ອິນເຕີເນັດຄາເຟ່ ຈຸດມົ່ວສຸມໄວລຸ້ນດີແທ້ຢ່າໃຫ້ມີ

ອິນເຕີເນັດຄາເຟ່ ຈຸດມົ່ວສຸມໄວລຸ້ນດີແທ້ຢ່າໃຫ້ມີ

23rd March 2021 0 By Education

ກາຍເປັນບັນຫາຊຳເຮືອທີ່ແກ້ກັນຍາກ ກ່ຽວກັບຮ້ານອິນເຕີເນັດຄາເຟ່ປັດຈຸບັນກາຍເປັນບ່ອນຫຼິ້ນການພະນັນອອນລາຍກຳລັງແພ່ລະບາດ ແລະ ເປັນທີ່ນິຍົມກັນຫຼິ້ນຢ່າງແພ່ຫຼາຍ ເຮັດໃຫ້ເຍົາວະຊົນ, ນັກຮຽນ, ນັກສຶກສາ ຕິດການພະນັນຫຼາຍຂຶ້ນ ແລະ ເປັນສາເຫດໜຶ່ງຂອງການປຸ້ນຈີ້ຊີງຊັບ ລັກເລັກຂະໂມຍນ້ອຍ, ຂ້າເຈົ້າເອົາຂອງ, ຂີ້ຕົວະຫຼອກລວງເພື່ອເອົາຊັບສິນຂອງຄົນອື່ນເກີດຂຶ້ນບໍ່ເວັ້ນໃນແຕ່ລະວັນ.


ໄລຍະຜ່ານມາ, ພະແນກໄປສະນີ, ໂທລະຄົມ ແລະ ການສື່ສານ ແລະ ກົມສື່ສານ, ພະແນກອຸດສາຫະກຳ ແລະ ການຄ້າ, ພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ໄດ້ອອກໃບອະນຸຍາດໃຫ້ບຸກຄົນເຄື່ອນໄຫວເປີດຮ້ານອິນເຕີເນັດຄາເຟ່ຮູບການດຳເນີນທຸລະກິດ ແມ່ນໃຫ້ບໍລິການຂໍ້ມູນຂ່າວສານ ແລະ ຕິດຕໍ່ສື່ສານ ພາຍຫຼັງບຸກຄົນໄດ້ຮັບໃບອະນຸຍາດແລ້ວໄດ້ເຄື່ອນໄຫວທຸລະກິດບໍ່ໄປຕາມວັດຖຸປະສົງ ເຊັ່ນ: ຫຼິ້ນການພະນັນທາງອອນລາຍ, ເຊິ່ງຮູບການຫຼິ້ນແມ່ນໂອນເງິນຊື້ຢູເຊີ ເພື່ອຫຼິ້ນເກມພະນັນອອນລາຍ ຜ່ານທາງທະນາຄານ ຫຼື ຂາຍຢູ່ໜ້າຮ້ານໂດຍກົງ ເຮັດໃຫ້ເຍົາວະຊົນ, ນັກຮຽນ, ນັກສຶກສາ ຕິດການພະນັນຢ່າງ ຫຼວງຫຼາຍ ເຮັດໃຫ້ຮ້ານອິນເຕີເນັດຫຼາຍແຫ່ງເປັນບ່ອນຂາຍຢາ-ມົ້ວສຸມຢາເສບຕິດ.


