ມາຮອບໃໝ່ ການຊ່ວຍເຫຼືອຈາກ ສປ ຈີນ ເພື່ອຊ່ວຍລາວຕ້ານໂຄວິດ

ມາຮອບໃໝ່ ການຊ່ວຍເຫຼືອຈາກ ສປ ຈີນ ເພື່ອຊ່ວຍລາວຕ້ານໂຄວິດ

8th February 2022 0 By Education

ສປ ຈີນປະເທດເພື່ອນມິດຍຸດທະສາດ ໄດ້ຈັດສົ່ງທີມຊ່ຽວຊານການແພດມາຊ່ວຍລາວອີກຊຸດໜຶ່ງ ເຊິ່ງການມາຄັ້ງນີ້ແມ່ນເພື່ອເສີມເຕັກນິກການກວດໄວໃຫ້ກັບແພດໝໍລາວ ແນໃສ່ຮັບປະກັນໃຫ້ການກວດວິເຄາະຄັດກອງຄົນເຂົ້າ-ອອກເມືອງ ໂດຍສະເພາະລະຫວ່າງ ສປປ ລາວ ແລະ ສປ ຈີນ.

ໂດຍທີມງານແພດຊ່ຽວຊານ ຈາກ ສປ ຈີນ ຈຳນວນ 6 ໄດ້ເພີນທາງເຖິງສະໜາມບິນສາກົນວັດໄຕໃນຕອນແລງວັນທີ 7 ກຸມພາ 2022 ໄດ້ຮັບການຕ້ອນຮັບຢ່າງອົບອຸ່ນຈາກທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ.


ການມາຂອງທີມແພດຊ່ຽວຊານຄັ້ງນີ້ແມ່ນ ຕອບສະໜອງຕາມການເຊື້ອເຊີນຈາກຂອງຝ່າຍລາວ, ລັດຖະບານ ສປ ຈີນ ຈຶ່ງໄດ້ສົ່ງໜ່ວຍງານຊ່ຽວຊານແພດໝໍ ຈຳນວນ 6 ທ່ານ ເຂົ້າມາປະຕິບັດວຽກງານ ໃນການແລກປ່ຽນບົດຮຽນທາງດ້ານການປ້ອງກັນ ແລະ ຄວບຄຸມ ການແຜ່ລະບາດພະຍາດໂຄວິດ-19 ຢູ່ ສປປ ລາວ ໂດຍສະເພາະຊ່ວຍຝ່າຍລາວຍົກລະດັບເຕັກນິກທາງດ້ານການກວດພະຍາດໂຄວິດ (PRC) ແລະ ຮັບປະກັນໃຫ້ຖ້ຽວບິນຈາກປະເທດລາວເຂົ້າໄປປະເທດຈີນເປັນປົກກະຕິໄດ້.

ແນ່ນອນນີ້ບໍ່ແມ່ນຄັ້ງທຳອິດທີ່ປະເທດເຮົາໄດ້ຮັບການຊ່ວຍຫຼາຍທາງການແພດຈາກ ສປ ຈີນ ນັບແຕ່ມີການລະບາດຂອງພະຍາດໂຄວິດ-19 ເປັນຄົ້ນມາ ແຕ່ກ່ອນໜ້ານີ້ ລັດຖະບານຈີນໄດ້ຈັດທີມແພດມາຊ່ວຍລາວແລ້ວຫຼາຍຊຸດ ລວມທັງອຸປະກອນການແພດ ແລະຍັງເປັນປະເທດໜຶ່ງດຽວທີ່ສະໜອງວັກຊິນແກ່ ສປປ ລາວ ຫຼາຍທີ່ສຸດ ເພື່ອຕໍ່ສູ້ກັບການລະບາດຂອງພະຍາດອັກເສບປອດ.