ປະກາດແຕ່ງຕັ້ງທ່ານ ຮສ. ດຣ. ຄຳຜົງ ນາມມະວົງມີໄຊ ແລະ ທ່ານ ຮສ. ໂພສີ ທິບດາວັນ ເປັນຮອງອະທິການບໍດີ ມະຫາວິທະຍາໄລແຫ່ງຊາດ

ປະກາດແຕ່ງຕັ້ງທ່ານ ຮສ. ດຣ. ຄຳຜົງ ນາມມະວົງມີໄຊ ແລະ ທ່ານ ຮສ. ໂພສີ ທິບດາວັນ ເປັນຮອງອະທິການບໍດີ ມະຫາວິທະຍາໄລແຫ່ງຊາດ

24th February 2020 0 By Admin

ກະຊວງສຶກສາທິການ ແລະ ກີລາ ປະກາດແຕ່ງຕັ້ງຮອງອະທິການບໍດີ ມະຫາວິທະຍາໄລແຫ່ງຊາດ 2 ທ່ານໃນວັນທີ 19 ກຸມພາ 2020 ຜ່ານມາ ທີ່ສະໂມສອນຄະນະເສດຖະສາດ ແລະ ບໍລິຫານທຸລະກິດ, ພາຍໃຕ້ການເປັນປະທານຂອງທ່ານ ຮສ. ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະກີລາ, ມີທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍທ່ານຮອງອະທິການບໍດີ, ຄະນະ-ຮອງຄະນະບໍດີ, ແຂກຖືກເຊີນ, ພະນັກງານ,  ຄູ-ອາຈານ ເຂົ້າຮ່ວມ.

ໂອກາດດັ່ງກ່າວ, ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງພະນັກງານ ກະຊວງສຶກສາທິການ ແລະ ກີລາ ກໍໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ສະບັບເລກທີ 118/ນຍ, ລົງວັນທີ 6 ກຸມພາ 2020 ວ່າດ້ວຍການແຕ່ງຕັ້ງ ຮອງອະທິການບໍດີ ມະຫາວິທະຍາໄລແຫ່ງຊາດ ໂດຍແຕ່ງຕັ້ງທ່ານ ຮສ. ດຣ. ຄຳຜົງ ນາມມະວົງມີໄຊ ເປັນຮອງອະທິການບໍດີມະຫາວິທະຍາໄລແຫ່ງຊາດ.

ຜ່ານດຳລັດຂອງນາຍົກລັດຖະມົນຕີ ສະບັບເລກທີ 119/ນຍ, ລົງວັນທີ 6 ກຸມພາ 2020 ວ່າດ້ວຍການແຕ່ງຕັ້ງ ຮອງອະທິການບໍດີ ມະຫາວິທະຍາໄລແຫ່ງຊາດ ໂດຍແຕ່ງຕັ້ງທ່ານ ຮສ. ໂພສີ ທິບດາວັນ ເປັນຮອງອະທິການບໍດີ ມະຫາວິທະຍາໄລແຫ່ງຊາດ.

ພ້ອມກັນນັ້ນ ໃນພິທີຍັງໄດ້ຮັບຟັງການໂອ້ລົມຂອງທ່ານ ຮສ. ປອ. ກອງສີ ແສງມະນີ ເຊິ່ງທ່ານໄດ້ກ່າວສະແດງຄວາມຍໍຍ້ອງຊົມເຊີຍໃນການປະຕິບັດ ໜ້າທີ່ຂອງຄະນະພັກ ຄະນະນຳມະຫາວິທະຍາໄລແຫ່ງຊາດໃນໄລຍະຜ່ານມາ.

ພ້ອມນັ້ນ ທ່ານຍັງໄດ້ເນັ້ນໜັກກ່ຽວກັບການມີວິໄສທັດທີ່ກວ້າງໄກ, ມີການພັດທະນາຢ່າງຮອບດ້ານ ໃຫ້ທຽບເທົ່າກັບພາກພື້ນ ແລະສາກົນ; ສືບຕໍ່ປັບປຸງກົງຈັກການຈັດຕັ້ງໃນແຕ່ລະຂັ້ນໃຫ້ເໝາະສົມ.

 

ທີ່ມາ: nuo.edu.la