ໄວລຸ້ນດັບອະນາຄົດ ຫາກິນດ້ວຍການດຶງກະເປົາ

ໄວລຸ້ນດັບອະນາຄົດ ຫາກິນດ້ວຍການດຶງກະເປົາ

10th March 2021 0 By Education

ໂຊກບໍ່ເຂົ້າຂ້າງຄົນຖ່ອຍຄິດຄົດຫາກິນດ້ວຍການຍາດຂອງຄົນອື່ນຕ້ອງຕື່ນໃນທຸກເຊົ້າໃນຫ້ອງຂັງເຖິງຈະສາສົມ, ໜ້າເສຍດາຍອະນາຄົດໄວລຸ້ນສອງຄົນນີ້ ຫົນທາງຍັງຍາວໄກຕ້ອງມາຕິດຄຸກຍ້ອນບໍ່ທຳມາຫາກິນມີແຕ່ຈອບລັກຈອບຫຼອຍຂອງຄົນອື່ນ.


ໃນເວລາ 13:00 ໂມງ ຂອງວັນທີ 5 ມີນາ 2021, ມີຊາຍ 2 ຄົນ ຂີ່ລົດຈັກຊ້ອນກັນກໍ່ເຫດຊິງຊັບດຶງກະເປົາແມ່ຍິງທີ່ກຳລັງຂີ່ລົດຈັກຢູ່ເສັ້ນທາງໃກ້ຕະຫຼາດບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ. ໃນຂະນະທີ່ດຶງກະເປົານັ້ນເຮັດໃຫ້ລົດຈັກຂອງຜູ້ເສຍ ແລະ ຜູ້ກໍ່ເຫດລົ້ມລົງ, ເມື່ອເປັນແນວນັ້ນພົນລະເມືອງດີຢູ່ບໍລິເວນໃກ້ຄຽງຕັດສິນໃຈເຂົ້າຈັບກຸມ ແລະນຳຕົວສົ່ງເປົ້າໝາຍທັງ 2 ຄົນ ພ້ອມລົດຈັກນຳໃຊ້ກໍ່ເຫດ ລົດ HONDA wave 100 ເລກທະບຽນ ດຫ 2119 ກຳແພງນະຄອນ ໃຫ້ ປກສ ກຸ່ມ 4 ໂນນຫວາຍ ເມືອງໄຊເສດຖາ.


ຈາກການສອບສວນເບື້ອງຕົ້ນຮູ້ໄດ້ວ່າ: ຜູ້ກະທຳຜິດແມ່ນທ້າວ ອາດສະພັງ ອາຍຸ 21 ປີ, ກຳມະກອນ ຢູ່ບ້ານຈອມເພັດ ເມືອງສີສັດຕະນາກ ແລະ ທ້າວ ລັດຕະນີ ອາຍຸ 18 ປີ, ກຳມະກອນ ຢູ່ບ້ານດົງຄຳຊ້າງ ເມືອງຫາດຊາຍຟອງ. ສ່ວນລາຍລະອຽດຄະດີຈະລາຍງານຕາມພາຍຫຼັງ.


ຕໍ່ກັບເຫດການດັ່ງກ່າວ ກອງບັນຊາການ ປກສ ນະຄອນຫຼວງວຽງຈັນ ຂໍຊົມເຊີຍພົນລະເມືອງດີທີ່ມີຈິດໃຈກ້າຫານ ສະກັດກັ້ນເຫດການດັ່ງກ່າວໄດ້ທັນເວລາ ແລະ ຂໍຝາກຄຳແນະນຳປະຊາຊົນບັນດາເຜົ່າໃຫ້ມີສະຕິລະວັງຕົວ, ຊ່ວຍເປັນຫູເປັນຕາຕິດຕາມກຸ່ມຄົນທີ່ໜ້າສົງໄສເຄື່ອນໄຫວບໍ່ດີ, ເມື່ອພົບເຫັນກຸ່ມຄົນທີ່ບໍ່ໄວ້ວາງໃຈສາມາດແຈ້ງເຈົ້າໜ້າທີ່ທີ່ຢູ່ໃກ້ທີ່ສຸດ ຫຼືແຈ້ງຂໍ້ມູນມາເບີວອດແອັບ ປກສ ນະຄອນຫຼວງວຽງຈັນ 020 28899774.