ໃຜຍັງຈື່ໄດ້ລະຄອນດັງ ຮຽກນ້ຳຕາ ຮັກນີ້ຊົ່ວນິລັນດອນ

ໃຜຍັງຈື່ໄດ້ລະຄອນດັງ ຮຽກນ້ຳຕາ ຮັກນີ້ຊົ່ວນິລັນດອນ

2nd October 2021 0 By Education

ຮັກນີ້ຊົ່ວນິລັນດອນ ຊີຣີເກົາຫຼີຍອດນິຍົມ ເຊິ່ງໄດ້ສຽງຕອບຮັບຢ່າງລົ້ນຫຼາມຈາກຄົນທົ່ວໂລກ ທັງຍັງເປັນການແຈ້ງເກີດໃຫ້ຊີຣີເກົາຫຼີເປັນທີ່ນິຍົມຫຼາຍຂຶ້ນຈາກຜູ້ຊົມທົ່ວໂລກ ເຖິງຈະບໍແມ່ນລະຄອນເລື່ອງທຳອິດກໍ່ຕາມ ແຕ່ຊີຣີເລື່ອງນີ້ແມ່ນເຜີຍໃຫ້ຄົນຈາກທຸກມຸມໂລກໄດ້ເຫັນຄວາມສວຍງາມ, ຄວາມຮັກຂອງບ່າວສາວເກົາຫຼີ ເຊິ່ງນັ້ນບໍ່ພຽງສ້າງຊື່ສຽງໃຫ້ວົງການຮູບບັນເທິງຂອງເກົາຫຼີເທົ່ານັ້ນ ແຕ່ຍັງດຶງດູດການທ່ອງທ່ຽວສູ່ ເກົາຫຼີໃຕ້ຢ່າງຫຼວງຫຼາຍ.

ລະຄອນເລື່ອງນີ້ໃນເວລານັ້ນ ຜູ້ມີໂອກາດໄດ້ເບິ່ງກໍ່ເບິ່ງຜ່ານໜ້າຈໍໂທລະທັດ ສ່ວນຜູ້ບໍມີໂອກາດກໍ່ຍອມຊື້ປື້ມໜາຫຼາຍນີ້ວມາອົດຫຼັບອົດນອນອ່່ານ ທັງອ່ານທັງເຊັດນ້ຳຕາຄືກັບເຈົ້າໂຕໄດ້ໄປຢູ່ກັບເຂົາໃນບົດ ເຊິ່ງໂຫດຮ້າຍກວ່າເບິ່ງໜັງ 4 ມິຕິອີກພຸ້ນລະ ເຊື່ອວ່າຫຼາຍຄົນຄົງເຄີຍປະສົບພົບພໍ້ມາ ໜຶ່ງໃນນັ້ນກໍ່ແມ່ນແອັດມິນນີ້ລະ!!!

ສຳລັບເລື່ອງຮັກນີ້ຊົ່ວນິລັນດອນເປັນຊີຣີແນວຮັກໂຣແມນຕິກປະສົມດຣາມາ ໄດ້ເລີ່ມອອກອາກາດໃນຊ່ອງ KBS2 ຂອງເກົາຫຼີໃນວັນທີ 18 ກັນຍາ ປີ 2000 ເຊິ່ງເປັນບົດຂຽນຂອງ ໂອຊູຢູນ ກຳກັບໂດຍຢູນຊັອກໂຮ ແລະຜະລິດໂດຍຢູນຮອງຊິກ.

ລະຄອນຮັກນີ້ຊົ່ວນິລັນດອນນັບວ່າເປັນຊີຣີທີ່ຮຽກນ້ຳຕາຂອງຜູ້ຄົນເກືອບທຸກຄົນທີ່ໄດ້ເຫັນ ຈິ່ງກາຍເປັນໜັງເລື່ອງທີ່ຄອງຄວາມນິຍົມໜຶ່ງໃນ 25 ເລື່ອງຂອງ KBS ແລະສາມາດສ້າງກະແສລະຄອນເກົາຫຼີໃຫ້ໂດ່ງດັງທົ່ວເອເຊຍໃນເວລາອັນສັ້ນ.

ທັ້ງນີ້ກໍ່ຍ້ອນມີນັກສະແດງຄຸນນະພາບຢ່າງ ຊອງ ຊືງຮັນ ພະເອກໜຸ່ມຂັວນໃນແຟນໆ, ກັບຊອງເຮຄຽວນາງເອກສາວຫວານ, ວອນບິນນັກສະແດງທີ່ເຄີຍຜ່ານຜົນງານປະທັບໃຈມາກ່ອນຈະຮອດເລື່ອງ ຮັກນີ້ຊົ່ວນິລັນດອນ ມາຢູ່ຮ່ວມກັນ ບວກກັບການກຳກັບທີ່ບໍ່ທຳມະດາ.

ທັງໝົດນີ້ໄດ້ສົ່ງຜົນໃຫ້ ຊອງຊືງຮັນ ແລະຊອງເຮຄຽວ ໄດ້ຮັບລາງວັນນັກສະແດງຊາຍ-ຍິງທີ່ໄດ້ຮັບຄວາມນິຍົມສູງສຸດໃນປີດຽວທີ່ລະຄອນໄດ້ອອນແອຄື KBS DRAMA AWARDS 2000 ນອກນີ້ ວອນບິນ ກໍ່ໄດ້ຮັບລາງວັນນັກສະແດງຊາຍຍອດຢ້ຽມແຫ່ງປີໃນເວທີດຽວກັນ.

ບໍ່ຢາກເຊື່ອວ່າເລື່ອງຮັກນີ້ຊົ່ວນິລັນດອນຈະຜ່ານການເວລາມາ 20 ປີແລ້ວ ແລະບັນດາແຟນລະຄອນທີ່ມັກຈັບໃຈໃນເລື່ອງນີ້ກໍ່ຍັງບັນທຶກໄວ້ໃນສະມຸດບັນຊີ ເອົາມາຣີວີວໃຫ້ໝູ່ເພື່ອນໄດ້ເຫັນວ່າປີນີ້ຄົບ 21 ປີແລ້ວນະ.

ສ່ວນໃຜທີ່ຍັງບໍ່ທັນເບິ່ງຢ່າລືມຫາໂອກາດໄປເບິ່ງໃຫ້ໄດ້ ເປັນຊີຣີທີ່ປະທັບໃຈອີຫຼີ ມີຫຼາຍລົດຊາດ ແລະຄວາມຮັກທີ່ເລິກຊຶ້ງຈົນຫ້າມນ້ຳຕາຢວ້ບໍ່ຢູ່ພຸ້ນລະເດີ້!!