ບໍ່ຄຳເຊໂປນ ແດນອັນຍະມະນີບູຮານແທ້ໆ

ບໍ່ຄຳເຊໂປນ ແດນອັນຍະມະນີບູຮານແທ້ໆ

25th September 2021 0 By Education

ໂຄງການບໍ່ຄຳ, ທອງເຊໂປນໄດ້ ພົບວັດຖຸບູຮານເກົ່າແກ່  7.800 ອັນຈາກການຂຸດຄົ້ນພາຍໃນເຂດໂຄງການບໍ່ຄຳເຊໂປນ ແຂວງສະຫວັນນະເຂດ ໂດຍບໍລິສັດລ້ານຊ້າງມີ ເນໂຣນສ໌ ໄດ້ມອບໃຫ້ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ເກັບຮັກສາ ແລະ ຄຸ້ມຄອງ.

ວັດຖຸບູຮານທີ່ມາມອບປະກອບມີວັດຖຸພັນປະເພດທອງແດງ, ທອງເຫລືອງ, ເຫລັກ, ດິນເບົ້າຫລໍ່, ແກ້ວປະດັບ-ເຈຍລະໄນ, ເຄື່ອງປັ້ນດິນເຜົາ ແລະ ໄມ້ (ມີອາຍຸເກົ່າແກ່ແຕ່ 1,000-3,000 ປີ).


ມອບໃຫ້ພາກລັດຄຸ້ມຄອງຄື: ຫໍພິພິທະພັນແຫ່ງຊາດ 08 ຮ້ອຍກວ່າອັນ, ຫໍພິພິທະພັນສະຫວັນນະເຂດ 04 ຮ້ອຍກວ່າອັນ ແລະ ຫໍວັດທະນະທຳເມືອງວິລະບູລີຫຼາຍກວ່າ 6.600 ອັນ.


ຕະຫຼອດເກືອບ 20 ປີຜ່ານມາ, ໂຄງການຂຸດຄົ້ນຄໍາ-ທອງ ພາຍໃຕ້ການຄຸ້ມຄອງຂອງບໍລິສັດໄດ້ປະຕິບັດຕາມນະໂຍບາຍ ແລະ ລະບຽບກົດໝາຍຂອງລັດຢ່າງເຂັ້ມງວດ ພ້ອມທັງໄດ້ມອບພັນທະຕ່າງໆໃຫ້ລັດຖະບານຫລາຍຮ້ອຍລ້ານໂດລາ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ດ້ວຍດີຕະຫລອດມາ.


ວຽກງານດ້ານບູຮານຄະດີ ບໍລິສັດໄດ້ໃຫ້ຄວາມສຳຄັນ ນັບຕັ້ງແຕ່ເລີ່ມໂຄງການ ປີ 2001 ເປັນຕົ້ນມາ ໄດ້ໃຊ້ງົບປະມານຫລາຍກວ່າ 1,3 ລ້ານໂດລາສະຫະລັດ ເພື່ອຈັດຕັ້ງຄະນະສຳຫລວດ ແລະ ນັກວິຊາການສະເພາະສຶກສາຄົ້ນຄວ້າບູຮານວັດຖຸຕາມຂັ້ນຕອນດ້ວຍຄວາມຮັບຜິດຊອບສູງ.

ການສົ່ງເສີມ ແລະ ອະນຸລັກຮັກສາຄວາມມໍລະດົກອັນລໍ້າຄ່າ ແມ່ນມີຄວາມໝາຍສຳຄັນຕໍ່ປະຫວັດສາດຂອງຊາດ: ສະແດງເຖິງຄວາມຮັ່ງມີ, ມູນເຊື້ອແນວຄິດປະດິດສ້າງ ແລະ ອາລະຍະທຳອັນເກົ່າແກ່, ເປັນສິ່ງເອກອ້າງທະນົງໃຈຂອງປວງຊົນລາວ, ເຮັດໃຫ້ສັງຄົມໂລກໄດ້ຮັບຮູ້ ເຖິງຄວາມອຸດົມສົມບູນດັ່ງກ່າວ.

ໃນອະນາຄົດ, ສະຖານທີ່ຄົ້ນພົບວັດຖຸບູຮານນີ້ອາດກາຍເປັນແຫລ່ງທ່ອງທ່ຽວອັນສຳຄັນຂອງລາວເຮົາ ແລະ ກາຍເປັນມໍລະດົກໂລກທີ່ຈະສ້າງຊື່ສຽງໃຫ້ຊາດເຮົາອີກດ້ວຍ.