ທ່ານ ທອງລຸນ ສີສຸລິດ ເມື່ອ 30 ປີຜ່ານມາຮູບທີ່ຫາເບິ່ງໄດ້ຍາກ ກັບການວາງໂຕທີ່ບໍ່ເຄີຍປ່ຽນ

ທ່ານ ທອງລຸນ ສີສຸລິດ ເມື່ອ 30 ປີຜ່ານມາຮູບທີ່ຫາເບິ່ງໄດ້ຍາກ ກັບການວາງໂຕທີ່ບໍ່ເຄີຍປ່ຽນ

12th February 2022 0 By Education

ທ່ານ ທອງລຸນ ສີສຸລິດ ອະດີດນາຍົກຂວັນໃຈຂອງປະຊາຊົນ ປະທານປະເທດແຫ່ງ ສປປ ລາວ ຄົນທີ 8 ທີ່ຍັງດຳລົງຕຳແໜ່ງຢູ່ໃນປະຈຸບັນ ເວົ້າໄດ້ວ່າເມື່ອ 30 ປີກ່ອນທ່ານເປັນແບບໃດທຸກວັນນີ້ຍັງເປັນແບບນັ້ນ ການວາງຕົວຂອງເພິ່ນສະເໝີຕົ້ນສະເໝີປາຍບໍ່ແປກໃຈເລີຍທີ່ປະຊາຊົນລາວຕາມຮັກຕາມເຊຍເພິ່ນຕະຫຼອດມາ.

ມື້ນີ້ດີໃຈເຫັນຮູບ 29 ປີກ່ອນໜ້າທີ່ ຂອງທ່ານ ທອງລຸນ ສີສຸລິດ ໃນໂອກາດທີ່ເດີນທາງໄປຮ່ວມງານ ການວາງຮາກຖານໂຄງການ ໂຮງຮຽນເດັກກຳພ້າ SOSທີ່ແຂວງຊຽງຂວາງ ປີ1993.

ໂດຍມີ ທ່ານ ກຸດຕິນ ປະທານ SOS ສາກົນ ແລະ ຝ່າຍລາວ ກໍ່ແມ່ນ ທ່ານ ທອງລຸນ ສີສຸລິດ ປະທານ SOS ຝ່າຍລາວ ເຊິ່ງຖືວ່າເປັນບຸກຄົນທຳອິດ ແລະ ທ່ານນາງ ບຸນເພັງ ມູນໂພໄຊ ອຳນວຍການໂຮງຮຽນສ້າງຄູແຂວງຊຽງຂວາງ ໄດ້ຮ່ວມວາງສີລາລືກສ້າງບ້ານ ແລະ ໂຮງຮຽນເດັກກຳພ້າ SOS ເມືອງແປກ ແຂວງຊຽງຂວາງ ສປປ ລາວ.

ເຖິງແມ່ນວ່າເວລາຈະຜ່ານໄປຫຼາຍຟ້າຫຼາຍປີ ຈະສັງເກດໄດ້ວ່າທ່ານ ທອງລຸນ ສີສຸລິດ ເມື່ອຄາວນັ້ນ ທ່ານກໍ່ຍັງມີຄວາມອັດທະຍາໄສທີ່ດີ ຍິ້ມແຍ້ມແຈ່ມໃສເປັນກັນເອງ ເຊິ່ງປັດຈຸບັນທ່ານກໍ່ຍັງຄົງໄວ້ບໍ່ມີການປ່ຽນແປງ ຫຼື ການວາງໂຕຂອງທ່ານໃນທ່າມກາງປະຊາຊົນ.

ແນ່ນອນກ່ອນທີ່ທ່ານຈະກ້າວມາດຳລົງຕຳແໜ່ງປະທານປະເທດ ແຫ່ງ ສປປ ລາວ ວຽກງານ ຫຼື ບົດບາດທາງດ້ານການເມືອງ ແລະ ປະສົບການຂອງທ່ານແມ່ນປ່ຽມລົ້ນໃນຄວາມເປັນຜູ້ນຳທີ່ມີຄວາມສະຫຼຽວສະຫຼາດ ເຫັນແບບນີ້ແລ້ວບໍ່ແປກໃຈທີ່ທ່ານໄດ້ເປັນຜູ້ນຳໃນດວງໃຈຂອງປະຊາຊົນ ແລະເປັນຜູ້ນຳສູງສຸດຂອງປະເທດເຮົາ.

ແລະມາຮອດມື້ນີ້ ທ່ານໄດ້ດຳລົງຕຳແໜ່ງເກືອບ 1 ປີເຕັມແລ້ວ ທີ່ທ່ານ ທອງລຸນ ສີສຸລິດ ຖືກຮັບຮອງແຕ່ງຕັ້ງເປັນປະທານປະເທດ ແຫ່ງ ສປປ ລາວ ຢ່າງເປັນທາງການ ໃນວັນທີ 22 ມີນາ 2021 ເຊິ່ງຖືວ່າເປັນຄົນທີ 8 ຂອງປະເທດລາວ. ໃນກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ທ່ານ ທອງລຸນ ສີສຸລິດ ຖືກຮັບຮອງແຕ່ງຕັ້ງເປັນປະທານປະເທດ ແຫ່ງ ສປປ ລາວ ຢ່າງເປັນທາງການ ດ້ວຍຜົນການລົງຄະແນນສຽງຮັບຮອງການເລືອກຕັ້ງຂອງສະມາຊິກສະພາແຫ່ງຊາດ ມີໜ້າທັງໝົດ 163 ທ່ານ, ເຫັນດີ 161 ທ່ານ.

ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ເປັນນັກປະຕິວັດຄົນໜຶ່ງທີ່ຜ່ານຂະບວນການຝຶກຝົນຫຼໍ່ຫຼອມຈາກແປວໄຟປະຕິວັດ ກ່ອນຈະກ້າວສູ່ຂະບວນການສ້າງສາພັດທະນາປະເທດຊາດ ທ່ານເກີດເມື່ອວັນທີ 10 ພະຈິກ 1945 ເປັນຄົນພື້ນຖານແຂວງຫົວພັນ ແຕ່ໄດ້ໄປຮຽນຢູ່ໂຊວຽດ(ຣັດເຊຍໃນປະຈຸບັນ) ທັງຮຽນຢູ່ປະເທດຫວຽນາມ ປະຈຸບັນທ່ານສາມາດເວົ້າພາສາຕ່າງປະເທດໄດ້ ທັງພາສາຫວຽດນາມ, ຣັດເຊຍ ແລະອັງກິດໄດ້ຢ່າງຄ່ອງແຄ້ວ.

ເອີ້ນວ່າເປັນຜູ້ນຳທີ່ມີຜົນງານຫຼວງຫຼາຍໃນຂະບວນການສ້າງສາພັດທະນາປະເທດຊາດ ກ່ອນຈະມາເປັນປະທານປະເທດແຫ່ງ ສປປ ລາວ ເພິ່ນແມ່ນເຄີຍດຳລົງຕຳແໜ່ງເປັນລັດຖະມົນຕີ ກະຊວງແຮງງານ ແລະສະຫວັດດີການ-ສັງຄົມ, ລັດຖະມົນຕີກະຊວງການຕ່າງປະເທດ ເປັນນາຍົກລັດຖະມົນຕີແຫ່ງ ສປປ ລາວ ກ່ອນຈະໄດ້ຮັບການຄັດເລືອກໃຫ້ເປັນປະທານປະເທດຄົນທີ8 ໃນວັນທີ 22 ທີນາ 2021.