ຂະແໜງພະລັງງານບໍ່ແຮ່ ແຈ້ງພະນັກງານທີ່ກ່ຽວຂ້ອງໃຫ້ຍົກເລີກທຸກການເດີນທາງໄປຕ່າງປະເທດ ແລະ ງານສັງສັນຕ່າງໆ

ຂະແໜງພະລັງງານບໍ່ແຮ່ ແຈ້ງພະນັກງານທີ່ກ່ຽວຂ້ອງໃຫ້ຍົກເລີກທຸກການເດີນທາງໄປຕ່າງປະເທດ ແລະ ງານສັງສັນຕ່າງໆ

6th March 2020 0 By Education

ຈາກສະພາບການລະບາດຂອງເຊື້ອໄວຣັດ ໂຄວິດ-19 ຢູ່ຫຼາຍປະເທດໃນທົ່ວໂລກ ລວມເຖິງບັນດາປະເທດໃກ້ຄຽງກັບ ສປປ ລາວ ຍິ່ງເຮັດໃຫ້ປະເທດເຮົາຕ້ອງມີມາດຕະການທີ່ເຄັ່ງຄັດເພື່ອປ້ອງກັນ ຄວບຄຸມເຊື້ອພະຍາດດັ່ງກ່າວ ເຊິ່ງລັດຖະບານກໍ່ໄດ້ເຮັດທຸກວິທາງເພື່ອສະກັດກັ້ນເຊື້ອພະຍາດນີ້, ຫຼ້າສຸດກະຊວງພະລັງງານ ແລະ ບໍ່ແຮ່ ກໍ່ໄດ້ອອກແຈ້ງການ ເພື່ອເພີ່ມທະວີປະຕິບັດມາດຕະການທີ່ລັດຖະບານວາງອອກຢ່າງເຂັ້ມງວດ ປ້ອງກັນເຊື້ອໂຄວິດ-19 ບໍ່ໃຫ້ລະບາດເຂົ້າລາວ.

ອີງຕາມແຈ້ງການຂອງລັດວະສາຫະກິດໄຟຟ້າລາວ, ກະຊວງພະລັງງານ ແລະ ບໍ່ແຮ່ ສະບັບເລກທີ 0956/ຟຟລ ລົງວັນທີ 6 ມີນາ 2020 ເຖິງ ບໍລິສັດ ຜ-ຟຟລ (ສໍານັກງານໃຫຍ່), ບໍລິສັດນໍ້າງື່ມ3 ພາວເວີ ຈໍາກັດ, ບັນດາບໍລິສັດເອກະຊົນທີ່ເຊົ່າຢູ່ໃນອາຄານ ໄຟຟ້າລາວ, ບັນດາຝ່າຍ ຫ້ອງການທີ່ຂຶ້ນກັບຄະນະອໍານວຍການໃຫຍ່, ຫ້ອງການຄຸ້ມຄອງລະບົບສົ່ງ ແລະ ບັນດາສາຂາ ຟຟລ ທົ່ວປະເທດ; ເລື່ອງ ໃຫ້ເພີ່ມທະວີການປະຕິບັດມາດຕະການປ້ອງກັນ, ຕອບໂຕ້ການລະບາດຂອງເຊື້ອຈຸລະໂລກ ໂຄວິດ-19 ລະບຸວ່າ:

1 ໃຫ້ເພີ່ມທະວີເອົາໃຈໃສ່ທາງດ້ານສຸຂາອະນາໄມພາຍໃນສໍານັກງານຢ່າງເຄັ່ງຄັດ ໂດຍຈັດໃຫ້ມີເຈວລ້າງມືຂ້າເຊື້ອໂລກ ປະຈໍາຢູ່ໃນຈຸດທີ່ມີການສໍາຜັດເລື້ອຍໆຂອງສໍານັກງານເຊັ່ນ: ປະຕູລິບ ແລະ ອື່ນທ, ພ້ອມຊີ້ນໍາໃຫ້ພະນັກງານທຸກຄົນລວມທັງຄອບຄົວປະຕິບັດຕາມການແນະນໍາຂອງຄະນະສະເພາະກິດເພື່ອປ້ອງກັນ ແລະ ຄວບຄຸມ ພ້ອມແກ້ໄຂການລະບາດຂອງພະຍາດໂຄວິດ-19 ຢ່າງເຄັ່ງຄັດ.

2 ໃຫ້ພິຈາລະນາໂຈະ ຫຼື ເລື່ອນງານກິດຈະກໍາ, ງານລ້ຽງ, ງານປະເພນີ ຫຼື ງານພົບປະສັງສັນຕ່າງໆ ທີ່ມີຈໍານວນພົນເຂົ້າຮ່ວມຈໍານວນຫຼາຍ, ຖ້າຫາກຈໍາເປັນກໍ່ຕ້ອງປະຕິບັດມາດຕະການກວດກາ, ຄັດກອງຢ່າງເຄັ່ງຄັດເຊັ່ນເ ກວດກາອຸນຫະພູທຮ່າງກາຍ, ໃສ່ຜ້າອັດປາກເຫຼົ່ານີ້ເປັນຕົ້ນ.

