ແນວພັນເຂົ້າສູງ 2 ແມັດ ກຳລັງເປັນທີ່ສົນໃຈ ເລື່ອງໃຫຍ່ສູງໃຫ້ຜົນຫຼາຍ

ແນວພັນເຂົ້າສູງ 2 ແມັດ ກຳລັງເປັນທີ່ສົນໃຈ ເລື່ອງໃຫຍ່ສູງໃຫ້ຜົນຫຼາຍ

28th September 2021 0 By Education

ທຸກວັນນີ້ໂລກຳລັງປ່ຽນໄປ ການດຳລົງຊີວິດກໍ່ເຊັ່ນດຽວກັບມີຄວາມທັນສະໄໝຂຶ້ນນັບມື້ ຄົນຢູ່ໃນເມືອງຫຼວງ ຫຼື ຊົນນະບົດຕ່າງກໍ່ແຂ່ງຂັນກັນຜັນໂຕເອງສູ່ຂະແໜງອຸດສາຫະກຳ ແລະບໍລິການຫຼາຍຂຶ້ນເປັນລຳດັບ ແຕ່ໜຶ່ງສິ່ງທີ່ບໍ່ເຄີຍປ່ຽນຄື ຄວາມຕ້ອງການກິນເຂົ້ານັບມື້ຫຼາຍຂຶ້ນສວນກະແສກັບການຫາວຽກເຮັດງານທຳ ຂະນະທີ່ຜູ້ເປັນຊາວນາຫຼຸດໜ້ອຍລົງເລື້ອຍໆ ຈິ່ງເປັນໂອກາດດີຂອງຜູ້ຮັກການກະເສດທີ່ຈະສ້າງຄວາມຮັ່ງມີຂຶ້ນມາໄດ້.

ເຊິ່ງ ສປ ຈີນ ເປັນປະເທດໜຶ່ງທີ່ບໍ່ພຽງມີເຕັກໂນໂລຊີທີ່ກ້າວໜ້ານຳສະໄໝ ມີເສດຖະກິດທີ່ດີເປັນມະຫາອຳນາດໂລດເທົ່ານັ້ນ ແຕ່ເລື່ອງກະສິກຳ ເພິ່ນກໍ່ບໍ່ໄດ້ຢຸດນິ້ງ ຍັງກ້າວໄປຢ່າງຕໍ່ເນື່ອງ ແລະມັກມີແນວແປກໆມາໃຫ້ຊາວໂລກໄດ້ຈົດຈຳ ອິດສາຢູ່ສະເໝີໆ ຫຼ້າສຸດນີ້ກໍ່ແມ່ນແນວພັນເຂົ້າສູງເຖິງ 2 ແມັດແຖມໃຫ້ຜົນກະລິດສູງອີກດ້ວຍ.

ອີງຕາມຂ່າວ Xinhua ຂອງຈີນ ລາຍງານໃນວັນທີ 25 ກັນຍາ 2021 ທີ່ໝູ່ບ້ານຊາງຫົງ ນະຄອນຊົງຊິ່ງ ທາງຕາເວັນຕົກສ່ຽງໃຕ້ຂອງ ສປ ຈີນ ໄດ້ເລີ່ມເກັບກ່ຽວເຂົ້າພັນໃຫຍ່ ເຊິ່ງເປັນເຂົ້າພັນປະສົມສາຍພັນໜຶ່ງທີ່ມີຄວາມສູງ 2 ແມັດ ແລະ ຖືເປັນການເກັບກ່ຽວເຂົ້າໃຫຍ່ທີ່ປູກໃນເນື້ອທີ່ທົດລອງຄັ້ງທຳອິດ ເຊິ່ງໃຫ້ຜົນຜະລິດ 7,5 ໂຕນຕໍ່ເຮັກຕາ.

ເຂົ້າພັນໃຫຍ່ນີ້ ເປັນສາຍພັນສາຍພັນໃໝ່ຂອງສະຖາບັນກະສິກຳເຄິ່ງເຂດຮ້ອນ, ສະຖາບັນວິທະຍາສາດແຫ່ງຊາດຈີນ ໃນປີ 2017 ແລະ ປະສົບຜົນສຳເລັດໃນການປູກຢູ່ແຂວງຫູໜານທາງພາກກາງຂອງຈີນ ແລະ ເຂດອື່ນໆ. ທັງນີ້, ເຂົ້າພັນດັ່ງກ່າວມີຄວາມສູງກວ່າ 2 ເທົ່າຂອງເຂົ້າທຳມະດາ,​ ມັນມີຄວາມສູງສຸດໄດ້ປະມານ 2,2 ແມັດ.

ເຊີນ ຫວາງຜູ່ ຮອງຜູ້ອຳນວຍການສູນວິໄຈເຕັກໂນໂລຊີວິສາວະກຳເຂົ້າຂອງຈີນ ນະຄອນຊົງຊິ່ງ ກ່າວວ່າ: ເຂົ້າພັນນີ້ ມີຮ່ວງຂະໜາດໃຫຍ່ ແລະ ໃຫ້ປະລິມານເມັດເຂົ້າຫຼາຍກວ່າ ຈຶ່ງໃຫ້ຜົນຜະລິດຂອນຂ້າງສູງ ແລະ ຄຸນນະພາບດີ.