ເມືອງທ່າແຕງວາງ 7 ມາດຕະການເພື່ອພັດທະນາເສດຖະກິດ-ສັງຄົມໃຫ້ບັນລຸເປົ້າໝາຍ

ເມືອງທ່າແຕງວາງ 7 ມາດຕະການເພື່ອພັດທະນາເສດຖະກິດ-ສັງຄົມໃຫ້ບັນລຸເປົ້າໝາຍ

2nd March 2020 0 By Entertain

ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຢູ່ເມືອງທ່າແຕງ ແຂວງເຊກອງ ປີ 2020 ນີ້ຈະໃຫ້ບັນລຸຕາມເປົ້າໝາຍ ໂດຍເລັ່ງໃສ່ການຜະລິດກະສິກຳ,ອຸດສະຫະກຳ-ຫັດຖະກຳ ເປັນສິນຄ້າ ແລະ ການບໍລິການໃຫ້ມີການຂະຫຍາຍຕົວດີຂຶ້ນເປັນກ້າວໆ.

ທ່ານ ແສງສຸບັນ ໄຊສະຫັວນ ຄະນະປະຈຳພັກເມືອງທ່າແຕງກ່າວຢືນຢັນຕໍ່ກອງປະຊຸມສະຫຼຸບວຽກງານການເງິນປະຈຳປີ 2019 ຢູ່ສະໂມສອນຂອງເມືອງໃນວັນທີ 28 ກຸມພາ 2020ນີ້ວ່າ: ເພື່ອເຮັດໃຫ້ແຜນພັດທະນາເສດຖະກິດ-ສັງຄົມຂອງເມືອງມີບາດກ້າວຂະຫຍາຍຕົວເພີ່ມຂຶ້ນຕໍ່ເນື່ອງໃນລະດັບ 8,5 – 9% ໂດຍເຮັດໃຫ້ມູນຄ່າລວມຍອດລາຍຮັບພາຍໃນບັນລຸ 894,60 ຕື້ກີບ ແມ່ນອີງໃສ່ 3 ຂະແໜງເປັນເສົາຄໍ້າໂດຍສະເພາະ

ກະສິກຳ ແລະ ປ່າໄມ້ໃຫ້ໄດ້ 319,57 ຕື້ກີບ,ອຸດສະຫະກຳ 283,54 ຕື້ກີບ ແລະ ການບໍລິການໃຫ້ໄດ້ 291,48 ຕື້ກີບ ເຊິ່ງຈະເລັ່ງໃສ່ 7 ມາດຕະການໃຫ້ເປັນຮູບປະທຳຫຼາຍຂຶ້ນໂດຍເປັນເຈົ້າການຫັນເອົາເນື້ອໃນແຜນພັດທະນາເສດຖະກິດ-ສັງຄົມ 5 ປີແຫ່ງລັດຄັ້ງທີ 8 ແລະ ມະຕິທີ່ສຳຄັນຂອງພັກໃຫ້ກາຍເປັນແຜນງານ,ໂຄງການລະອຽດ ຂະນະດຽວກັນກໍຕ້ອງຮັກສາໃຫ້ໄດ້ສະຖຽນລະພາບທາງດ້ານການເມືອງ,ຄວາມສະຫົງບ,ຄວາມເປັນລະບຽບໃນສັງຄົມ,ເຮັດໃຫ້ສັງຄົມມີຄວາມຍຸຕິທຳ, ນອກຈາກນີ້ຕ້ອງເອົາໃຈໃສ່ເພີ່ມທະວີການຄຸ້ມຄອງໂຄງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດໃຫ້ໄປຕາມກົດໝາຍ, ສ້າງບຸກຄະລາກອນປະເພດ:

ກໍາມະກອນວິຊາຊີບ,ນາຍຊ່າງ,ນັກວິຊາການ,ວິສະວະກອນ,ຜູ້ຄຸ້ມຄອງ-ຜູ້ບໍລິຫານ ແລະ ຜູ້ຈັດການໃຫ້ໄດ້ທັງປະລິມານ ແລະ ຄຸນນະພາບ,ປັບປຸງກົນໄລະບອບປະສານງານ ແລະ ຊຸກຍູ້ສົ່ງເສີມທຸກພາກສ່ວນທີ່ລົງທຶນພາຍໃນເມືອງ ແລະ ສ້າງຄວາມໝັ້ນໃຈໃຫ້ນັກລົງທຶນ,

ເພີ່ມທະວີການຮ່ວມມືສາກົນເພື່ອນມິດຍຸດທະສາດ ເພື່ອດຶງດູດການຊ່ວຍເຫຼືອລ້າຈາກອົງການຈັດຕັ້ງສາກົນ ໂດຍສ້າງໃຫ້ໂຄງປະກອບເສດຖະກິດຫັນໄປຕາມທິດອຸດສະຫະກຳ ແລະ ທັນສະໄໝໄປຄຽງຄູ່ກັບການປັບປຸງອຳນາດລັດໃຫ້ມີປະສິດທິພາບ, ມີຄວາມສັກສິດ, ປອດໃສ ແລະ ຮັບໃຊ້ປະຊາຊົນຢ່າງແທ້ຈິງໂດຍມີອົງຈັກການຈັດຕັ້ງທີ່ສົມຄູ່, ກະທັດຮັດສົມເຫດສົມຜົນ,ເດັດດ່ຽວກໍາຈັດປັດເປົ່າພະຍາດອາດຍາສິດ, ສໍ້ລາດບັງຫຼວງ

ລວມໄປເຖິງປະກົດການຫໍ້ຍທໍ້ຕ່າງໆຂອງກົງຈັກລັດ ແລະ ສັງຄົມຢ່າງເຂັ້ມງວດ.

ຂ່າວ: ສະຫຍາມ ຈັນທະສອນ 030 5436832 – 020 55175490

.