ປະກາດເມືອງຈອມເພັດ ເປັນເມືອງຈົບຊັ້ນມັດທະຍົມຕົ້ນບໍາລຸງ

ປະກາດເມືອງຈອມເພັດ ເປັນເມືອງຈົບຊັ້ນມັດທະຍົມຕົ້ນບໍາລຸງ

27th February 2020 0 By Admin

ພິທີປະກາດເມືອງຈອມເພັດ ແຂວງຫຼວງພະບາງ ເປັນເມືອງຈົບຊັ້ນມັດທະຍົມຕົ້ນບໍາລຸງ ໄດ້ຈັດຂື້ນວັນທີ 27 ກຸມພາ 2020 ທີ່ສະໂມສອນໃຫຍ່ຂອງເມືອງ ໂດຍມີ ທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະກິລາ, ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ມີບັນດາເຈົ້າເມືອງ, ຮອງເຈົ້າເມືອງ,ຕາງໜ້າຫ້ອງການສຶກສາທິການ ແລະກິລາ 11 ແລະ 1 ນະຄອນ, ແຂກຮັບເຊີນ, ອົງການປົກຄອງບ້ານອ້ອມຂ້າງເມືອງ ພ້ອມດ້ວຍພະນັກງານຄູ-ອາຈານ ເຂົ້າຮ່ວມ.


ເມືອງຈອມເພັດ ຕັ້ງຢູ່ຝັ່ງຂວາແມ່ນໍ້າຂອງຕິດກັບ ນະຄອນ ຫຼວງພະບາງ, ມີເນື້ອທີ່ 1.267 ກວ່າກິໂລຕາແມັດ ມີ 11 ກຸ່ມພັດທະນາ ແລະ 69 ບ້ານ, ພົນລະເມືອງ 32.344 ຄົນ, ປະຊາຊົນມີອາຊີບປູກພືດກະສິກໍາ, ລ້ຽງສັດ ແລະ ຄ້າຂາຍ. ເສດຖະກິດຂະຫຍາຍຕົວໃນລະດັບ 8,1%ຕໍ່ປີ, ລວມຍອດຜະລິດຕະພັນພາຍໃນໄດ້ 240ຕື້ກວ່າກີບ, ສະເລ່ຍໃສ່ຄົນໜຶ່ງໄດ້ 7 ລ້ານກວ່າກີບຕໍ່ຄົນຕໍ່ປີ.


