ໃຈກ້າເຫຼືອເກີນ ພຽງ 19 ປີຂີ່ລົດນຳໂຈນຈັບສົ່ງຕຳຫຼວດສຳເລັດ

ໃຈກ້າເຫຼືອເກີນ ພຽງ 19 ປີຂີ່ລົດນຳໂຈນຈັບສົ່ງຕຳຫຼວດສຳເລັດ

21st February 2022 0 By Education

ບັນຫາເລື່ອງຄົນຂີ້ລັກ ເກີດຂຶ້ນເປັນລາຍວັນ ສຳຄັນທຸກຄົນຕ້ອງມີສະຕິປ້ອງກັນຊັບສິນໂຕເອງ ບໍເຮັດລໍ້ຕາລໍ້ໃຈໂຈນ ເພາະການລັກຂອງໂຈນແມ່ນມີມາໃນຫຼາຍຮູບແບບ ເຮົາບໍ່ສາມາດຄາດເດົາໄດ້ ຍິ່ງຖ້າເປັນການເດີນທາງໂດດດ່ຽວຍິ່ງຕ້ອງບໍ່ຖືເງີນຄຳໄປນຳຫຼາຍ ທຸກວັນນີ້ມີໂຈນຢູ່ອ້ອມຮອບໃຜເປັນຄົນດີໃຜເປັນຄົນຮ້າຍຈຳແນກບໍ່ອອກແມ່ນແຕ່ຄົນເຄີຍຮູ້ຈັກກັນກໍ່ເຊັ່ນດຽວກັນ.

ເຊິ່ງມື້ນີ້ມີມີຂ່າວໂຈນດຶງກະເປົາມາຝາກ ຕາມຂໍ້ມູນຈາກເຈົ້າໜ້າທີ່ ປກສ ກຸ່ມ 1 ຈອມມະນີ ໃຫ້ຮູ້ວ່າ: ເວລາປະມານ 18:40 ໂມງ ຂອງວັນທີ 19 ກຸມພາ 2022 ໄດ້ມີຄົນຮ້າຍ ເພດຊາຍ 1 ຄົນ ຂັບຂີ່ລົດຈັກ ສະແມດ ສີດໍາແດງ ບໍ່ຕິດປ້າຍທະບຽນ ຍາດຊີງເອົາໂທລະສັບມືຖື ຂອງນາງ ອໍາໄພ ອາຍຸ 19 ປີ ນັກຮຽນ ຢູ່ບ້ານອາມອນ ເມືອງໄຊເສດຖາ ນະຄອນຫຼວງວຽງຈັນ, ຕໍ່ໜ້າໂຮງໝໍ 150 ຕຽງ ແລ້ວຂັບຂີ່ລົດຈັກຫຼົບໜີໄປທາງຂ້າງ ກົມໃຫຍ່ພະລາທິການກອງທັບ.

ນາງ ອໍາໄພ ຈິ່ງຂັບຂີ່ລົດຈັກໄລ່ນໍາຄົນຮ້າຍ ພໍຮອດ 3 ແຍກ ໜ້າອະນຸສອນສະຖານ ໄກສອນ ພົມວິຫານ ຈິ່ງຂັບຂີ່ລົດຈັກຕໍາລົດຈັກຄົນຮ້າຍ ແລ້ວລົ້ມລົງ ແລະ ຮ້ອງຂໍໃຫ້ຄົນມາຊ່ວຍເຫຼືອ ສາມາດຈັບໄດ້ ຊາບຊື່ພາຍຫຼັງຜູ້ກໍ່ເຫດຊີງຊັບ ແມ່ນ ທ້າວ ຈອນນີ ວ່າງງານ ຢູ່ບ້ານ ຈອມມະນີ ເມືອງໄຊເສດຖາ ນະຄອນຫຼວງວຽງຈັນ.

ຕໍ່ກັບຄະດີດັ່ງກ່າວ ເຈົ້າໜ້າທີ່ ປກສ ກຸ່ມ 1 ຈອມມະນີ ໄດ້ນໍາສົ່ງໃຫ້ກອງບັນຊາການ ປກສ ເມືອງໄຊເສດຖາ ດໍາເນີນຄະດີຕາມຂັ້ນຕອນກົດໝາຍ.

ນັບຖື ຄວາມກ້າຂອງຜູ້ເສຍຫາຍ ທັງເປັນຜູ້ຍິງ ແລະ ມີອາຍຸພຽງ 19 ປີ ທີ່ກ້າຕັດສິນໃຈຕຳທ້າຍລົດຄົນຮ້າຍ ເນື່ອງຈາກຊັບສິນຂອງໃຜກະຫວງ ເພາະກວ່າທີ່ຈະໄດ້ມາບໍ່ແມ່ນເລື່ອງງ່າຍ ແລະ ຍອມທີ່ຈະເສຍໄປງ່າຍໆໃຫ້ກັບຂີ້ເຫຍື່ອສັງຄົມ. ແຕ່ທຸກຄົນກໍ່ບໍ່ຄວນສ່ຽງ ແລະ ເຮັດຕາມເນື່ອງຈາກມີຄວາມສ່ຽງເຖິງຊີວິດໄດ້ ຖ້າບໍ່ເປັນຫຍັງກໍ່ຖືວ່າດີແຕ່ຖ້າພາດທ່າເສຍທີແມ່ນບໍ່ຄຸ້ມຄ່າກັບສິ່ງທີ່ເສຍໄປ.