ຮີດ 12 ບຸນ​ເດືອນ 10 ເພັງ “ບຸນ​ຫໍ່​ເຂົ້າ​ສະຫຼາກ”

ຮີດ 12 ບຸນ​ເດືອນ 10 ເພັງ “ບຸນ​ຫໍ່​ເຂົ້າ​ສະຫຼາກ”

21st September 2021 0 By Entertain

ບຸນເຂົ້າສະຫລາກ ແມ່ນບຸນເດືອນສິບ ເປັນໜຶ່ງໃນຮີດ 12 ປະເພນີຂອງຄົນລາວ ທີ່ເຄີຍປະຕິບັດກັນມາແຕ່ບັນພະບຸຣຸດ
ບຸນເຂົ້າສະຫລາກແມ່ນມີຄວາມໝາຍ ເຮັດບຸນເຖິງບັນພະຊົນຜູ້ທີລ່ວງລັບດັບຂັນໄປແລ້ວ ໂດຍໃຫ້ພຣະສົງ-ສາມະເນນແລະຜູ້ຊົງສິນທັງຫລາຍ ພາຍໃນວັດໄດ້ຈັບສະຫລາກ ຮັບເຄື່ອງຍະທານ ປັດໄຈ ອາຫານຄາວ-ຫວານແລະເຄື່ອງອຸປະໂພກ-ບໍລິໂພກ ຕ່າງໆ ທີ່ນໍາມາຖວາຍ

ເຊິ່ງຄວາມເປັນມາ ເພື່ອເຮັດໃຫ້ເຂົ້າໃນນາທີ່ປັກດຳໄປນັ້ນ ໃຫ້ມີຄວາມຂຽວ ແລະ ງອກງາມ ແລະ ອອກເມັດຜົນບໍລິບູນ ແລະ ເປັນການອຸທິດສ່ວນບຸນ ສ່ວນກຸສົນ ໃຫ້ແກ່ຍາດພີ່ນ້ອງ ບັນພະບູຣຸດ ຜູ້ທີ່ດັບຂັນລ່ວງລັບໄປແລ້ວ
ໃນສະໄຫມໜຶ່ງພຣະສັມມາສັມພຸທທະເຈົ້າ ໄດ້ສະເດັດໄປເມືອງພາລານະສີ ຊົມພູທະວີໃນຄາວພຸທທະການນັ້ນ ໄດ້ມີບຸຣຸດຜູ້ທຸກຢາກ-ເຂັນໃຈ ພາພັນລະຍາປະກອບອາຊີບຕັດຟືນຂາຍເປັນອາຊີບຫລັກ ສອງຜົວເມຍນີ້ ເປັນຄົນມີສັດທາ ເຫລື້ອມໄສຕໍ່ພຣະພຸທທະສາດສະໜາຢ່າງແຮງກ້າ ວັນໜຶ່ງສາມີໄດ້ປຶກສາກັບພັນລະຍາວ່າ ເຮົາທຸກຍາກໃນປັດຈຸບັນນີ້ ເພາະເຮົາບໍ່ເຄີຍເຮັດບຸນໃຫ້ທານຮັກສາສີລທັມຈັກເທື່ອເລີຍ

ດັ່ງນັ້ນ ພວກເຮົາຄວນເຮັດບຸນກັນເຖາະ ອັນຈະເປັນທີ່ເພີ່ງໃນຊາດຂ້າງໜ້າ ໃນເມື່ອພັນລະຍາໄດ້ຍິນຄຳນີ້ແລ້ວ ກໍໄດ້ຍິນດີນຳສາມີຕົນ ໃນວັນນັ້ນ ພວກເຂົາສອງຄົນກໍ່ໄດ້ເຂົ້າປ່າເກັບຜັກ ຫັກຟືນໄປຂາຍໄດ້ເງິນ-ຄຳ ແລ້ວ ໄດ້ນຳໄປຊື້ໝໍ້ເຂົ້າ ແລະໝໍ້ແກງ ໜຶ່ງໝໍ້ ອ້ອຍສີ່ລຳ ກ້ວຍສີ່ໜ່ວຍ ແລ້ວນຳມາຈັດແຈງຮຽບຮ້ອຍ ຫລັງຈາກນັ້ນກໍ່ນຳເຂົ້າປາອາຫານໄປວັດ ເພື່ອຖວາຍເປັນສະຫລາກກະພັດ ພ້ອມດ້ວຍອຸປະສົກ-ອຸປະສິກາ ຄົນອື່ນໆ,

