ນະຄອນຫຼວງແຈ້ງປິດຊົ່ວຄາວ 10 ສະຖານທີ່, ທີ່ຜູ້ຕິດເຊື້ອໄປເລາະ

ນະຄອນຫຼວງແຈ້ງປິດຊົ່ວຄາວ 10 ສະຖານທີ່, ທີ່ຜູ້ຕິດເຊື້ອໄປເລາະ

20th April 2021 0 By Education

ເອີ້ນວ່າເປັນທີ່ກ່າວເຖິງຫຼາຍທີ່ສຸດໃນບັນດາ 60 ຄົນທີ່ຕິດໂຄວິດກໍ່ແມ່ນກໍລະນີທີ 59 ເນື່ອງຈາກເລາະທົ່ວນະຄອນຫຼວງ ແລະສ່ວນໃຫຍ່ຈະໄປບ່ອນທີ່ມີຄົນຫຼາຍໆ ເປັນຕົ້ນຮ້ານອາຫານ, ຮ້ານບັນເທິງ, ວັດ ແລະຍັງມີລົດເມອີກ ເຊິ່ງຕອນນີ້ ເພື່ອຄວາມປອດໄພ ທາງອຳນາດການປົກຄອງທ້ອງຖິ່ນໄດ້ສັ່ງປິດ 10 ສະຖານທີ່ຫຼັກໆທີ່ຜູ້ຕິດເຊື້ອໄດ້ພາກຸ່ມຄົນໄທໄປທ່ຽວ.

ອີງຕາມແຈ້ງການຂອງ ນະຄອນຫຼວງວຽງຈັນທີ່ອອກຫຼ້າສຸດກໍ່ຄືຕອນຄ່ຳວັນທີ 20 ເມສາ ນີ້ ໂດຍອີງຕາມ ການຖະແຫຼງຂ່າວຂອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຄັ້ງວັນທີ 20 ເມສາ 2021 ກ່ຽວກັບພົບຜູ້ຕິດເຊື້ອພະຍາດ COVID-19 ໃຫມ່ ກໍລະນີທີ່ 59 ແລະ 60 ທີ່ມີການເຄື່ອນໄຫວໄປໃນຊຸມຊົນຫຼາຍແຫ່ງ ຢູ່ນະຄອນຫຼວງວຽງຈັນ ທັງ ອີງໃສ່ຜົນກອງປະຊຸມຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID=19 ຂັ້ນນະຄອນຫຼວງວຽງຈັນ ຄັ້ງວັນທີ 20 ເມສາ 2021.


ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ຂັ້ນນະຄອນຫຼວງວຽງຈັນ ອອກຄໍາສັ່ງ ຫ້າມເຄື່ອນໄຫວກິດຈະການ ທີ່ບໍ່ມີໃບອະນຸຍາດດໍາເນີນທຸລະກິດ ດັ່ງລຸ່ມນີ້:
ໃນຮ້ານ Funny 89, ບ້ານທ່າສະຫວ່າງ, ເມືອງໄຊທານີ ຮ້ານນວດ 111, ບ້ານຫນອງບອນ, ເມືອງໄຊເສດຖາ,

ພ້ອມນີ້ໃຫ້ປິດຊົ່ວຄາວກິດຈະການ ແລະ ສະຖານທີ່ ດັ່ງລຸ່ມນີ້:
ໂຮງແຮມເຈືອງ 2, ບ້ານສີບຸນເຮືອງ, ເມືອງຈັນທະບູລີ; ຮ້ານບັນເທີງວັອດຄັບ, ບ້ານຮ່ອງໄກ່ແກ້ວ, ເມືອງຈັນທະບູລີ; ຮ້ານ Karaoke 8118, ບ້ານຮ່ອງໄກ່ແກ້ວ, ເມືອງຈັນທະບູລີ; ຮ້ານເຂົ້າປຽກໄກ່ຜູ້ໂອກ, ບ້ານຮ່ອງໄກ່ແກ້ວ, ເມືອງຈັນທະບູລີ,  ບ້ານໂພນສະຫວ່າງ, ເມືອງຈັນທະບູລີ (ເຮືອນຜູ້ຕິດເຊື້ອ), ໂຮງຮຽນພາສາອັງກິດ Vientiane College ບ້ານຫນອງບອນ, ເມືອງໄຊເສດຖາ; ໂຮງຮຽນມິດຕະພາບ ລາວ-ຫວຽດ, ບ້ານໂພນພະເນົາ, ເມືອງໄຊເສດຖາ (ບ່ອນນ້ອງສາວຜູ້ຕິດເຊື້ອເຂົ້າຮຽນ)

ບໍ່ພຽງເທົ່ານັ້ນຍັງໃຫ້ ໂຈະຊົ່ວຄາວການເຂົ້າຮ່ວມກິດຈະກໍາ ແລະ ພິທີກໍາທາງສາສະຫນາ ຂອງປະຊາຊົນ ຢູ່ວັດສີເມືອງ, ເມືອງ ສີສັດຕະນາກ.


ສໍາລັບຮ້ານອາຫານ, ກິດຈະການ ແລະ ສະຖານທີ່ອື່ນໆ ທີ່ມີຜູ້ໃຊ້ບໍລິການ ກິນ, ດື່ມ ແລະ ຈັດກິດຈະ ກໍາທີ່ເຕົ້າໂຮມຄົນຈໍານວນຫຼາຍ ແມ່ນໃຫ້ປະຕິບັດມາດຕະການປ້ອງກັນພະຍາດ COVID-I9 ຂອງຄະນະສະເພາະ ກິດວາງອອກ ຢ່າງເຂັ້ມງວດ (ຮັກສາໄລຍະຫ່າງ, ວັດແທກອຸນຫະພູມ, ມີນ້ໍາຢາລ້າງມື, ມີຜ້າອັດປາກ-ດັງ). ໃນໄລຍະ ນີ້ ຖ້າບໍ່ຈໍາເປັນ ແມ່ນໃຫ້ຊາວນະຄອນຫຼວງວຽງຈັນ ຫຼີກລ້ຽງການກິນອາຫານຢູ່ຮ້ານ, ໃຫ້ຊື້ໄປກິນຢູ່ເຮືອນເອົາ ໂດຍມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID=19 ຂັ້ນເມືອງ ສົມທົບກັບເຈົ້າຫນ້າທີ່ຕໍາຫຼວດ, ຂະແຫນງການ ແລະ ອໍານາດການປົກຄອງບ້ານທີ່ກ່ຽວຂ້ອງ ເປັນເຈົ້າການ ບັງຄັບໃຊ້ຄໍາສັ່ງສະບັບນີ້ ຢ່າງເຂັ້ມງວດ.

ຕາມນີ້