ສະເທືອນໃຈ! ລະເບີດບໍ່ທັນແຕກແຕ່ສະໄໝສົງຄາມ ພາກຊີວິດຄົນລາວໄປແລ້ວ 200ກວ່າຄົນ

ສະເທືອນໃຈ! ລະເບີດບໍ່ທັນແຕກແຕ່ສະໄໝສົງຄາມ ພາກຊີວິດຄົນລາວໄປແລ້ວ 200ກວ່າຄົນ

26th February 2020 2 By Education

ຮ່ອງຮອຍສະໄໝສົງຄາມທີ່ຍັງຫຼົງເຫຼືອໃຫ້ເຫັນໄດ້ຢ່າງຊັດເຈນແມ່ນລະເບີດທີ່ບໍ່ທັນແຕກ ເຊິ່ງມັນເປັນສິ່ງຢໍ້າເຕືອນເຖິງຄວາມເຈັບປວດທີ່ຄົນລາວເຄີຍພົບພໍ້ມາ ແລະ ຍັງຄົງມີມາຈົນຮອດປັດຈຸບັນ ພ້ອມນໍາມາສ້າງຄວາມສູນເສຍໃຫ້ແກ່ຄົນລາວ ເຖິງແມ່ນວ່າ ພາກສ່ວນກ່ຽວຂ້ອງຈະມີການກວດກາເກັບກູ້ໄປແລ້ວກໍ່ຕາມ ແຕ່ພາຍໃນເວລາ 24 ປີ ມັນຍັງພາກເອົາຊີວິດຄົນລາວໄປອີກ  251 ຄົນ ບາດເຈັບອີກ ເກືອບ 1.000ຄົນ.

ພາບປະກອບຂ່າວເທົ່ານັ້ນ

ກະຊວງແຮງງານ ແລະ ສະຫວັດດີການສັງຄົມໄດ້ແຈ້ງໃຫ້ຮູ້ວ່າ: ທົ່ວປະເທດມີເນື້ອທີ່ຕົກຄ້າງລະເບີດບໍ່ທັນແຕກແຕ່ສະໄໝສົງຄາມທັງໝົດ 87.000 ກິໂລຕາເເມັດ ຫຼື ຫຼາຍກວ່າ 8 ລ້ານ ເຮັກຕາ, ໃນນີ້ສາມາດຢືນຢັນພື້ນທີ່ມີລະເບີດສະເພາະລູກຫວ່ານໄດ້ທັງໝົດ 1 ແສນກວ່າ ເຮັກຕາ ແລະ ສາມາດເກັບກູ້ໄດ້ແລ້ວ 60.190 ເຮັກຕາ.

ແຕ່ກໍ່ຍັງມີອຸປະຕິເຫດທີ່ເກີດຈາກລະເບີດບໍ່ທັນແຕກຢູ່ທຸກໆປີເຊິ່ງໄລຍະພຽງ 24 ປີ ນັບແຕ່ ປີ 1996 ຫາ 2020 ມີຜູ້ໄດ້ຮັບບາດເຈັບຈາກລະເບີດບໍ່ທັນແຕກໃນທົ່ວປະເທດຈໍານວນທັງໝົດ 962 ຄົນ ແລະ ເສຍຊີວິດເຖິງ 251 ຄົນ.

ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວຢູ່ກອງປະຊຸມຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ປະຈໍາປີ 2019 ທີ່ໄດ້ຈັດຂຶ້ນມື້ເຊົ້ານີ້ ວັນທີ 25 ກຸມພາ 2020 ທີ່ນະຄອນຫຼວງວຽງຈັນ ໂດຍມີເນື້ອໃນບາງຕອນທີ່ສໍາຄັນວ່າ: ການກະກຽມການປະເມີນຜົນ ແລະ ການປັບປຸງແຜນຍຸດທະສາດແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ແມ່ນສອດຄ່ອງກັບຄາດໝາຍສູ້ຊົນ ແລະ ເປົ້າໝາຍພັດທະນາແບບຍືນຍົງ ປີ 2030 ໂດຍສະເພາະເປົ້າໝາຍເລກທີ 18 ໃນຂົງເຂດແກ້ໄຂລະເບີດບໍ່ທັນແຕກ ເຊິ່ງເປັນເປົ້າໝາຍທີ່ພົວພັນໂດຍກົງ ແລະ ປິ່ນອອ້ມກັບບັນດາ 17 ເປົ້າໝາຍຕາມຄໍາເວົ້າທີ່ວ່າບໍ່ປະຖິ້ມຜູ້ໃດໄວ້ຢູ່ເບື້ອງຫຼັງ.

ທ່ານ  ຄໍາແພງ ໄຊສົມແພງ ຍັງກ່າວຕື່ມວ່າ: ນັບແຕ່ລັດຖະບານລາວໄດ້ສ້າງຕັ້ງຂະແໜງການແກ້ໄຂບັນຫາລະເບີດບໍ່ທັນແຕກໃນປີ 1996, ວຽກງານດັ່ງກ່າວໄດ້ມີຄວາມເຂັ້ມແຂງ ແລະ ເຕີບໃຫ່ຍຂະຫຍາຍຕົວຢ່າງບໍ່ຢຸດຢັ້ງອັນສໍາຄັນທີ່ສຸດໄດ້ເອົາໃຈໃສ່ຄວາມປອດໄພຂອງປະຊາຊົນຢູ່ແຕ່ລະທ້ອງຖິ່ນຈາກທີ່ພວກເຂົາໄດ້ນໍາໃຊ້ດິນທໍາການຜະລິດ.

ຂໍ້ມູນຈາກ: ຂ່າວສານແຮງງານ ແລະ ສະຫວັດດີການສັງຄົມ