3 ໃຫ້ພິຈາລະນາໂຈະ ຫຼື ເລື່ອນການເດີນທາງຂອງພະນັກງານທີ່ຈະໄປປະຕິບັດວຽກຢູ່ຕ່າງປະເທດເຊັ່ນ: ໄປເຝິກອົບຮົມ, ປະຊຸມ ແລະ ສໍາມະນາຕ່າງໆ ໃນບັນດາປະເທດທີ່ມີການລະບາດຂອງພະຍາດໂຄວິດ-19

4 ກໍລະນີຫາກໄດ້ມີການເກີນທາງໄປຕ່າງປະເທດຂອງພະນັກງງານໄຟຟ້າລາວ ໂດຍເປັນການເດີນທາງໄປວຽກທາງການໃນບັນດາປະເທດທີ່ມີການແຜ່ລະບາດຂອງພະຍາດໂຄວິດ-19 ແມ່ນອະນຸຍາດໃຫ້ຢຸດພັກວຽກ ແລະ ແຍກຕົວເອງເປັນເວລາ 14ວັນ ໂດຍການໝາຍວັນງານເປັນວັນມາການປົກກະຕິ. ນັບແຕ່ເດີນທາງກັບເຖິງປະເທດລາວ ໃຫ້ແຈ້ງຕໍ່ການຈັດຕັ້ງຮັບຊາບ ແລະ ລາຍງານການຕິດຕາມອາການເປັນແຕ່ລະໄລຍະ.

5 ກໍລະນີມີພະນັກງານ, ຄອບຄົວພະນັກງານທີ່ອາໄສຢູ່ເຮືອນດຽວກັນເດີນທາງມາແຕ່ປະເທດທີ່ມີການແຜ່ລະບາດຂອງພະຍາດດັ່ງກ່າວ, ເຊິ່ງການເດີນທາງບໍ່ແມ່ນການເດີນທາງວຽກທາງການຂອງໄຟຟ້າລາວ ແມ່ນໃຫ້ຜູ້ກ່ຽວລາພັກ 14ວັນເພື່ອແຍກຕົວເອງອອກ ເຊິ່ງໃຫ້ລະບຸເປັນວັນພັກປະຈໍາປີ ແຕ່ຖ້າຫາກຜູ້ກ່ຽວຄົບກໍານົດພັກໃນປີນີ້ແລ້ວ ແມ່ນອະນຸຍາດໃຫ້ເອົາວັນພັກໃນປີຕໍ່ໄປ.

6 ໃຫ້ຍົກເລີກ, ຢຸດຊົ່ວຄາວ ຫຼື ຫຼີກລ່ຽງ ການເຊີນບຸກຄະລາກອນຈາກພາຍນອກປະເທດ ເປັນຕົ້ນ ປະເທດທີ່ມີການລະບາດຂອງພະຍາດນີ້ ມາຮ່ວມປະຊຸມ, ສໍາມະນາ ຫຼື ງານຕ່າງໆ.

7 ກໍລະນີມີພະນັກງານຜູ້ປ່ວຍຕ້ອງສົງໄສຕິດເຊື້ອພະຍາດດັ່ງກ່າວ ໃຫ້ພັກການ ໂດຍຖືວ່າເປັນວັນພັກເຈັບປ່ວຍຕາມໄລຍະເວລາທີ່ແພດໃຫ້ພິຈາລະນາອະນຸຍາດໃຫ້ພັກ.

8 ສໍານັກງານຂອງໄຟຟ້າລາວ ບ່ອນໃດມີຄວາມສ່ຽຽທີ່ແຂກຕ່າງປະເທດເຂົ້າມາພົວພັນວຽກຢູ່ເລື້ອຍ ໃຫ້ພິຈາລະນາມາດຕະການປ້ອງກັນ ໂດຍການກວດອຸນຫະພູມຮ່າງກາຍ, ແນະນໍາໃຫ້ລ້າງມືດ້ວຍນໍ້າເຈວຂ້າເຊື້ອໂລກ ແລະ ໃສ່ຜ້າປິດປາກ ກ່ອນເຂົ້າມາພົວພັນວຽກ.

9 ໃຫ້ແຕ່ລະຝ່າຍ, ຫ້ອງການ, ສາຂາ ລວມທັງບໍລິສັດຜະລິດໄຟຟ້າລາວມະຫາຊົນ ແລະ ບໍລິສັດນໍ້າງື່ມ3 ພາວເວີ ຈໍາກັດ ແນະນໍາໃຫ້ພະນັກງງານໃນສັງກັດທຸກຄົນ ວັດແທກອຸນຫະພູມຮ່າງກາຍທຸກເຊົ້າ ກ່ອນອອກມາປະຕິບັດວຽກ, ຖ້າມີໄຂ້ ອຸນຫະພູມສູງກວ່າ 37,5ອົງສາ ໃຫ້ໄປພົບແພດ ແລະ ປະຕິບັດຕາມການຊີ້ນໍາຂອງແພດຢ່າງເຄັ່ງຄັດ ພ້ອມລາຍງານໃຫ້ການຈັດຕັ້ງຮັບຊາບ