ທ່ານ ສາຍສະໝອນ ສາລີວົງ ຮັກສາການເຈົ້າເມືອງຈອມເພັດໄດ້ກ່າວວ່າ: ພາຍຫຼັງທີ່ໄດ້ປະກາດເປັນເມືອງຈົບຊັ້ນປະຖົມບໍາລຸງໃນປີ 2009 ເປັນຕົ້ນມາ ກໍ່ໄດ້ສຸມໃສ່ຈັດຕັ້ງການລົບລ້າງຄວາມບໍ່ຮູ້ໜັງສື, ບໍາລຸງຍົກລະດັບຊັ້ນປະຖົມ ແລະ ມັດທະຍົມຕອນຕົ້ນ ໃຫ້ແກ່ເດັກໃນເກນອາຍຸ 6-14ປີ ແລະປະຊາຊົນໃນເກນອາຍຸ 15-35ປີ, ໂດຍກໍານົດເອົາການສຶກສາພາກບັງຄັບຂອງລັດຖະບານວາງອອກ ເຮັດໃຫ້ປະຊາຊົນລະຫວ່າງອາຍຸ 15 ປີຂື້ນໄປຕ້ອງຈົບຊັ້ນມັດທະຍົມຕອນຕົ້ນ.
ປະຈຸບັນອັດຕາເຂົ້າຮຽນ ອາຍຸ 6-14 ປີ ບັນລຸ 99,30%, ການເຂົ້າຮຽນຊັ້ນປະຖົມ ທົ່ວເມືອງກວມ 100,57%,ຊັ້ນມັດທະຍົມຕອນຕົ້ນກວມ 76,65%, ເຊິ່ງຜົນການປະເມີນຂອງກົມສຶກສານອກໂຮງຮຽນ ກະຊວງສຶກສາທິການ ແລະ ກິລາສາມາດບັນລຸໄດ້ 95,12%, ເຫັນວ່າຜ່ານການປະເມີນ ແລະສາມາດປະກາດເປັນເມືອງຈົບການສຶກສາຊັ້ນມັດທະຍົມຕົ້ນບໍາລຸງໄດ້. ເຊິ່ງທົ່ວເມືອງມີໂຮງຮຽນມັດທະຍົມຕອນຕົ້ນ 4 ແຫ່ງ, ມີນັກຮຽນທັງໝົດ 367 ຄົນ, ຍິງ 184 ຄົນ, ມີຄູ 32 ຄົນ, ຍິງ 15 ຄົນ, ນອກນີ້ຍັງມີຄູອາສາສະໝັກ 29 ຄົນ, ຍິງ 16 ຄົນ, ອັດຕາປະລະການຮຽນ 13,68%, ຄ້າງຫ້ອງ 0,52%, ເລື່ອນຊັ້ນ-ຈົບຊັ້ນ 85,80% ແລະ ມັດທະຍົມສົມບູນ 3 ແຫ່ງ. ມີນັກຮຽນຊັ້ນ ມ.ປາຍ 1.916 ຄົນ, ຍິງ 947 ຄົນ, ຄູ 101 ຄົນ, ຍິງ 59 ຄົນ. ອັດຕາເຂົ້າຮຽນ 35,19%, ປະລະການຮຽນ 12,95%, ຄ້າງຫ້ອງ 0,85%, ເລື່ອນຊັ້ນ-ຈົບຊັ້ນ 86,20%.
ນອກນັ້ນກໍໄດ້ຈັດຕັ້ງການຮຽນ-ການສອນມັດທະຍົມຕົ້ນບໍາລຸງຢູ່ບັນດາບ້ານ, ກຸ່ມບ້ານ, ແຕ່ປີ 2010-2019 ມີກຸ່ມເປົ້າໝາຍຜູ້ເຂົ້າຮຽນ 1.034 ຄົນ, ຍິງ 510 ຄົນ, ສາມາດເສັງຈົບຊັ້ນມັດທະຍົມບໍາລຸງໄດ້ 980 ຄົນ, ຍິງ 488 ຄົນ, ເທົ່າກັບ 94,77% ຂອງເປົ້າໝາຍຜູ້ເຂົ້າຮຽນທັງໝົດ.


ໃນພິທີປະກາດເມືອງຈອມເພັດ ເປັນເມືອງຈົບຊັ້ນມັດທະຍົມຕົ້ນບໍາລຸງ ເທື່ອນີ້ ທ່ານ ບົວພັນ ອຸດົມສິນ ກໍ່ໄດ້ຜ່ານຂໍ້ຕົກລົງຂອງລັດຖະມົນຕີກະຊວງສຶກສາທິການ ແລະກິລາ ວ່າດ້ວຍການປະກາດເມືອງຈອມເພັດເປັນເມືອງຈົບຊັ້ນມັດທະຍົມຕອນຕົ້ນບໍາລຸງ ພ້ອມທັງຈັດພິທີປະກາດຢ່າງສົມກຽດ. ໃຫ້ກຽດມອບໃບຢັ້ງຢຶນໂດຍ ທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ຂື້ນຮັບແມ່ນ ທ່ານ ສາຍສະໝອນ ສີລາວົງ ຮັກສາການເຈົ້າເມືອງຈອມເພັດ. ຈາກນັ້ນ ທ່ານ ຮສ ປອ ກອງສີ ແສງມະນີ ກໍໄດ້ລັ່ນຄ້ອງ 9 ບາດ ປະກາດເມືອງຈອມເພັດ ເປັນເມືອງຈົບຊັ້ນມັດທະຍົມຕົ້ນບໍາລຸງ ຢ່າງເປັນທາງການ.
ໂອກາດນີ້ ຍັງໄດ້ຜ່ານຂໍ້ຕົກລົງຈາກກະຊວງສຶກສາທິການ ແລະ ກິລາ ແລະ ພະແນກສຶກສາທິການ ແລະ ກິລາແຂວງ ວ່າດ້ວຍການຍ້ອງຍໍບຸກຄົນດີເດັ່ນ ໃນການປະຕິບັດການຮຽນ-ການສອນ ນຳອີກ.

ຂ່າວ: ເພັດສາຄອນ ສິມມະວົງ,ຂ່າວສານຫລວງພະບາງ Luangprabang News