ຊ່ວຍເພິ່ນແນ່! ຂໍຄໍາແນະນໍາ ປິ່ນປົວພໍ່ຕິດເຊື້ອໂຄວິດ-19 ຢູ່ເຮືອນ ພ້ອມບອກເຂົ້າໃຈແພດໝໍ ພວກເພິ່ນວຽກໜັກຫຼາຍ

ຊ່ວຍເພິ່ນແນ່! ຂໍຄໍາແນະນໍາ ປິ່ນປົວພໍ່ຕິດເຊື້ອໂຄວິດ-19 ຢູ່ເຮືອນ ພ້ອມບອກເຂົ້າໃຈແພດໝໍ ພວກເພິ່ນວຽກໜັກຫຼາຍ

30th September 2021 0 By Entertain

ເປັນອີກກໍລະນີທີ່ແອັດຢາກເອົາມາແບ່ງປັນໃຫ້ທຸກຄົນໄດ້ຮັບຮູ້ເຖິງຄວາມອັນຕະລາຍຂອງພະຍາດໂຄວິດ-19 ທັງເພື່ອເປັນກະບອກສຽງຂໍຄໍາແນະນໍາຈາກຜູ້ຮູ້ໃຫ້ກັບກໍລະນີນີ້ ຂໍຜູ້ຜ່ານປະສົບການຊ່ວຍແຊສິ່ງທີ່ເປັນປະໂຫຍດໃນການປິ່ນປົວໂຄວິດດ້ວຍໂຕເອງ ແກ່ຄອບຄົວນີ້ດ້ວຍ.

ໂດຍເລື່ອງລາວນີ້ຖືກນໍາມາເຜີຍແຜ່ໂດຍຜູ້ໃຊ້ເຟສບຸກທ່ານນໜຶ່ງ ເຊິ່ງຜູ້ກ່ຽວໂພສໃຫ້ຮູ້ເຖິງທຸກຢ່າງທີ່ເກີດຂຶ້ນວ່າ: ສະບາຍດີ ຂໍອະນຸຍາດຖາມຜູ້ຮູ້ ຫຼື ຜູ້ມີປະສົບການຄອບຄົວທີ່ຕິດເຊື້ອໂຄວິດແນ່ ເພາະຄອບຄົວເຮົາ ຜູ້ເປັນພໍ່(ອາຍຸ60+)ຕິດເຊື້ອໂຄວິດ ແລະ ຮູ້ຜົນມື້ວານນີ້ວັນທີ 29 ກັນຍາ ຈົນມາຮອດປັດຈຸບັນ ເຈົ້າໜ້າທີ່ຍັງບໍ່ມາຮັບຕົວໄປຮັກສາເຊິ່ງພວກເຮົາແມ່ນໄດ້ຮັກສາໄປຕາມອາການ.

ຂະນະດຽວກັນຜູ້ກ່ຽວກໍ່ເຂົ້າໃຈເຈົ້າໜ້າທີ່ວ່າພວກເພິ່ນເຮັດວຽກໜັກໜາພຽງໃດ ໂດຍອະທີບາຍອອກຜ່ານຄໍາເວົ້າວ່າ:  ແຕ່ເນື່ອງດ້ວຍມີຜູ້ຕິດເຊື້ອໃນ ນວ ເປັນຈຳນວນຫຼາຍ (ເຂົ້າໃຈວ່າເຈົ້າໜ້າທີ່ບໍ່ສາມາດເບິ່ງແຍງຢ່າງທົ່ວເຖິງ) ແຕ່ໃນກໍລະນີຄອບຄົວເຮົາມີຫ້ອງພັກທີ່ມີຫ້ອງນ້ຳໃນໂຕ (ເປັນຫ້ອງພັກຂອງຂ້ອຍເອງ) ເຮົາແມ່ນສາມາດນຳເພິ່ນມາກັກດ່ຽວໃນຫ້ອງນີ້ໄດ້ເອງເລີຍບໍ່ (ແບບຮັກສາໄປຕາມອາການດ້ວຍຕົວເອງພາຍໃນຄອບຄົວ) ແລະຈະລັອກຫ້ອງທາງດ້ານນອກບໍ່ໃຫ້ພໍ່ອອກມາ ມີແຕ່ຈະປ່ອນເຂົ້າປ່ອນນ້ຳໃຫ້.

ເພາະວ່າຕອນນີ້ຄອບຄົວເຮົາແມ່ນຍັງລໍຖ້າເຈົ້າໜ້າທີ່ມາຮັບພໍ່ ຈຶ່ງເຮັດໄດ້ແຕ່ໃຫ້ເພິ່ນຖ້າຢູ່ແຕ່ໃນຫ້ອງນອນ (ຫ້ອງນອນຊັ້ນສອງທີ່ບໍ່ມີຫ້ອງນ້ຳ ເຊິ່ງເວລາອາບນ້ຳແມ່ນຕ້ອງໄດ້ລົງມາທາງລຸ່ມບ້ານ) ໃນບ້ານກໍຍັງມີອີກ 5 ຄົນທີ່ອາໄສນຳກັນ ເຊິ່ງມັນເປັນຄວາມສ່ຽງທີ່ຈະເຮັດໃຫ້ ອີກ 5 ຄົນຈະໄດ້ຮັບເຊື້ອໄປນຳ ດັ່ງນັ້ນ ຈຶ່ງຢາກຮູ້ວ່າເຮົາຈະຕ້ອງເຮັດແນວໃດເມື່ອພົບໃນກໍລະນີແບບນີ້. ແນວໃດກໍ່ຕາມ ແອັດຂໍເປັນອີກໜຶ່ງກະບອກສຽງ ຮຽກຮ້ອງໃຫ້ຜູ້ທີ່ຜ່ານປະສົບການປິ່ນປົວ ຫຼື ຕິດເຊື້ອໂຄວິດ-19 ມາກ່ອນ ມາຊ່ວຍແບ່ງປັນວິທີການປິ່ນປົວຮັກສາ ຫຼື ເບິ່ງແຍງໂຕເອງຢູ່ບ້ານໃຫ້ກັບກໍລະນີນີ້ແນ່.