ສາມີພັນລະຍາຄູ່ນັ້ນໄດ້ຈັບສະຫລາກຖືກພຣະພິກຂຸອົງໜຶ່ງ ແລ້ວມີໃຈຍິນດີ ແລ້ວຈິງນ້ອມເຄື່ອງໄທຍະທານຂອງຕົນເຂົ້າໄປຖວາຍ ຈາກນັ້ນແລ້ວໄດ້ຍາດນ້ຳອຸທິດສ່ວນບຸນກຸສົນ ເຂົາທັ້ງສອງໄດ້ປາຖະໜາວ່າ ດ້ວຍຜົນບຸນການໃຫ້ທານນີ້ຂໍໃຫ້ຂ້າພະເຈົ້າເກີດໃນພົບຊາດໃດໆ ຂື້ນຊື່ວ່າຄວາມຍາກຈົນເຂັນໃຈ ໄຮ້ຊັບສິນເໝືອນດັ່ງໃນຊາດນີ້ ຂໍຢ່າໃຫ້ມີແກ່ຂ້າພະເຈົ້າເລີຍ ຂໍໃຫ້ຂ້າພະເຈົ້າເປັນຜູ້ມັ່ງມີ ສົມບູນໄປດ້ວຍຊັບ ທັງເງີນ-ຄຳ ໃນປາຣະພົບຊາດໜ້າດ້ວຍເຖີດ ດັ່ງນີ້

ຢູ່ຕໍ່ມາສາມີ ພັນລະຍາຄູ່ນັ້ນກໍໄດ້ໝົດອາຍຸໄຂ ໄດ້ສິ້ນຊີວິດຈາກໂລກນີ້ໄປ ດ້ວຍອະນິສົງແຫ່ງສະຫລາກກະພັດຕາຫານ ຈິງໄດ້ໄປເກີດເປັນເທບພຣະບຸຕ ເທບພະທິດາ ໃນສະຫວັນຊັ້ນດາວະດຶງ ສະຫວີຍສົມບັດທິບ ຢູ່ໃນວິມານຄຳ ອັນບໍຣິສຸດ-ຜຸດຜ່ອງງົດງາມຕະການຕາ ແລະພຽບພ້ອມໄປດ້ວຍນາງເທບພະອັກສອນ ອ້ອມລ້ອມເປັນບໍຣິວານ ເຊີ່ງມີນາມບັນຫານວ່າ ສະຫລາກພັດຕະເທບພະບຸດ ເທບພະທິດາ

ການເວລາຜ່ານໄປ ໃນເມື່ອເທບພະບຸດ ເທບພະທິດາ ທັ້ງສອງໄດ້ໝົດບຸນຈາກສະຫວັນ ແລ້ວກໍໄດ້ລົງມາເກີດເປັນກະສັດໃນເມືອງພາລານະສີ ມີພະນາມວ່າ ພະເຈົ້າສັດທາດິດ ມີຣາຊສົມບັດຢູ່ 84,000 ປີ ຕໍ່ມາກະສັດອົງນີ້ໄດ້ເບື່ອໜ່າຍທາງໂລກກໍ່ໄດ້ສະເດັດອອກບັນພະຊາ (ບວດ) ຕໍ່ມາໄດ້ມໍຣະພາບລົງ ກໍໄດ້ໄປຈຸຕິເກີດຢູ່ຊັ້ນພົມມະໂລກ ແລະຕໍ່ມາກໍໄດ້ເປັນພຣະສັມມາສັມພຸດທະເຈົ້າ ໂຄຕຕະໂມ ເຮົານັ້ນເອງ
ນີ້ຄືອະນິສົງແຫ່ງການຖວາຍສະຫລາກກະພັດ ນັບວ່າມີຄວາມຍິ່ງໃຫຍ່ໄພສານ ສາມາດອຳນວຍຄວາມສຸຂສະຫວັດ ແກ່ຜູ້ບຳເພັນທັ້ງຊາດທີ່ເປັນມະນຸດ ແລະຢູ່ສະຫວັນ ໃນທີ່ສຸດກໍ່ສາມາດເປັນມະຫາບູຣຸດມີພຣະນາມວ່າ ພຣະສັມມາສັມພຸທທະເຈົ້າໄດ້.

