ແມ່ຄ້າຜ້າປິດປາກວ່າແນວໃດ! ປີນີ້ຕ່າງປີກາຍ ຜ້າປິດປາກລາຄາຖືກ ແຖມຖືກກົດລາຄາລົງ ຈົນບໍ່ກ້າຂາຍ

ແມ່ຄ້າຜ້າປິດປາກວ່າແນວໃດ! ປີນີ້ຕ່າງປີກາຍ ຜ້າປິດປາກລາຄາຖືກ ແຖມຖືກກົດລາຄາລົງ ຈົນບໍ່ກ້າຂາຍ

29th April 2021 0 By Education

ເຊື່ອວ່າຫຼາຍທ່ານຈະຍັງຈື່ໄດ້ ສໍາລັບເຫດການລາຄາຜ້າປິດປາກທີ່ຖີບໂຕແພງຂຶ້ໜຫຼາຍໃນປີ 2020 ຈົນເຖິງລາຄາກັບລະ 150.000ກີບ ຫຼື ຫຼາຍກວ່ານີ້ກໍ່ມີ.

ເຊິ່ງຍ້ອນມີການລະບາດຂອງພະຍາດໂຄວິດ-19 ເຮັດໃຫ້ພໍ່ແມ່ປະຊາຊົນ ຕ້ອງໄດ້ຊື້ສິນຄ້າໃນລາສູງຂະໜາດນັ້ນ ມາໃສ່ເພື່ອປ້ອງກັນໂຕເອງຈາກເຊື້ອພະຍາດດັ່ງກ່າວ. ແຕ່ທັ້ງນີ້ທັ້ງນັ້ນ ກໍ່ມີສຽງຈົ່ມວ່າຈາກຜູ້ຊື້ບໍ່ໜ້ອຍ ຂະນະດຽວກັນແມ່ຄ້າກໍ່ໃຫ້ເຫດຜົນວ່ານໍາເຂົ້າມາແພງ ເຊິ່ງມັນກໍ່ເປັນເຫດຜົນທີ່ຟັງຂຶ້ນ ເພາະໃນຕອນນັ້ນ ລາວເຮົາເອງຍັງບໍ່ທັນມີໂຮງງານຜະລິດຟູາປະເທດເຮົາ.

ແຕ່ຫຼ້າສຸດ, ເຖິງວ່າໃນປີ 2021 ສະພາບການລະບາດຂອງພະຍາດໂຄວິດ-19 ຈະໜັກຂຶ້ນກວ່າປີຜ່ານມາ ແຕ່ສິ່ງທີ່ເຮົາເຫັນໄດ້ປະຈັກຕາໃນຕອນນີ້ຄື ລາຄາຜ້າປິດປາກທີ່ບໍ່ແພງສໍ່າປີຜ່ານມາ ເຊິ່ງສາເຫດກໍ່ເດົາບໍ່ຍາກ.

ໃນຄວາມຄິດຂອງແອັດມິນສຶກສາ-ໄອທີເອງ ຂໍໃຫ້ເຫດຜົນທີ່ລາຄາຜ້າປິດປາກໃນຊ່ວງນີ້ບໍ່ແພງ ຢູ່ໃນເກນທີ່ປະຊາຊົນຄົນທົ່ວໄປສາມາດຊື້ໄດ້ ແຖມແມ່ຄ້າບາງຄົນຍັງຖືກກົດລາຄາລົງແບບທີ່ບໍ່ສາມາດຂາຍໄດ້ເລີຍ ອາດຍ້ອນມີຜູ້ຂາຍເພີ່ມຂຶ້ນ ສິນຄ້າມີຈໍານວນຫຼາຍ ບັນດາປະເທດສົ່ງອອກກໍ່ມີການເພີ່ມກໍາລັງການຜະລິດເພາະໄດ້ບົດຮຽນຈາກປີຜ່ານມາຕອນສິນຄ້າຂາດຕະຫຼາດ ເມື່ອສິນຄ້າພຽງພໍກໍ່ບໍ່ສາມາດປັ່ນລາຄາໄດ້  ແລະ ສິ່ງສໍາຄັນ ໃນຕອນນີ້ປະເທດເຮົາມີໂຮງງານຜະລິດຜ້າປິດປາກແລ້ວ.

ແນວໃດກໍ່ຕາມ ການນໍາໃຊ້ຜ້າປິດປາກ ຖືເປັນອີກວິທີໜຶ່ງໃນການປ້ອງກັນພະຍາດໂຄວິດ-19 ຕາມຄໍາແນະນໍາຂອງຄະນະສະເພາະກິດ. ທັ້ງນີ້ສໍາລັບຜູ້ບໍລິໂພກ ຫຼື ຜູ້ຊື້ເອງ ເຖິງແມ່ນວ່າຕອນນີ້ປະເທດເຮົາຈະມີໂຮງງານຜະລິດຜ້າປິດປາກ ທ່ານບໍ່ກັງວົນເລື່ອງສິນຄ້າຂາດຕະຫຼາດແລ້ວ ກໍ່ຂໍໃຫ້ຊື້ສິນຄ້າກັບແມ່ຄ້າໃນລາຄາທີ່ເໝາະສົມເປັນໄປຕາມທ້ອງຕະຫຼາດ ຢ່າສວຍໂອກາດກົດລາຄາດ້ວຍການອ້າງເຫດຜົນຮ້ອຍຢ່າງພັນປະການ ເຮັດໃຫ້ຄົນອື່ນເດືອດຮ້ອນ ຕ້ອງເຫັນໃຈວ່າແມ່ຄ້າຊື້ມາໃນລາຄາຕົ້ນທຶນເທົ່າໃດ ເພາະບາງຄົນນໍາເຂົ້າມາຕັ້ງແຕ່ຊ່ວງທີ່ຜ້າປິດປາກຍັງລາຄາແພງຢູ່.

ແມ່ຄ້າຖືກກົດລາຄາຈາກກຸ່ມຄົນທີ່ສວຍໂອກາດ

ສໍາລັບແມ່ຄ້າເອງ ດັ່ງທີ່ຮູ້ແລ້ວວ່າຕອນນີ້ ຜ້າປິດປາກບໍ່ໄດ້ຂາດຕະຫຼາດແລ້ວ ທີ່ສໍາຄັນໂຮງງານຜະລິດກໍ່ໄດ້ຮັບຄວາມໜ້າເຊື່ອຖືກວ່າ. ສະນັ້ນ ຫາກລາຄາທີ່ລູກຄ້າສະເໜີນັ້ນ ບໍ່ເຫຼືອບ່າກວ່າແຮງ ຍັງແບກທຶນໄວ້ໄດ້ຢູ່ກໍ່ຄວນຂາຍອອກແບ່ງປັນກັນໃຊ້ ດີກວ່າກັກສິນຄ້າໄວ້ກັບຕົນແຕ່ບໍ່ໄດ້ເງິນຈັກກີບ. ແນວໃດກໍ່ຕາມ ຄົນລາວ ສັງຄົມລາວ ຄວນມີນໍ້າໃຈ ຮັກແພງຊ່ວຍເຫຼືອເຊິ່ງກັນແລະກັນ.