ເຈົ້າແມ່ໄກ່ຕີ ເອົາດີດ້ານການລ້ຽງ ຈົນມີລາຍຮັບຫຼັກ20 ລ້ານຕໍ່ເດືອນ

ເຈົ້າແມ່ໄກ່ຕີ ເອົາດີດ້ານການລ້ຽງ ຈົນມີລາຍຮັບຫຼັກ20 ລ້ານຕໍ່ເດືອນ

28th February 2020 0 By Education

ນີ້ແລນໍທີ່ເພິ່ນວ່າ ທຸກອັນລ້ວນມີຂໍ້ດີຂອງມັນ, ຄົນມັກເກມຕ້ອງສຶກສາໃຫ້ທ່ອງແທ້ຈົນມີລາຍຮັບຈາກເກມ, ຄົນມັກໄກ່ຖ້າເອົາດີກັບໄກ່ຢ່າງວິຊາກໍ່ສາມາດມີລາຍຮັບລ້ຽງຊີວິດໄດ້ຈາກໄກ່ ດັ່ງສາວງາມລາຍນີ້.
ຈະເວົ້າໄປແລ້ວທຸກວົງການມີຊ່ອງທາງຂອງມັນ ໃນການສ້າງລາຍຮັບຈະຕ່າງກັນທີ່ມຸມມອງຂອງແຕ່ລະຄົນ ຕົວຢ່າງໄກ່ຕີກໍ່ມີເວດວົງຂອງເຂົາ ມີຫຼາຍຕໍ່ຫຼາຍຄົນທີ່ສາມາດສ້າງຖານະໄດ້ຈາກຄວາມມັກໄກ່ແລ້ວລ້ຽງເປັນທຸລະກິດ ສ້າງເງິນຈາກການຂາຍລູກໄກ່, ໄກ່ພໍ່ແມ່ພັນ ຫຼື ແມ່ນແຕ່ຂາຍໄຂ່ກໍ່ຍັງໄດ້ລາຄາແພງເລີຍ.


ມື້ນີ້ແອັດຈະນຳເອົາບຸກຄົນໆໜຶ່ງມາແນະນຳ ເປັນສາວໄທຈາກປະເທດເພື່ອນບ້ານເຮົານີ້ເອງ ສາວຄົນນີ້ຊື່ວ່າ ພະຣົມນັດ ປະຈຸບັນອາຍຸ 24 ປີ ແຕ່ລາວໄດ້ເລີ່ມລ້ຽງໄກ່ຕີມາແຕ່ອາຍຸ 21 ປີແລ້ວ, ເຊິ່ງອະດີດນາງເຮັດວຽກເປັນພະນັກງານປະຊາສຳພັນຢູ່ຮ້ານຟິດເນັດ ແຕ່ດ້ວຍຄວາມມັກໄກ່ ສາວພະຣົມນັດໄດ້ຢຸດຈາກການມີວຽກປະຈຳມາລ້ຽງໄກ່ຕີສາຍພັນພະມ້າຈົນໄດ້ດີເລີ່ມມີຊື່ສຽງເປັນທີ່ຮູ້ຈັກຫຼາຍຂຶ້ນຂອງເຫຼົ່າຄົນມັກໄກ່ ຈົນມີລາຍໄດ້ຫຼັກ 20.000-100.000 ບາດ(ປະມານ 5-20 ລ້ານກີບ)ຕໍ່ເດືອນ.

ສາວພະຣົມນັດເລົ່າວ່າ: ກ່ອນທີ່ຈະມາລ້ຽງໄກ່ຢ່າງຈີງຈັງກໍ່ຍ້ອນຕົນມີຄວາມຕິດພັນກັບການລ້ຽງໄກ່ມາແຕ່ນ້ອຍ ເນື່ອງຈາກຊຸມຊົນຂອງຕົນມັກລ້ຽງໄກ່ຕີຢູ່ແລ້ວ ແລະຄອບຄົວພໍ່ແມ່ກໍ່ລ້ຽງ ແລະຕົນເອງຖືກພໍ່ໃຊ້ໃຫ້ໄປເກືອໄກ່ຕະຫຼອດ ຈົນຮູ້ສຶກຕິດພັນກັບໄກ່ມາແຕ່ນ້ອຍ.


ພໍຮຽນຈົບຊັ້ນສູງໃນສາຂາເລຂານຸການກໍ່ມາເປັນພະນັກງານຕ້ອນຮັບໃນຮ້ານຟິດເນັດໄດ້ຄ່າແຮງງານມື້ລະ 300 ບາດ ຕໍ່ມາກໍ່ປ່ຽນມາເປັນພະນັກງານຮ້ານກາເຟໄດ້ປະມານ 1 ປີ ລາຍໄດ້ກໍ່ໄລ່ເລ່ຍກັນ ແຕ່ສຸດທ້າຍກໍ່ຕັດສິນໃຈລາອອກ ເພາະບໍແມ່ນງານທີ່ຖະໜັດ ຈີງໆແລ້ວຕົນເອງມີຄວາມມັກຮັກໃນການລ້ຽງໄກ່ຕີ.


ສຸດທ້າຍຈິ່ງຕັດສິນໃຈອອກວຽກມາລ້ຽງໄກ່ຈີງຈັງ ລ້ຽງຢ່າງຖະໜຸຖະໜອມ ໂດຍມີລຸງທີ່ຮູ້ຈັກຄອຍໃຫ້ຄຳແນະນຳນັບແຕ່ການໃຫ້ນ້ຳ, ເຊັດຕົວ ແລະການຝຶກໄກ່ຕີ, ພໍໄກ່ໃຫຍ່ມາໜ້ອຍໜຶ່ງກໍ່ເອົາໄກ່ໄປລອງຂຶ້ນສັງວຽນ.


ປະກົດວ່າເອົາໄກ່ໄປຂຶ້ນສັງວຽນຄັ້ງທຳອິດໄດ້ໄຊຊະນະກັບມາພ້ອມເງິນ 3.300 ບາດ ຮູ້ສຶກດີໃຈແຮງ ກັບຄືຍມາຍິ່ງຕ້ອງມຸກມົ່ນກັບໄກ່ຕີຫຼາຍຂຶ້ນກວ່າເດີມ ສັງລວມມາຮອດປະຈຸບັນກໍ່ໄດ້ 3 ປີແລ້ວທີ່ໄດ້ເກັບກ່ຽວປະສົບການມາ ແລະມີການລົງສະໜາມຫຼາຍຂຶ້ນຈົນຄັ້ງຫຼ້າສຸດໄດ້ເງິນລາງວັນມາ 440.000 ບາດ.

ສ່ວນພັນໄກ່ທີ່ນຳມາລ້ຽງກໍ່ມີຫຼາຍຂຶ້ນມີທັງໄກ່ພະມ້າ, ໄກ່ໄຊງ່ອນ ສາມາດສົ່ງຂາຍທັງພາຍໃນ ແລະຕ່າງປະເທດ ໃນລາຄາເລີ່ມຕົ້ນໂຕລະ 1.500 ບາດ, ຖ້າສົ່ງຂາຍຕ່າງປະເທດກໍ່ເລີ່ມຕົ້ນໂຕລະ 6.000 ບາດ ເຮັດໃຫ້ແຕ່ລະເດືອນມີລາຍໄດ້ບໍ່ຕ່ຳກວ່າ 20.000-100.000 ບາດ.