ຕໍ່ກັບສະພາບການດັ່ງກ່າວທີ່ເກີດຂຶ້ນ, ລັດຖະບານ ໄດ້ມອບໝາຍໃຫ້ກະຊວງ ປກສ ເປັນເຈົ້າການໃນການແກ້ໄຂ ໂດຍສົມທົບກັບພາກສ່ວນກ່ຽວຂ້ອງ ເພີ່ມທະວີກວດກາ ແລະ ປາບປາມກ່ຽວກັບສະພາບການຫຼິ້ນເກມພະນັນອອນລາຍ ທີ່ຜິດຕໍ່ລະບຽບກົດໝາຍ. ກໍລະ ນີພົບເຫັນຜູ້ກະທຳຜິດແມ່ນໃຫ້ມີມາດຕະການເດັດຂາດຕາມກົດໝາຍ ແລະ ລະບຽບການທີ່ກຳນົດໄວ້; ດັ່ງນັ້ນ, ເພື່ອເປັນບ່ອນອີງໃນການເພີ່ມທະວີແກ້ໄຂຕໍ່ສະພາບການຫຼິ້ນເກມພະ ນັນອອນລາຍ ເຈົ້າໜ້າທີ່ກົມຕໍາຫຼວດເສດຖະກິດ ກົມໃຫຍ່ຕໍາຫຼວດ ກະຊວງ ປກສ ໄດ້ອອກແຈ້ງການ ເຖິງພາກສ່ວນທີ່ເປີດກິດຈະການຮ້ານອິນເຕີເນັດ-ຄາເຟ່ ທີ່ລະເມີດໃຫ້ບໍລິ ການຫຼິ້ນເກມພະນັນອອນລາຍທີ່ຜິດກົດໝາຍໃຫ້ຢຸດເຊົາ. ຖ້າບໍ່ຢຸດເຊົາແມ່ນຈະໄດ້ປະຕິບັດແກ້ໄຂຕາມລະບຽບກົດໝາຍຢ່າງເຂັ້ມງວດ.


ຜ່ານການເກັບກຳຂຶ້ນບັນຊີຂອງເຈົ້າໜ້າທີ່ກ່ຽວຂ້ອງໃນທົ່ວປະເທດມີຮ້ານ ອິນເຕີເນັດຄາເຟ່ ທັງໝົດ 497 ຮ້ານ, ຮ້ານທີ່ມີໃບອະນຸຍາດທີ່ກ່ຽວຂ້ອງ 421 ຮ້ານ, ບໍ່ມີໃບອະນຸຍາດ 76 ຄົນ, ຮ້ານດັ່ງກ່າວພາຍຫຼັງໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງແລ້ວ, ສ່ວນຫຼາຍສະ ຖານທີ່ດັ່ງກ່າວເປັນບ່ອນໃຫ້ບໍລິການພະນັນທາງອອນລາຍ ແລະ ເປັນບ່ອນຂາຍ-ມົ້ວສຸມຢາເສບຕິດ;
ຜ່ານມາເຈົ້າໜ້າທີ່ໄດ້ສຶກສາອົບຮົມເຈົ້າຂອງຮ້ານໄດ້ 98 ຮ້ານ, ຢຶດຄອມພິວເຕີທີ່ນຳໃຊ້ເຂົ້າໃນການກະທຳຜິດໄດ້ 22 ຊຸດ ແລະ ດຳເນີນຄະດີຕໍ່ບຸກຄົນທີ່ບໍ່ເຂັດຫຼາບ ໄດ້ 3 ຄົນ; ນອກນີ້, ຍັງພົບເຫັນບັນດາເປົ້າໝາຍທີ່ຫຼິ້ນໄພ້, ປິ່ງໂກ້, ໄກ່ໂຕນຄອນ 23 ຄົນ ຍິງ 14 ຄົນ ເປັນຊາວຕ່າງປະເທດ 14 ຄົນ ຍິງ 2 ຄົນ; ສຳລັບກົມຕໍາຫຼວດເສດຖະກິດ ສາມາດສຶກສາອົບຮົມຜູ້ກະທຳຜິດໄດ້ 8 ຄົນ ຍິງ 3 ຄົນ ພ້ອມທັງຢຶດຂອງກາງທີ່ນຳໃຊ້ເຂົ້າໃນການກະທຳຜິດເປັນຄອມພິວເຕີຈໍານວນ 6 ຊຸດ ແລະ ໜ້າຈໍຄອມພິວເຕີຈໍານວນ 2 ໜ່ວຍ.


