ລາມມາຮອດຂົງເຂດການສຶກສາ! ນັກຮຽນ 200ຄົນຖືກລອຍແພ ຫຼັງໂຮງຮຽນຍຸບ

ລາມມາຮອດຂົງເຂດການສຶກສາ! ນັກຮຽນ 200ຄົນຖືກລອຍແພ ຫຼັງໂຮງຮຽນຍຸບ

25th February 2020 0 By Education

ກ່ອນໜ້ານີ້ແອັດເຊື່ອວ່າຫຼາຍທ່ານຈະໄດ້ຮັບຮູ້ຂ່າວຂອງປະເທດເພື່ອນບ້ານກ່ຽວກັບຜູ້ປະກອບການທຸລະກິດດັງໆຫຼາຍແຫ່ງຍຸບກິດຈະການລົງຍ້ອນເສດຖະກິດພົ່ນພິດ ບໍ່ສາມາດດໍາເນີນກິດຈະການໄປຕໍ່ໄດ້, ເຊິ່ງຜົນກະທົບດັ່ງກ່າວໄດ້ແຜ່ລາມຕໍ່ທຸລະກິດຫຼາຍຂົງເຂດ ຫຼ້າສຸດ ມາຮອດການສຶກສາແລ້ວ, ໂຮງຮຽນອະຊີວະສຶກສາເອກະຊົນແຫ່ງໜຶ່ງໃນ ຈັງຫວັດໄຊນາກ ປະເທດໄທ ໄດ້ປະກາດເລີກກິດຈະການ ທັ້ງທີ່ມີນັກຮຽນ ກວ່າ 200ຊີວິດ ເດີນທາງມາຂໍຄໍາຊີ້ແຈງຈາກໂຮງຮຽນດັ່ງກ່າວ.

ພາບປະກອບຂ່າວເທົ່ານັ້ນ

ໂຮງຮຽນດັ່ງກ່າວກໍ່ໄດ້ຊີ້ແຈງເຖິງສາເຫດວ່າປະສົບກັບພາວະຂາດທຶນ ບໍ່ສາມາດເປີດໂຮງຮຽນຕໍ່ໄດ້ ຈະຊົດເຊີຍເງິນຄ່າຮຽນໃຫ້ນັກຮຽນພາກບ່າຍ ທີ່ຍັງບໍ່ຈົບການສຶກສາເປັນຈໍານວນເງິນ 1ໝື່ນບາດ ຫຼື ປະມານ 3ລ້ານກວ່າກີບ ໃນເດືອນພຶດສະພາ 2020 ແລະ ໃບທະບຽນສະແດງຜົນການຮຽນແມ່ນຈະໄດ້ຮັບໃນວັນທີ 30 ເມສາ.

ຂະນະດຽວກັນ ນັກສຶກສາໃນໂຮງຮຽນດັ່ງກ່າວ ໃຫ້ຮູ້ວ່າ: ຫຼາຍຄົນເຊື່ອໃນຄໍາໂຄສະນາຂອງໂຮງຮຽນ ແລະ ຕັດສິນໃຈກູ້ໜີ້ຢືມສິນມາຮຽນ ແຕ່ພໍຮອດມື້ນີ້ ທາງໂຮງຮຽນບອກວ່າ ການລົງໂຄສະນາຕ່າງໆເປັນການກະທໍາຂອງຄູປະຈໍາສູນ. ເຊິ່ງເຂົາເຈົ້າຈະຂໍເອົາເລື່ອງກັບຄູຄົນດັ່ງກ່າວທີ່ຮັບເງິນໄປ ເພາະທຸກຄົນເສຍເວລາຮຽນ, ເສຍເງິນ ຢາກໄດ້ວຸດທິການສຶກສາໄປປັບເງິນເດືອນ ໄປໃຊ້ໃນຊີວິດປະຈໍາວັນຕໍ່ໄປ ແຕ່ເມື່ອພົບເຫດການແບບນີ້ບໍ່ສາມາດເຮັດສິ່ງທີ່ຕັ້ງໃຈໄວ້ໄດ້ ຈຶ່ງຢາກໃຫ້ພາກສ່ວນກ່ຽວຂ້ອງເຮັດເລື່ອງນີ້ໃຫ້ກະຈ່າງແຈ້ງ ແລະ ຊ່ວຍເຫຼືອທຸກຄົນ ເພື່ອທວງຄວາມເປັນທໍາດ້ວຍ.

 

ທີ່ມາ: ມະຕິຊົນ