ກະຊວງວິທະຍາສາດ ແລະ ເຕັກໂນໂລຊີ ເປີດໂຄງການ “ນ້ອງຢາກເປັນນັກວິທະຍາສາດ”

ກະຊວງວິທະຍາສາດ ແລະ ເຕັກໂນໂລຊີ ເປີດໂຄງການ “ນ້ອງຢາກເປັນນັກວິທະຍາສາດ”

13th December 2019 0 By Admin

ກະຊວງວິທະຍາສາດ ແລະ ເຕັກໂນໂລຊີ (ກວຕ) ມີຄວາມມຸ້ງໝັ້ນທີ່ຈະພັດທະນາເຍົາວະຊົນໃຫ້ມີຄວາມມັກ ແລະ ໄຝ່ຝັນຢາກເປັນວິທະຍາສາດ ດ້ວຍການສະແດງອອກທາງດ້ານຄວາມກ້າຫານ, ກ້າຄິດ, ກ້າເຮັດ ແລະ ກ້າສະແດງອອກ ເພື່ອສ້າງຕົນເອງໃຫ້ກາຍເປັນບຸກຄະລາກອນທີ່ເຂັ້ມແຂງໃຫ້ແກ່ການພັດທະນາເສດຖະກິດ-ສັງຄົມໃນອະນາຄົດ.


ເມື່ອບໍ່ດົນມານີ້ ໄດ້ມີພິທີເປີດໂຄງການ “ນ້ອງຢາກເປັນນັກວິທະຍາສາດ” ທີ່ຫ້ອງປະຊຸມໃຫຍ່ຂອງ ກວຕ, ໂດຍໃຫ້ກຽດເຂົ້າຮ່ວມຂອງທ່ານ ບັນດິດ. ສຈ. ບໍ່ວຽງຄໍາ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ, ທັງເປັນປະທານສະພາວິທະຍາສາດ ແຫ່ງຊາດ, ມີຮອງລັດຖະມົນຕີ, ບັນດາຫົວໜ້າກົມ, ສະຖາບັນ, ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ, ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຄູ-ອາຈານ, ພ້ອມດ້ວຍນ້ອງນ້ອຍເຍົາວະຊົນ ແລະ ສື່ມວນຊົນເຂົ້າຮ່ວມ.


ໂອກາດນີ້, ທ່ານ ພຸດທະສັກ ວິຈິດຕຣາ, ຫົວໜ້າຫ້ອງການ ກະຊວງວິທະຍາສາດ ແລະ ເຕັກໂນໂລຊີ ທັງເປັນຫົວໜ້າໂຄງການ “ນ້ອງຢາກເປັນນັກວິທະຍາສາດ” ໄດ້ກ່າວວ່າ: ວຽກງານວິທະຍາສາດ ແລະ ເຕັກໂນໂລຊີ ເປັນວຽກງານໜຶ່ງທີ່ສຳຄັນຕິດພັນກັບທຸກຂົງເຂດວຽກງານ, ເປັນຂໍກະແຈໃນການຊຸກຍູ້ການພັດທະນາເສດຖະກິດ-ສັງຄົມຂອງປະເທດເຮົາ.


ພ້ອມກັນນີ້, ກໍເພື່ອເປັນການຈັດຕັ້ງຜັນຂະຫຍາຍ 6 ແຜນງານໃຫຍ່ຂອງ ກວຕ ວາງອອກໃຫ້ປະກົດຜົນເປັນຈິງ ໂດຍສະເພາະແຜນງານທີ 1 ແມ່ນການໂຄສະນາປູກຈິດສໍານຶກກ່ຽວກັບວຽກງານວິທະຍາສາດ ແລະ ເຕັກໂນໂລຊີອອກສູ່ສັງຄົມໃຫ້ກວ້າງຂວາງ.


ຈຸດປະສົງຂອງໂຄງການ “ນ້ອງຢາກເປັນນັກວິທະຍາສາດ” ແມ່ນເພື່ອໂຄສະນາເຜີຍແຜ່ກ່ຽວກັບວຽກງານວິທະຍາສາດ ແລະ ເຕັກໂນໂລຊີ ໃຫ້ແກ່ນ້ອງນ້ອຍເຍົາວະຊົນໄດ້ສຶກສາຮຽນຮູ້ ພ້ອມທັງເປັນການປູກຈິດສໍານຶກໃຫ້ເຍົາວະຊົນມີຄວາມມັກ-ຮັກ, ມີຄວາມໄຝ່ຝັນທີ່ຈະເປັນນັກວິທະຍາສາດ ແລະ ຊຸກຍູ້ສົ່ງເສີມໃຫ້ເຍົາວະຊົນມີຄວາມກ້າຫານ ເພື່ອສ້າງຕົນເອງໃຫ້ກາຍເປັນບຸກຄະລາກອນທີ່ເຂັ້ມແຂງໃຫ້ແກ່ການພັດທະນາເສດຖະກິດ-ສັງຄົມ ກໍຄືປະເທດຊາດໃນຕໍ່ໜ້າ.


ສໍາລັບເນື້ອໃນ ແລະ ຮູບແບບກິດຈະກໍາຂອງໂຄງການ ປະກອບມີ: ການບັນລະຍາຍ ແລະ ສາທິດທາງດ້ານວິທະຍາສາດ, ການປະດິດ, ວຽກງານດາລາສາດ, ນິເວດວິທະຍາ, ຮຽນຮູ້ການນໍາໃຊ້ແບບຮຽນເອເລັກໂຕຣນິກ, ການຮ່ວມກິດຈະກໍາຖາມ-ຕອບທາງດ້ານວິທະຍາສາດ ແລະ ອື່ນໆ… ຊຶ່ງເມື່ອບໍ່ດົນຜ່ານມານີ້, ທາງຄະນະຮັບຜິດຊອບໂຄງການກໍໄດ້ດໍາເນີນການທົດລອງຈັດກິດຈະກໍາດັ່ງກ່າວມາແລ້ວ 2 ຄັ້ງ ຄື: ຢູ່ໂຮງຮຽນປະຖົມສົມບູນສຶກສາ ດາຣາພອນ ແລະ ໂຮງຮຽນປະຖົມສົມບູນໂພນພະເນົາ, ນະຄອນຫຼວງວຽງຈັນ ໂດຍໄດ້ຮັບສຽງຕອບຮັບຈາກບັນດາຄູ-ອາຈານ ແລະ ນ້ອງນ້ອຍເຍົາວະຊົນເປັນຢ່າງດີ; ສະແດງອອກໄດ້ໃນການເຂົ້າຮ່ວມກິດຈະກໍາຖາມ-ຕອບ, ການຮ່ວມຮັບຟັງການບັນລະຍາຍ, ການສະເໜີ, ທົດລອງ, ການສະແດງແນວຄວາມຄິດຂອງເຍົາວະຊົນໃນກິດຈະກໍາ ຊຶ່ງເຕັມໄປດ້ວຍບັນຍາການຄຶກຄື້ນມ່ວນຊື່ນ ທັງໄດ້ສົ່ງຕໍ່ຄວາມຮູ້, ປະສົບການ ແລະ ຄວາມຄິດຢາກເປັນນັກຄົ້ນຄວ້າ-ນັກພັດທະນາໃນອະນາຄົດ.

 

ທີ່ມາ:ໜັງສືພິມ ວິທະຍາສາດ ແລະ ການພັດທະນາ