ຄະນະສະເພາະກິດປະຊຸມດ່ວນຫຼັງພົບຕິດເຊື້ອພ້ອມກັນ 37 ຄົນ

ຄະນະສະເພາະກິດປະຊຸມດ່ວນຫຼັງພົບຕິດເຊື້ອພ້ອມກັນ 37 ຄົນ

12th September 2021 0 By Education

ພະຍາດລະບາດໂຄວິດ-19 ມັກຈະມາແບບບໍ່ໃຫ້ສຸ່ມໃຫ້ສຽງ ຫຼວງພະບາງເປັນແຂວງໜຶ່ງທີ່ມີຄວາມລະມັດລະວັງສູງຫຼາຍໃນການເຝົ້າລະວັງ ແຕ່ດ້ວຍຊີວິດການເປັນຢູ່ທີ່ຕ້ອງໄປມາຫາສູ່ພົວພັນໃນສັງຄົມ ເຮັດໃຫ້ຫຼວງພະບາງພົບຜູ້ຕິດເຊື້ອຢ່າງຕໍ່ເນື່ອງມາ ຫຼ້າສຸດໃນວັນທີ 11 ກັນຍານີ້ພົບຜູ້ຕິດເຊື້ອໃໝ່ 37 ຄົນໃນນັ້ນ ຕິດເຊື້ອໃນຊຸມຊົນ 34 ຄົນ  ເພື່ອເປັນການຄວບຄຸມການລະບາດຂອງພະຍາດໂຄວິດບໍ່ໃຫ້ລຸກລາມສູ່ວົງກວ້າງ ຄະນະສະເພາະກິດ ແຂວງຫລວງພະບາງ ປະຊຸມດ່ວນເພື່ອປຶກສາຫາລື ເພີ່ມມາດຕະການການຄວບຄຸມ ຕໍ່ເຊື້ອພະຍາດອັກເສບປອດ.

ສູນປະຕິບັດງານ ຄະນະສະເພາະກິດ ຄວບຄຸມ ໂຄວິດ-19 ແຂວງຫຼວງພະບາງ ໄດ້ເປີດກອງປະຊຸມປຶກສາຫາລືຮີບດ່ວນ ກ່ຽວກັບການຄວບຄຸມການແຜ່ລະບາດໂຄວິດ-19 ທີ່ມີຜູ້ຕິດເຊື່ອໃນຊຸມຊົມ ນະຄອນ-ຫລວງພະບາງ ໃນວັນທີ 11 ກັນຍາ 2021 ນີ້ ໂດຍການເປັນປະທານ ຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງ ຫົວຫນ້າຄະນະສະເພາະກິດຄວບຄຸມ ໂຄວິດ-19 ຂັ້ນແຂວງຫລວງພະບາງ, ມີຄະນະສະເພາະກິດຂັ້ນແຂວງ ແລະ ນະຄອນ-ຫລວງພະບາງ ເຂົ້າຮ່ວມ.


ທ່ານ ບຸນເລື່ອມ ມະນີວົງ ຫົວຫນ້າຄະນະສະເພາະກິດຄວບຄຸມຂັ້ນແຂວງ ໄດ້ຊີ້ນຳໃຫ້ເພິ່ມມາດຕະການຄວບຄຸມ ການແຜ່ລະບາດຂອງພະຍາດ ໂຄວິດ-19 ຢູ່ແຂວງຫຼວງພະບາງ, ໂດຍສຸມໃສ່ຂອດບໍລິການຈັດການຢູ່ສູນກັກກັນ, ກວດກາກັ່ນຕອງ, ປັບປຸງບຸກຄະລາກອນຜູ້ຮັບຜິດຊອບໃນສູນ, ປັບປຸງລະບຽບການ, ການຈັດສັນງົບປະມານສຳລັບຜູ້ກັກກັນ, ການແຕ່ງຕັ້ງບຸກຄະລາກອນຊ່ວຍວຽກ, ການກະກຽມໂຮງໝໍພາກສະໜາມ ເມືອງນ້ຳບາກ ແລະສະໜາມບິນ, ພົວພັນກັບສູນກາງເພື່ອຂໍໂຈ໊ະການນຳເຂົ້າແຮງງານຊົ່ວຄາວ ເພື່ອກຽມພື້ນທີ່ຮອງຮັບ, ໃຫ້ 2ກຳລັງເດັດຂາດໃນການກວດກາຄົນເຂົ້າ-ອອກ, ໃຫ້ເພີ່ມການໂຄສະນາຊີ້ແຈງຜ່ານທາງໂທລະພາບ ແລະສື່ຕ່າງໆ ເປັນປົກກະຕິ ແລະໃຫ້ມີການປະຈຳການຫ້ອງສະເພາະກິດເພື່ອລາຍງານສ່ອງແສງ, ການຈັດຊື້ຕຽງນອນເພີ່ມເຕີມ, ໃຫ້ເຈົ້າໜ້າທີ່ພະນັກງານປະຈຳສູນ ເຂັ້ມງວດປ້ອງກັນຕົນເອງ, ຈຳກັດຜູ້ນຳສົ່ງອາຫານໃຫ້ຜູ້ທີ່ຖືກກັກກັນຢູ່ສູນ ແລະຈຳກັດການເດີນທາງເຂົ້າ-ອອກ ຖ້າບໍ່ຈຳເປັນ.


ພ້ອມນີ້ທ່ານໄດ້ຍົກບັນຫາທີ່ສໍາຄັນຄົ້ນຄວ້າ ກ່ຽວກັບການເຝົ້າລະວັງຕອບໂຕ້ບັນຫາທີ່ເກີດຂຶ້ນໃນນະຄອນ-ຫລວງພະບາງ ທີ່ເກີດມີການຕິດເຊື້ອໂຄວິດ-19 ຢູ່ຊຸມຊົນເປັນຈໍານວນຫລາຍ, ຫ້າມບໍ່ໃຫ້ເດີນທາງໄປຕ່າງແຂວງເດັດຂາດ, ເລັ່ງໃສ່ການກວດກາຊອກຫາທາມລາຍຜູ້ທີ່ໃກ້ສິດສໍາພັດກັບຜູ້ຕິດເຊື້ອເປັນບູລິດມະສິດຮິບດ່ວນສໍາຄັນ, ສຸມໃສການປິ່ນປົວຜູ້ທີ່ຕິດເຊື້ອ, ກະກຽມທິມງານຄະນະສະເພາະກິດຂັ້ນແຂວງ, ທິມງານແພດໝໍໂຮງໝໍແຂວງລົງຊ່ວຍ, ການກະກຽມສະຖານທີ່ຮອງຮັບຜູ້ທີ່ສໍາພັດໃກ້ສິດ, ວາງວຽກງານຄວບຄຸມຮອບດ້ານເພື່ອກະກຽມຮັບມືກັບການແຜ່ລະບາດໃນຮອບນີ້, ໃຫ້ເພີ່ມມາດຕະການປະຕິບັດຄໍາສັ່ງຂອງຄະນະສະເພາະຂັ້ນສູນກາງ ແລະຂັ້ນແຂວງ, ຂັ້ນເມືອງ, ຂັ້ນບ້ານ,ເພື່ອຄວບຄຸມໃຫ້ຫຼຸດລົງບໍ່ໃຫ້ແຜ່ໄປໃນເຂດອື່ນໆ.

ຂ່າວ: ຈໍາປາ​ ເພັດດາວັນ