ໂຄວິດກະທົບໝົດພາກທຸລະກິດ, ຫຼາຍບໍລິສັດສະເໜີເຍື້ອນເວລາເລື່ອງພັນທະຕ່າງໆ

ໂຄວິດກະທົບໝົດພາກທຸລະກິດ, ຫຼາຍບໍລິສັດສະເໜີເຍື້ອນເວລາເລື່ອງພັນທະຕ່າງໆ

9th March 2020 0 By Education

ປີນີ້ເສດຖະກິດໂດຍລວມໄດ້ຮັບຜົນກະທົບໜັກໜ່ວງ ຈາກການລະບາດຂອງໂຄວິດ ໄວຣັສປອດອັກເສບ ເນື່ອງຈາກຜູ້ຄົນໃຜໆກໍ່ຢ້ານ ພາກັນຢຸດໃຊ້ຢຸດຈ່າຍຢຸດທ່ຽວ ສະນັ້ນທຸກທຸລະກິດທີ່ປີ່ນອ້ອມລ້ວນໄດ້ຮັບຜົນກະທົບ ດີບໍດີຄົນອາດຕົກງານເປັນແຖວຍ້ອນບໍລິສັດບໍ່ມີລາຍຮັບສົ່ງຜົນເຖິງລະບົບການຈ່າຍເງິນເດືອນຢ່າງຫຼີກລ່ຽງບໍ່ໄດ້.

ເພື່ອຮັບຟັງສະພາບການຕົວຈີງທີ່ເກີດຂຶ້ນກັບພາກທຸລະກິດ ອາທິດຜ່ານມາສະພາອຸດສາຫະກຳ ແລະການຄ້າແຫ່ງຊາດໄດ້ຈັດກອງປະຊຸມ ປະເມີນຜົນກະທົບ ຂອງພາກທຸລະກິດຈາກການແຜ່ລະບາດຂອງ COVID19 , ກອງປະຊຸມຄັ້ງນີ້ເນັ້ນໃສ່ລະດົມຄວາມຄິດເຫັນຂອງພາກທຸລະກີດໃນຂະແຫນງ ອຸດສະຫະກຳທ່ອງທ່ຽວ(ໂຮງແຮມ ຮ້ານອາຫານ ສາຍການບິນ ສະຖານທີ່ທ່ອງທ່ຽວ, ບໍລິສັດ ບໍລິການລົດເມ ລົດເຊົ່າ ແລະບໍລິການການທ່ອງທ່ຽວ….. )ປະເມີນຜົນກະທົບໃນສະຖານະການການລະບາດຂອງCOVID19 ຫາທາງອອກຮ່ວມກັນ.

ສິ່ງສຳຄັນວ່າຈະຊ່ວຍກັນແບບໃດລະວ່າງພາກທຸລະກິດນຳກັນ ແລະຂໍ້ສະເຫນີຕ່າງໆຫາພາກລັດເພື່ອຂໍຄວາມຊ່ວຍເຫລືອໂຍະຍານຜ່ອນຜັນການຊໍາລະພັນທະຕ່າງໆອອກໄປ ລວມທັງພັນທະທະທາຄານ ເພື່ອໃຫ້ມີເງິນສົດມາປະຄອງ ບໍລິສັດໃຫ້ຜ່ານພົ້ນໄລຍະຫຍູ້ງຍາກນີ້ໄປໃຫ້ໄດ້ກ່ອນຈະກ້າວໄປເຖິງປິດກິດຈະການ.

ໃນກອງປະຊຸມຫລາຍບໍລິສັດກໍໄດ້ມີຫລາກຫລາຍຂໍ້ສະເຫນີແລະບົດຮຽນມາແລກປ່ຽນກັນເຊິ່ງຫລີກລ້ຽງບໍ່ໄດ້ຕໍ່ຜົນກະທົບເຖິງພະນັກງານອົງກອນທີ່ທຸກຄົນຕ້ອງໄດ້ຊ່ວຍກັນເຖິງແມ່ນຈະກະທົບລາຍຮັບປະຈຳ ແຕ່ກໍຈຳເປັນໄດ້ຖອຍຄົນລະກ້າວເພື່ອໃຫ້ອົງກອນຂ້າມຜ່ານໄປໄດ້.

ກອງປະຊຸມຄັ້ງສຳຄັນນີ້ເປັນປະທານໂດຍ ທ່ານນາງ ວາລີ ເວດສະພົງ ຮອງປະທານສະພາອຸດສາຫະກຳ ແລະການຄ້າແຫ່ງຊາດ ເຊິ່ງທ່ານປະທານກອງປະຊຸມໄດ້ມີຄຳເຫັນວ່າ: ເພື່ອໃຫ້ທຸລະກິດສືບຕໍ່ເດີນໜ້າໃນທ່າມກາງຄວາມຫຍຸ້ງຍາກນີ້ ໃຫ້ພາກທຸລະກິດທຸກພາກສ່ວນຈົ່ງພ້ອມກັນສ້າງຄວາມເຊື່ອຫມັ້ນໃຫ້ນັກທ່ອງທ່ຽວທັງພາຍໃນແລະຕ່າງປະເທດໃຫ້ເຮັດພ້ອມກັນທົ່ວປະເທດໂດຍຢ່າງນ້ອຍໃຫ້ມີການປ້ອງກັນ ຂັ້ນພື້ນຖານທຸກສະຖານທີ່ຂອງຕົນໃຫ້ມີ ເຈວ ລ້າງມື ສະແກນອຸນນະພູມຂອງແຂກຄົນເຂົ້າອອກທຸກຄັ້ງ ໃຫ້ການຮ່ວມມືແລະປະຕິບັດຕາມຄຳສັ່ງບັນດາມາດຕະການຕ່າງໆຂອງທາງລັດຖະບານຢ່າງເຄັ່ງຂັດ.

ນີ້ເປັນໂອກາດໃຫ້ຜູ້ຜະລິດພາຍໃນພະຍາຍາມພັດທະນາສິນຄ້າຂອງຕົນໃຫ້ມີຄຸນນະພາບ ເຊິ່ງປະເທດເພື່ອນບ້ານເຮົາລະບາດແບບນີ້ ຄົນລາວເອງກໍລະວັງຕົວຫລາຍຂື້ນໂດຍການບໍ່ຂ້າມໄປບ້ານເພິ່ນຫລາຍຄືຜ່ານມາ ນັ້ນຫມາຍເຖິງເພີ້ມຄວາມສ່ຽງໃນການຈະຕິດເຊື້ອ ຖ້າທຸກຄົນຊ່ວຍກັນ ລາວທ່ຽວລາວ ລາວຊ່ວຍລາວ ລາວໃຊ້ຂອງລາວ ແລະພາກລັດເອງກໍຍື່ນມືເຂົ້າມາຊ່ວຍເຫລືອພາກທຸລະກິດໃນໄລຍະວິກິດນີ້ ເຊື່ອວ່າພວກເຮົາຈະປະຄັບປະຄອງກັນໄປໃຫ້ຜ່ານພົ້ນຊ່ວງຍາກລຳບາກນີ້ໄດ້ນຳກັນ!!!!

 

ຂອບໃຈຂໍ້ມູນຈາກ ທ່ານນາງ ວາລີ ເວດສະພົງ