ພັທ ວັນເຮືອງ ຈັນທະພອນ ຮອງຫົວໜ້າກົມຕໍາຫຼວດເສດຖະກິດ ກົມໃຫຍ່ຕຳຫຼວດ ຍອມຮັບວ່າ: ຜ່ານການ ຈັດຕັ້ງປະຕິບັດຂອງເຈົ້າໜ້າທີ່ໃນໄລຍະຜ່ານມາ ເຫັນໄດ້ວ່າການອອກໃບອະນຸຍາດໃຫ້ເປີດຮ້ານກ່ຽວກັບອິນເຕີເນັດຄາເຟ່ ຫຼື ຮ້ານອິນເຕີເນັດອອນລາຍ. ແຕ່ພວກເຂົາເຄື່ອນໄຫວໃຫ້ບໍລິການບໍ່ຖືກຕ້ອງຕາມໃບອະນຸຍາດ ມີການໃຫ້ບໍລິການຫຼິ້ນການພະນັນທຸກຮູບແບບທາງອອນລາຍ ພ້ອມທັງມີກຸ່ມຄົນບໍ່ດີໃຊ້ສະຖານທີ່ດັ່ງກ່າວເປັນບ່ອນຂາຍ ແລະ ມົ້ວສຸມຢາເສບຕິດ, ພາກສ່ວນທີ່ອອກໃບອະນຸຍາດໃຫ້ແລ້ວບໍ່ໄປຄຸ້ມຄອງຕິດ ຕາມກວດກາ ແລະ ບໍ່ມີມາດຕະການສະກັດກັ້ນອັນເດັດຂາດຕໍ່ບັນຫາດັ່ງກ່າວ; ມີພະນັກ ງານລັດຈຳນວນໜຶ່ງກະທຳຜິດຮ່ວມນຳເຈົ້າຂອງຮ້ານອິນເຕີເນັດຄາເຟ່ ຫຼື ຮ້ານອິນເຕີເນັດອອນລາຍ ດ້ວຍການເກັບເງິນນຳທຸກໆເດືອນ ເພື່ອອຳນວຍຄວາມສະດວກໃຫ້ແກ່ຜູ້ກະທຳ ຜິດ; ເຖິງວ່າເຈົ້າໜ້າທີ່ຈະເອົາໃຈໃສ່ສະກັດກັ້ນຕ້ານ ຫຼື ມີມາດຕະການສ່ຳໃດກໍຕາມ ແຕ່ສະ ພາບການຫຼິ້ນການພະນັນອອນລາຍ, ຫຼິ້ນໄພ້, ປິ່ງໂກ້ ແລະ ໄກ່ໂຕນຄອນ ຍິ່ງເພີ່ມທະວີຂຶ້ນ; ເຊິ່ງບັນຫາດັ່ງກ່າວນີ້ ມັນເປັນຜົນກະທົບຕໍ່ເສດຖະກິດ ແລະ ສັງຄົມຢ່າງໜັກເຮັດໃຫ້ເຍົາ ວະຊົນ, ນັກຮຽນ, ນັກສຶກສາຕິດການພະນັນ, ຕິດຢາເສບຕິດ ນັບມື້ນັບຫຼາຍຂຶ້ນ ແລະ
ເຮັດໃຫ້ອັດຕາເງິນກັບນັບມື້ນັບອ່ອນຄ່າລົງ ຖ້າທຽບໃສ່ເງິນຕາຕ່າງປະເທດ.

ເພື່ອເຮັດໃຫ້ບັນຫາການຫຼິ້ນຖານພະນັນອອນລາຍຫຼຸດລົງ ບັນດາກົມ-ກອງ, ບັນດາກະຊວງທີ່ກ່ຽວຂ້ອງ ຕ້ອງເອົາໃຈໃສ່ກວດກາ, ແກ້ໄຂ ແລະ ຊີ້ນໍາ ສາຍຕັ້ງຂອງຕົນຢ່າງເດັດຂາດ, ເຂັ້ມງວດ ແລະ ເອົາຈິງເອົາຈັງ ພ້ອມທັງສ້າງຕັ້ງເປັນໜ່ວຍສະເພາະກິດໜຶ່ງຂຶ້ນມາ ເພື່ອແກ້ ໄຂບັນຫາດັ່ງກ່າວໃຫ້ຫຼຸດໜ້ອຍຖອຍລົງເທື່ອລະກ້າວ.

ຂ່າວຈາກ: ກົດໝາຍລົງໂທດ