ຜະລິດຜ້າອັດປາກໄດ້ 1,000 ອັນ/ມື້ ເພື່ອທົດລອງຄຸນນະພາບໃນການປ້ອງກັນເຊື້ອໄວຣັດ

ຜະລິດຜ້າອັດປາກໄດ້ 1,000 ອັນ/ມື້ ເພື່ອທົດລອງຄຸນນະພາບໃນການປ້ອງກັນເຊື້ອໄວຣັດ

14th February 2020 0 By Entertain

ໜ່ວຍງານເຝົ້າລະວັງ ແລະ ໂຕ້ຕອບການລະບາດຂອງພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫລື ໂຄໂຣນາໄວຣັສໃນທົ່ວປະເທດໄດ້ຮັບການຍົກລະດັບການຈາກຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງຈາກກະຊວງສາທາລະນະສຸກ ເພື່ອກຽມຄວາມພ້ອມໃຫ້ແກ່ລະບົບການເຝົ້າລະວັງໂຕ້ຕອບຢ່າງທັນເວລາ.

 


ໃນໂອກາດຖະແຫລງຂ່າວກ່ຽວກັບສະພາບການລະບາດຂອງພະຍາດໂຄໂຣນາໄວຣັສໃນວັນທີ 13 ກຸມພາ 2020, ທີ່ກະຊວງສາທາລະນະສຸກ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາ ທາລະນະສຸກ ແຈ້ງໃຫ້ຮູ້ວ່າ: ປະຈຸບັນລັດຖະບານລາວໄດ້ສືບຕໍ່ເຝົ້າລະວັງສະພາບການລະບາດຂອງພະ ຍາດນີ້ຢູ່ບັນດາປະເທດຢ່າງຕໍ່ເນື່ອງ ໂດຍສະເພາະການກັ່ນຕອງ ແລະ ຕິດຕາມບັນດາກຸ່ມຄົນທີ່ເດີນ ທາງໄປເຂດລະບາດ ແລະ ພະນັກງານຄົນຈີນທີ່ເດີນທາງເຂົ້າມາເຮັດວຽກຢູ່ລາວຢ່າງໃກ້ຊິດ ເຊັ່ນ:ໂຮງ ງານຢາສູບທີ່ກັບມາເຮັດວຽກຢູ່ແຂວງສະຫວັນະເຂດ, ຄົນລາວທີ່ເດີນທາງກັບມາຈາກທັດສະນະສືກສາທີ່ປະເທດຈີນ, ຄະນະຄົນງານທີ່ຈະກັບເຂົ້າມາເຮັດວຽກຢູ່ໂຮງໝໍມະໂຫສົດ, ໂຄງການກໍ່ສ້າງທາງລົດ ໄຟລາວຈີນ ແລະ ບ່ອນອື່ນໆ.


ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ແຈ້ງໃຫ້ຮູ້ຕື່ມວ່າ: ສຳລັບມາດຕະ ການປ້ອງກັນລາວໄດ້ກຽມຜະລິດຜ້າອັດປາກ, ໂດຍກົມໃຫ່ຍພະລາທີການກອງທັບ ສາມາດຜະລິດໄດ້ 1,000 ອັນ/ມື້ ມານຳໃຊ້ກ່ອນເພື່ອທົດລອງຄຸນນະພາບໃນການປ້ອງກັນເຊື້ອໄວຣັດ ແລະແນະນໍາໃຫ້ປະຊາຊົນຫຼີກລ່ຽງການເດີນທາງໄປເຂດທີ່ມີການລະບາດ ຫຼື ຊຸມຊົນແອອັດ,

ຖ້າຈຳເປັນຈະໄປຕ້ອງໄດ້ ຫຼີກລ່ຽງການສຳຜັດໃກ້ຊິດກັບຄົນທີ່ມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍແລະຫາຍໃຈຍາກປະຕິບັດມາລະຍາດໃນການໄອຈາມດ້ວຍການອັດປາກ ແລະດັງ, ໃຊ້ຜ້າອັດປາກ, ລ້າງມືທຸກຄັ້ງດ້ວຍສະບູຫຼືນ້ຳຢາຂ້າເຊື້ອ, ຖ້າຫາກມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ ຫຼືຫາຍໃຈຍາກບວກກັບ ໄດ້ເດີນທາງໄປໃນເຂດທີ່ເກີດການລະບາດ ຫລືມີປະຫວັດຂອງການເດີນທາງມາຈາກຈີນພາຍໃນ14 ວັນ ຄວນໄປພົບແພດໝໍໂດຍທັນທີ.

ຂຽນຂ່າວ: ຈັນທະສອນ ສີຫານາດ