້ທີ່ຮຽນດີ ຮຽນເກັ່ງ ແຕ່ມີຄວາມຂາດເຂີນ ທາງດ້ານທຶນຮອນໃນນະຄອນຫຼວງວຽງຈັນ ແມ່ນໄດ້ຈັດຂຶ້ນ ໃນຕອນບ່າຍຂອງວັນທີ 29 ພະຈິກ 2019 ຢູ່ຫ້ອງປະຊຸມໃຫຍ່ ມະຫາວິທະຍາໄລແຫ່ງຊາດ,  ໂດຍການເປັນປະທານຂອງທ່ານ ອາຈານ ສີວອນ ຫອມປິ່ນແກ້ວ, ຮອງໜົວໜ້າຫ້ອງການຄຸ້ມຄອງນັກສຶກສາ ມະຫາວິທະຍາໄລ ແຫ່ງຊາດ ແລະ ທ່ານ ປອ ຄໍາສຸກ ແກ້ວວົງຊາຍ, ຮອງອໍານວຍການ ສະຖາບັນວິຈິດສິນແຫ່ງຊາດ ແລະ ມອບໂດຍ ທ່ານ ເຮັນລິກ ຈູ ເອັນເດີຊັນ (HENRIK JUEL ANDERSEN), ຜູ້ອໍານວຍການໃຫຍ່ ບໍລິສັດເບຍລາວ ຈໍາກັດ.

 

ໃນສົກປີ 2019-2020 ມີນັກຮຽນທີ່ໄດ້ຮັບທຶນ ຈາກມະຫາວິທະຍາໄລແຫ່ງຊາດ ທັງໝົດ 120 ທຶນ ແລະ ຈາກສະຖາບັນວິຈິດສິນແຫ່ງຊາດ ຈໍານວນ 30 ທຶນ.

ການມອບທຶນການສຶກສາດັ່ງກ່າວ ແມ່ນມີຈຸດປະສົງເພື່ອສືບຕໍ່ ຊຸກຍູ້ໃຫ້ນັກສຶກສາທີ່ມີຄຸນສົມບັດດີ ຮຽນດີ ຮຽນເກັ່ງ ແຕ່ຂາດເຂີນທາງດ້ານທຶນຮອນ ໃຫ້ສາມາດສຶກສາຮໍ່າຮຽນຕໍ່ ຈົນຈົບການສຶກສາ ຊຶ່ງເປັນໂຄງການທີ່ມີຄວາມສໍາຄັນ ແລະ ມີສ່ວນຮ່ວມ ຕໍ່ການພັດທະນາບຸກຄະລາກອນ ສອດຄ່ອງກັບແນວທາງຂອງພັກ ແລະ ລັດຖະບານ.

ເລີ້ມຕັ້ງແຕ່ປີ 2010 ເປັນຕົ້ນມາ ບໍລິສັດເບຍລາວ ຈໍາກັດ ໄດ້ມອບທຶນການສຶກສາ ຈໍານວນ 170 ທຶນ ໃຫ້ແກ່ນັກສຶກສາຂອງ 4 ສະຖາບັນ ປະກອບມີ ມະຫາວິທະຍາໄລແຫ່ງຊາດ, ສະຖາບັນວິຈິດສິນແຫ່ງຊາດ, ມະຫາວິທະຍາໄລ ສຸພານຸວົງ ແລະ ມະຫາວິທະຍາໄລຈໍາປາສັກ. ມາຮອດປີ 2015 ບໍລິສັດເບຍລາວ ໄດ້ເພີ່ມຈໍານວນທຶນການສຶກສາ ໃຫ້ຕື່ມອີກ 3 ສະຖາບັນ ຄື ມະຫາວິທະຍາໄລ ສະຫວັນນະເຂດ, ວິທະຍາໄລ ຄູສະຫວັນນະເຂດ ແລະ ວິທະຍາໄລຄູຈໍາປາສັກ ລວມທັງໝົດເປັນ 7 ສະຖາບັນ 330 ທຶນ ໃນທົ່ວປະເທດ ຈົນເຖິງທຸກວັນນີ້.

ຂອບໃຈຂ່າວຈາກ: ວິທະຍຸຊາວໜຸ່ມ