ໂຫດຮ້າຍ ພາຍຸໂກນເຊີນ 100 ກວ່າຄົນຢູ່ສາລະວັນຂາດທີ່ຢູ່ອາໄສ

ໂຫດຮ້າຍ ພາຍຸໂກນເຊີນ 100 ກວ່າຄົນຢູ່ສາລະວັນຂາດທີ່ຢູ່ອາໄສ

12th September 2021 0 By Education

ດັ່ງທີ່ໄດ້ແຈ້ງເຕືອນໄປແລ້ວພາຍຸໂກນເຊີນກຳລັງປອງມາໃສ່ປະເທດລາວ ເຊິ່ງໄລຍະພັດມາແຕ່ທະເລຈີນໃຕ້ໃຊ້ເວລາຫຼາຍວັນ ແຕ່ໄດ້ກາຍເປັນພາຍຸເດເປຼຊັ່ນແລ້ວຄວາມແຮງຍັງບໍ່ຄ່ອຍເລີຍ ວານນີ້ລົງສາລະວັນເສຍຫາຍໜັກໜ່ວງ ໜ້າເສົ້າສຸດພາກເອົາ1 ຊີວິດໄປຢ່າງຊ່ວຍຫຍັງບໍ່ທັນ.

ຕາມຂ່າວທ້ອງຖິ່ນລາຍງານວ່າ: ເວລາປະມານ 18:00 ແລງ ວັນທີ 11 ກັນຍາ 2021 ເກີດເຫດມີລົມພະຍຸເຂດຮ້ອນ ໂກນເຊີນ ຜັດຜ່ານແຂວງສາລະວັນ ເຮັດໃຫ້ເຮືອນຂອງພໍ່ແມ່ປະຊາຊົນ ບ້ານໂພນໃຜ່ ເມືອງ ແລະແຂວງສາລະວັນ ໄດ້ຮັບຜົນເສຍຫາຍ ມີເຮືອນລົ້ມ, ຫຼັງຄາເລີກ ມີຈຳນວນ 75 ຫຼັງຄາເຮືອນ .

ໃນນັ້ນເສຍຫາຍໜັກຈຳນວນ 20 ຫຼັງຄາເຮືອນ, ເສຍຫາຍປານກາງ 45 ຫຼັງຄາເຮືອນ ແລະເສຍຫາຍເລັກນ້ອຍ 10 ຫຼັງຄາເຮືອນ, ເຮັດໃຫ້1 ຄົນເຖິງແກ່ຊີວິດ ເປັນເພດຍິງ ອາຍຸ 50 ກວ່າປີ, ບາດເຈັບສາຫັດ 02 ຄົນ ແລະບາດເລັກນ້ອຍ 06 ຄົນ ແລະປະຈຸບັນລວມ 139 ຄົນ ຂາດທີ່ຢູ່ອາໄສ.


ທ່ານ ພິດສະໄໝ ເຂັມວິໄລ ຮອງເລຂາພັກເມືອງໆສາລະວັນ ໄດ້ໃຫ້ສຳພາດໃນຕອນເຊົ້າຂອງວັນ 12 ກັນຍາ 2021 ວ່າ: ປັດຈຸບັນອຳນາດການປົກຄອງແຂວງ ແລະ ເມືອງ ໄດ້ມີການຄົ້ນຄວ້າ, ແຕ່ງຕັ້ງຄະນະຮັບຜິດຊອບລົງຊ່ວຍເຫຼືອພໍ່ແມ່ປະຊາຊົນ, ຈັດຫາທີ່ພັກພາອາໄສເປັນການຄົ່ວຄາວ ແລະຈັດວາງກຳລັງປ້ອງກັນຊາດ-ປ້ອງກັນຄວາມສະຫງົບ ເຂົ້າຊ່ວຍເຫຼືອສ້ອມແປງເຮືອນໃຫ້ພໍ່ແມ່ປະຊາຊົນຢ່າງຮີບດ່ວນ.

ໃນໂອກາດດຽວກັນນັ້ນຫ້ອງການສະພາປະຊາຊົນແຂວງສາລະວັນ ກໍ່ໄດ້ນຳເອົາເຂົ້າສານ(ໜຽວ) ຈຳນວນ 01 ໂຕນ ມອບໃຫ້ກັບອຳນາດການປົກຄອງບ້ານໂພນໃຜ່ແລ້ວ ເປັນການບັນເທົາໃນເບື້ອງຕົ້ນ.