ບຸກຄົນແບບຢ່າງ! ອາຍຸພຽງ 12 ປີ ບໍ່ເຄີຍອາຍທີ່ຕົນເອງຈົນ ຫາຮັບຈ້າງໂບກປູນ ທ້ອນເງິນສົ່ງໂຕເອງຮຽນ

ບຸກຄົນແບບຢ່າງ! ອາຍຸພຽງ 12 ປີ ບໍ່ເຄີຍອາຍທີ່ຕົນເອງຈົນ ຫາຮັບຈ້າງໂບກປູນ ທ້ອນເງິນສົ່ງໂຕເອງຮຽນ

22nd February 2021 0 By Education

ສະບາຍດີແຟນເພຈທີ່ໜ້າຮັກ ມື້ນີ້ແອັດມິນສຶກສາ-ໄອທີ ມີເລື່ອງລາວໜ້າຊື່ນຊົມ ແລະ ຄວນເອົາເປັນແບບຢ່າງມາໃຫ້ທຸກຄົນໄດ້ຮູ້ນໍາກັນ ເມື່ອເດັກນ້ອຍອາຍຸພຽງ 12 ປີ ແຕ່ຮູ້ຄິດຢາກຫາເງິນສົ່ງໂຕເອງຮຽນ ຈົນກາຍມາເປັນເລື່ອງລາວໜ້າປະທັບໃຈທີ່ແອັດຈະນໍາສະເໜີໃນມື້ນີ້.

ເລື່ອງລາວທີ່ແອັດຈະເລົ່າຕໍ່ໄປນີ້ເປັນເຫດການທີ່ເກີດຂຶ້ນຢູ່ປະເທດໄທ ແຕ່ຍ້ອນເຫັນວ່າມັນເປັນເລື່ອງດີ ທີ່ຄວນບອກຕໍ່ ແລະ ເປັນແບບຢ່າງທີ່ດີໃຫ້ກັບສັງຄົມ ແອັດຈຶ່ງນໍາມາເວົ້າໃນມື້ນີ້.

ທ້າວພັດສະກອນ ຫຼື ນ້ອງອົ້ນ ອາຍຸພຽງ 12 ປີ ຮຽນຢູ່ຊັ້ນ ປ6 ຢູ່ໂຮງຮຽນວັດການຈະນາຣາມ ຈັງຫວັດແພຣ່ ປະເທດໄທ ເປັນເດັກນ້ອຍທີ່ມີຄວາມສາມາໃນການໂບກປູນໄດ້ເກັ່ງຫຼາຍ ເອີ້ນໄດ້ວ່າມາເປັນຊ່າງໄດ້ເລີຍ. ເລົ່າຄືນກ່ອນນ້ອງອົ້ນຈະເກັ່ງແບບນີ້ແມ່ນຜູ້ກ່ຽວ ເດີນທາງໄປເຮັດວຽກກັບພໍ່ເປັນປະຈໍາກໍ່ຄືໂບກປູນ ໂດຍນັບແຕ່ອາຍຸ 9ປີ ກໍ່ຫິ້ວຄຸປູນນໍາກົ້ນພໍ່ໄປວຽກແລ້ວ.

ຫຼັງຈາກເຫັນ ແລະ ເຮັດເປັນປະຈໍາກໍ່ເຮັດໃຫ້ຝີມືນ້ອງອົ້ນດີຂຶ້ນ ພໍ່ພາໄປເຮັດວຽກນໍາທຸກໆວັນເສົາ-ອາທິດ ຈົນໄດ້ຄ່າແຮງຕອບແທນເປັນມື້ລະ 200ບາດ ບວກກັບຄ່າແຮງພໍ່ມື້ລະ 400ບາດເຊິ່ງເປັນເງິນທີ່ເຮັດໃຫ້ນ້ອງອົ້ນ ແລະ ພໍ່ປະທັງຊີວິດລອດໄປແຕ່ລະເດືອນ.

ນອກຈາກນີ້ນ້ອງອົ້ນຍັງເປັນເດັກນ້ອຍທີ່ຮຽນດີ ຄຸນສົມບັດດີ, ຫຼັງເລີກຮຽນ ຫາກບໍ່ໄດ້ໄປຊ່ວຍພໍ່ກໍ່ແຕ່ງຢູ່ຄົວກິນຖ້າພໍ່ ທີ່ສໍາຄັນໃຝ່ຮູ້ ຫາເງິນແຕ່ນ້ອຍເພື່ອສົ່ງໂຕເອງຮຽນຕໍ່ ເຊິ່ງນ້ອງບອກວ່າຫຼັງຮຽນຈົບປ6 ກໍ່ຈະຂໍບວດຮຽນຕໍ່.

ເປັນແນວໃດກັນແນ່ເລື່ອງຂອງເດັກຊາຍຄົນນີ້ ແອັດຫວັງວ່າຈະເປັນແບບຢ່າງທີ່ດີ ໃນການເປັນລູກທີ່ດີຂອງພໍ່ແມ່ໃຫ້ກັບທຸກຄົນທີ່ໄດ້ມາອ່ານເລື່ອງລາວນີ້ບໍ່ຫຼາຍກໍ່ໜ້ອຍ.