ພິທີ

.

ເມື່ອເຖິງວັນຂື້ນ 14 ຄ່ຳເດືອນ 10 ຂອງທຸກໆປີ ພຸດທະສາສະນິກກະຊົນ ຈະກຽມອາຫານຄາວຫວານ ແລະໝາກພູພໍເຖິງວັນ 15 ຄ່ຳ ເດືອນ 10 ພຸທທະສາສະນິກກະຊົນ ຈະພາກັນເຮັດບຸນໃສ່ບາດຢູ່ທີ່ວັດຕ່າງໆ ເຄື່ອງໄທຍະທານທີ່ພຸທທະສາສະນິກກະຊົນນຳເອົາໄປບູຊາຜີບັນພະບຸຣຸດມີ ດັ່ງນີ້
1 ເຂົ້າໜ້ຽວ, ຊີ້ນປາ, ຊີ້ນໄກ່, ໝູ ແລະໃສ່ລົງໄປໃນກວາຍສະຫລາກ ສິ່ງລະເລັກ ລະນ້ອຍ ຖືວ່າເປັນອາຫານຄາວ.
2 ໝາກໄມ້, ໝາກແຕງ, ໝາກຫຸ່ງ, ໝາກໂມ….. ແລະຂອງຫວານ ຖືວ່າເປັນອາຫານ ຫວານ

.

ຫລັງຈານນັ້ນ ໄດ້ນຳອາຫານທີ່ກຽມໄວ້ ຫໍ່ເປັນຄູ່ໆ ນຳມາຜູກກັນເປັນພວງ ແລ້ວແຕ່ຈະໃສ່ຈັກຫໍ່ຕາມຄວາມເຫມາະສົມ ແຕ່ສ່ວນຫລາຍຈະໃສ່ 10 ຄູ່ແລ້ວນຳໄປລ້ຽງ ຜີຕາແຮກ ທີ່ນາຂອງຕົນເອງດ້ວຍ ໂດຍມີຄວາມເຊື່ອວ່າ ຈະເຮັດໃຫ້ຜີຕາແຮກພໍໃຈ ແລະເຮັດໃຫ້ຜີຮັກສາ ດູແລເຂົ້າກ້າໃນນາ ໃຫ້ມີຄວາມງອກງາມສົມບູນ ຕະຫລອດຈົນຂັບໄລ່ສັດຕູພຶດພັນຕ່າງ ເຊັ່ນ: ນົກ, ໜູ ,ປູນາ,… ບໍ່ໃຫ້ມາທຳລາຍຕົ້ນເຂົ້າໃນນາ ເມື່ອນຳອາຫານມາເຖິງສາລາວັດທີ່ຈະເຮັດບຸນແລ້ວ ຂຽນກໍ່ໄດ້ຈົກສະຫລາກ ຄົນໄດຖືກຊື່ພະອົງໄດກະເອົາເຄື່ອງໄທຍະທານໄປຖວາຍອົງນັ້ນ

.

ຈາກນັ້ນ ພຣະສົງ-ສາມະເນນ ໄດ້ຮັບປັດໄຈໄທຍະທານຮຽບຮ້ອຍແລ້ວ ກໍອະນຸໂມທະນາບຸນ ແລະໃຫ້ສີນໃຫ້ພອນ ແລະແຜ່ເມດຕາບຸນກຸສົນທີໄດ້ຖວາຍທານນັ້ນໃຫ້ ແມ່ອອກ-ພໍ່ອອກ ກໍ່ຢາດນ້ຳ ອຸທິດສ່ວນບຸນສ່ວນກຸສົນທີ່ຕົນເຮັດໄປໃຫ້ຍາດຕິພີ່ນ້ອງ ຜູ້ລ່ວງລັບໄປ ເປັນອັນວ່າເສັດພິທີ.

ນຳສະເໜີໂດຍ Art and Culture of Laos.