ກອງຮ້ອຍ 31 ທະຫານແຂວງບໍ່ແກ້ວ ສຳເລັດການອົບຮົມ-ຫັດແອບ

ກອງຮ້ອຍ 31 ທະຫານແຂວງບໍ່ແກ້ວ ສຳເລັດການອົບຮົມ-ຫັດແອບ

27th February 2020 0 By Admin

ວັນທີ 26 ກຸມພາ 2020 ນີ້, ກອງຮ້ອຍ 31 ໄດ້ສຳເລັດການຫັດແອບຍິງເປົ້າ ໝາຍດ້ວຍລູກປືນແທ້ ປະຈຳປີ 2019 ຂຶ້ນ, ຢູ່ທີ່ສະໝາມຍິງປືນໂຮງຮຽນການທະຫານທ້ອງຖິ່ນ ໂດຍການເຂົ້າຮ່ວມຂອງ ທ່ານ ສົມລິດ ສີພາວັນ ຮອງເລຂາພັກແຂວງ ປະທານສະພາປະຊາຊົນແຂວງບໍ່ແກ້ວ, ສະຫາຍ ພັນໂທ ບຸນມີ ພາມີໄຊ ຮອງເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ ແລະ ທ່ານ ຄຳແປງ ໄຈຍະສັກ ຄະນະປະຈຳພັກແຂວງ ເລຂາພັກເມືອງ ເຈົ້າເມືອງໆຫ້ວຍຊາຍ, ມີຄະນະພັກ-ຄະນະບັນຊາ 5 ຫ້ອງ, ພະແນກການກ້ຽວຂ້ອງ ຕະຫຼອດຮອດພະນັກງານ-ນັກຮົບ ທົ່ວກອງຮ້ອຍ 31 ເຂົ້າຮ່ວມ.


ການຈັດຕັ້ງອົບຮົມໃນຄັ້ງນີ້ກໍເພື່ອເຮັດ ໃຫ້ພະນັກງານ – ນັກຮົບມີຄວາມຮູ້, ຄວາມສາມາດ ທາງດ້ານການເມືອງ-ການທະຫານດ້ານວິຊາສະເພາະ-ເຕັກນິກ, ດ້ານສິລະປະຍຸດ-ຍຸດທະວິທີ, ດ້ານການຈັດຕັ້ງປະຕິບັດບັນດາຂໍ້ກຳນົດ ກົດລະບຽບຂອງກອງທັບໃຫ້ເຂັ້ມງວດ.

ຍົກສູງຄວາມຮູ້, ຄວາມສາມາດ ໃນການຊີ້ນຳ-ນຳພາຈັດຕັ້ງປະຕິບັດໜ້າທີ່ການເມືອງຂອງຕົນຢ່າງຄ່ອງແຄ້ວ ໃນເວລາສູ້ຮົບຕົວຈິງ ແລະ ເພື່ອເປັນບ່ອນອີງໃຫ້ແກ່ຄະນະພັກ – ຄະນະບັນຊາ ໃນການຕິດຕາມກວດກາ ແລະ ຕີລາຄາຄຸນນະພາບຂອງພະນັກ ງານ-ນັກຮົບ ພາຍໃນກົມກອງ, ພາຍຫຼັງສໍາເລັດບັ້ນເຝິກແອບຮໍ່າຮຽນແລ້ວ ຕ້ອງກຳແໜ້ນກ່ຽວກັບ ທິດສະດີ-ຫຼັກ ການ ເພື່ອໄປໝູນໃຊ້ເຂົ້າໃນໜ້າທີ່ວຽກງານຕົວຈິງຢູ່ກົມກອງໃຫ້ປະກົດຜົນເປັນຈິງ.

ຜ່ານການຈັດຕັ້ງປະຕິບັດຍິງລູກປືນແທ້ ປະຈຳປີ 2019 ຂອງກອງບັນຊາການທະຫານແຂວງບໍ່ແກ້ວ ສາມາດບັນລຸໄດ້ 100% ຕາມຄາດໝາຍທີ່ວາງໄວ້.

ໂດຍ: ວໍລະສິດ ພິດສະຫາຍ, ໜັງສືພິມບໍ່ແກ້ວ Bokeo Newspaper