ເຊບໂຣເລດ-ລາວ ຊີ້ແຈງ ກໍລະນີໂຮງງານຜະລິດຢູ່ໄທປິດໂຕ

ເຊບໂຣເລດ-ລາວ ຊີ້ແຈງ ກໍລະນີໂຮງງານຜະລິດຢູ່ໄທປິດໂຕ

5th March 2020 1 By Education

ຈາກກໍລະນີ ຂ່າວບໍລິສັດ GM ປະເທດໄທໄດ້ມີການປະກາດຢຸດຕິ ການຜະລິດລົດກະບະ ໂຄໂລຣາໂດ ແລະ ຈິບເທວເບຼເຊີ ພາຍໃນປີ 2020 ເຊິ່ງຫຼາຍທ່ານອາດກັງວົນ ຫຼື ຂ້ອງໃຈວ່າມັນຈະກັບທົບເຖິງບໍລິສັດໃນລາວຫຼືບໍ່? ຫຼ້າສຸດ ບໍລິສັດ ເຊບໂຣເລດ-ລາວ ອອກມາຊີ້ແຈງເຖິງຂໍ້ຂ້ອງໃຈດັ່ງກ່າວແລ້ວ.

ໂດຍບໍລິສັດ ເຊບໂຣເລດ-ລາວ ຊີ້ແຈງວ່າ: ການປິດໂຮງງານດັ່ງກ່າວບໍ່ມີຜົນກະທົບຕໍ່ຕະຫຼາດໃນລາວ ເນື່ອງຈາກຢູ່ປະເທດໄທເປັນຕະຫຼາດລົດພວງມາໄລເບື້ອງຂວາ; ທາງບໍລິສັດ ເຊບໂຣເລດ-ລາວ ມີໂຮງງານຜະລິດລົດກະບະ ໂຄໂລຣາໂດ ແລະ ຈິບ ເທວເບຼເຊິ ແຫ່ງໃໝ່ໃນປະເທດອື່ນ(ຈາກໂຮງງານຕະຫຼາດພວງມາໄລເບື້ອງຊ້າຍ) ເພື່ອສະໜອງຄວາມຕ້ອງການຕະຫຼາດໃນ ສປປ ລາວ.

ສ່ວນລົດເຊບໂຣເລດ ລຸ້ນອື່ນໆ ຍັງຄົງໃຫ້ບໍລິການລົດໃໝ່ ແລະ ຫຼັງການຂາຍໄດ້ຕາມປົກກະຕິ; ພ້ອມນີ້ຍັງຈະສືບຕໍ່ໃນການນໍາລົດ ເຊບໂຣເລດ ລຸ້ນໃໝ່ໆເຂົ້າມານໍາສະເໜີໃນຕະຫຼາດລາວຕໍໄປ; ທັງນີ້ ທາງບໍລິສັດແມ່ມີອາໄຫຼ່ສໍາຮອງ ພ້ອມໃຫ້ບໍລິການລົດເຊບໂຣເລດທຸກລຸ້ນຕາມປົກກະຕິ ບໍ່ໄດ້ມີການຢຸດບໍລິການ ຫຼື ຢຸດສະໜອງອາໄຫຼ່ແຕ່ຢ່າງໃດ.

ນອກຈາກນີ້ທາງບໍລິສັດກໍ່ມີແຜນສໍາຮອງອາໄຫຼ່ລາຄາພິເສດ ສໍາລັບລູກຄ້າທີ່ເປັນເຈົ້າຂອງລົດກະບະໂຄໂລຣາໂດ ແລະ ຈິບ ເທວເບຼເຊີ; ທີ່ສໍາຄັນຍັງຮັບປະກັນການໃຊ້ງານລົດ ເຊບໂຣເລດ ທຸກລຸ້ນ ຕາມເງື່ອນໄຂ ມາດຕະຖານ ຄື ຮັບປະກັນ 3ປີ ຫຼື 100.000 ກິໂລແມັດ. ພ້ອມຢືນຢັນ ບໍລິສັດ ເຊບໂຣເລດ-ລາວ ຍັງຄົງສືບຕໍ່ດໍາເນີນທຸລະກິດໃນ ສປປ ລາວ ຕໍ່ໄປ.