ສະລົດໃຈ! ໂຈນກໍ່ເຫດລັກສາຍໄຟ ໂຊກຮ້າຍຖືກໄຟຟ້າຊັອດເສຍຊີວິດ

ສະລົດໃຈ! ໂຈນກໍ່ເຫດລັກສາຍໄຟ ໂຊກຮ້າຍຖືກໄຟຟ້າຊັອດເສຍຊີວິດ

25th February 2020 0 By Education

ຕາມການໃຫ້ຂໍ້ມູນ ທ່ານ ຮອ ໂອດີ ອົ້ນສີ ຫົວໜ້າ ປກສ ກຸ່ມບ້ານ ນາເຕີຍ ເມືອງຫຼວງນໍ້າທາ, ແຂວງຫຼວງນໍ້າທາ ໃຫ້ຮູ້ວ່າ: ເວລາປະມານ 11 ໂມງຕອນທ່ຽງຂອງວັນທີ 19 ກຸມພາ 2020ນີ້, ໄດ້ຮັບແຈ້ງຄວາມຈາກພົນລະເມືອງດີວ່າມີຄົນບໍ່ດີໄປລັກລອບຕັດເອົາສາຍໄຟຟ້າຢູ່ເຂດອຸໂມງຈຸດທີ່ 2 ຂອງບໍລິສັດກໍ່ສ້າງເສັ້ນທາງລົດໄຟລາວ-ຈີນ ແລ້ວຖືກໄຟຟ້າຊອດ.

ພາຍຫຼັງຮັບແຈ້ງຄວາມທາງເຈົ້າໜ້າທີ່ກໍ່ໄດ້ລົງສົມທົບກັບບໍລິສັດໄຟຟ້າ, ເຈົ້າຂອງບໍລິສັດກໍ່ສ້າງ ແລະ ພາກສ່ວນທີ່ກ່ຽວຂ້ອງເຂົ້າກວດກາສະຖານທີ່ເກີດເຫດ, ຈີ່ງໄດ້ພົບເຫັນ ທ້າວ ຈ່ອຍ ອາຍຸ 58 ປີ ເປັນຜູ້ໄປລັກຕັດເອົາສາຍໄຟຟ້າ ເຮັດໃຫ້ໄຟຟ້າຊອດຜູ້ກ່ຽວບາດເຈັບສາຫັດຍ້ອນຖືກໄຟໄໝ້ ແລະ ທາງເຈົ້າໜ້າທີ່ໄດ້ພ້ອມກັນຕັດກະແສໄຟຟ້າ, ພ້ອມທັງດັບມອດໄຟທີ່ໄໝ້ລາມປ່າໄມ້ໃນເຂດດັ່ງກ່າວໃຊ້ເວລາປະມານ 30 ນາທີ ຈື່ງສາມາດຄວບຄຸມໄຟໄວ້ໄດ້.

ເຫດການດັ່ງກ່າວໄດ້ສ້າງຄວາມເສຍຫາຍຄື: ໝໍ້ແປງໄຟຟ້າ 1 ໜ່ວຍ, ສາຍໄຟຟ້າ ແລະ ເຮັດໃຫ້ໄຟໄໝ້ລາມປ່າເສຍຫາຍເປັນບໍລິເວນກ້ວາງ. ຕໍ່ກັບເຫດການດັ່ງກ່າວເຮັດໃຫ້ຜູ້ທີ່ໄປລັກເຫຼັກໄດ້ເສຍຊີວິດໃນມື້ຕໍ່ມາ.

ພາບປະກອບ

ໂອກາດນີ້ ທ່ານ ຮອ ໂອດີ ອົ້ນສີ ຫົວໜ້າ ປກສ ກຸ່ມບ້ານ ນາເຕີຍ ເມືອງຫຼວງນໍ້າທາໄດ້ຮຽກຮ້ອງມາຍັງປະຊາຊົນບັນດາເຜົ່າຈົ່ງພ້ອມກັນປົກປັກຮັກສາຊັບສີນສ່ວນລວມ ແລະ ໃຫ້ມີຄວາມຮ່ວມມືຕໍ່ບັນດາບໍລິສັດຂອງຕ່າງປະເທດທີ່ເຂົ້າ
ມາກໍ່ສ້າງເສັ້ນທາງລົດໄຟ ລາວ – ຈີນ, ກໍ່ຄືໃນການສ້າງສາພັດທະນາບ້ານເມືອງ.

ທີ່ມາ: ຂ່າວສານຫຼວງນໍ້າທາ, ຂ່າວ: ພັຕ ຄໍາຫຼ້າ ໃຈຍະວົງ