ກອງຮ້ອຍຊາຍແດນ 153  ອົບຮົມ-ຫັດແອບສິລະປະຍຸດ, ຍຸດທະວິທີ

ກອງຮ້ອຍຊາຍແດນ 153 ອົບຮົມ-ຫັດແອບສິລະປະຍຸດ, ຍຸດທະວິທີ

15th March 2022 0 By Admin

ເພື່ອຍົກສູງຄວາມຮູ້ ຄວາມສາມາດ ໃຫ້ອ້າຍນ້ອງທະຫານ ມີສະຕິກຽມພ້ອມເຄື່ອນໄຫວສູ້ຮົບຕະຫຼອດ, ເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະ ໃຫ້ມີລະບຽບແບບແຜນວິທີເຮັດວຽກທີ່ທັນສະໄໝ ແລະ ເຂັ້ມງວດ. ດັ່ງນັ້ນ, ໃນເມື່ອບໍ່​ດົນ​ຜ່ານ​ມາ ທີ່ກອງຮ້ອຍຊາຍແດນ 153 ປະຈຳເມືອງຫົງສາ ແຂວງໄຊຍະບູລີ ໄດ້ເປີດພິທີອົບຮົມ-ຫັດແອບການທະຫານ, ການເມືອງ, ພະລາທິການ ແລະ ເຕັກນິກ ປະຈຳປີຂຶ້ນ ໂດຍໃຫ້ກຽດເຂົ້າຮ່ວມຂອງ ສະຫາຍ ພັທ ທອງໄຫຼ ເພັດດາວົງ ກໍາມະການປະຈໍາພັກເມືອງ ຫົວໜ້າກອງບັນຊາການປ້ອງກັນຄວາມສະຫງົບເມືອງ, ມີສະຫາຍ ຮອ ທະນົງສັກ ລັດຕະນະວົງ ຮອງເລຂາໜ່ວຍພັກ ຫົວໜ້າການທະຫານກອງຮ້ອຍຊາຍແດນ 153, ມີແຂກຖືກເຊີນຈາກກກົມກອງອ້ອມຂ້າງເຂົ້າຮ່ວມ.


ໃນພິທີຄັ້ງນີ້, ໄດ້ຮັບຟັງການຜ່ານຄຳແນະນຳ ຂອງຫ້ອງເສນາທິການທະຫານແຂວງ, ຮັບຟັງແຜນການອົບຮົມ-ຫັດແອບ ການທະຫານ, ການເມືອງ, ພະລາທິການ ແລະ ເຕັກນິກ ປະຈຳປີ 2022 ແລະ ຮັບຟັງເນື້ອໃນຂໍ້ແຂ່ງຂັນອົບຮົມປະຈຳປີ 2022 ຂອງກອງຮ້ອຍຊາຍແດນ 153 ຊຶ່ງ ສະຫາຍ ຮອ ທະນົງສັກ ລັດຕະນະວົງ ໄດ້​ລາຍ​ງານໃຫ້ຮູ້ວ່າ: ການອົບຮົມ-ຫັດແອບຄັ້ງນີ້, ຈະໄດ້ແບ່ງອອກເປັນ 2 ໄລຍະ ຄື: ໄລຍະທີ 1 ເລີ່ມແຕ່ເດືອນກຸມພາ ຫາ ເດືອນພຶດສະພາ, ໄລຍະທີ 2 ແຕ່ເດືອນກໍລະກົດ ຫາ ເດືອນ ຕຸລາ; ກໍານົດເວລາ 160 ວັນ. ໂດຍມີອ້າຍນ້ອງທະຫານເຂົ້າຮ່ວມທັງໝົດ 75 ສະຫາຍ ແລະ ຈະໄດ້ຮຽນຮູ້ກ່ຽວກັບເນື້ອໃນທິດສະດີ, ພາກປະຕິບັດຕົວຈິງໄປພ້ອມໆກັນ ເປັນຕົ້ນແມ່ນພາກຄວາມຮູ້ທົ່ວໄປ, ສິລະປະຍຸດ, ຍຸດທະວິທີ, ວຽກງານເສນາທິການ ແລະ ອື່ນໆ.


ໃນໂອກາດນີ້, ສະຫາຍ ພັທ ທອງໄຫຼ ເພັດດາວົງ ໄດ້ເນັ້ນໜັກ ໃຫ້ຄະນະຮັບຜິດຊອບ ຕະຫຼອດຮອດອ້າຍນ້ອງທະຫານທີ່ເຂົ້າຮ່ວມຝຶກອົບຮົມຄັ້ງນີ້, ຈົ່ງພ້ອມກັນຕັ້ງໜ້າເອົາໃຈໃສ່ປະຕິບັດໜ້າທີ່ຄວາມຮັບຜິດຊອບຂອງຕົນໃຫ້ສູງ, ເອົາໃຈໃສ່ຊີ້ນຳ, ຕິດຕາມ, ກວດກາ ແລະ ສະຫຼຸບຖອນຖອນບົດຮຽນເປັນແຕ່ລະໄລຍະ.

ຫຼັງຈາກນັ້ນ, ຄະນະປະທານ ແລະ ບັນດາແຂກທີ່ເຂົ້າຮ່ວມກໍໄດ້ຮັບຊົມການສະແດງຫັດກາຍບໍລິຫານ 2 ບົດ 24 ຈັ່ງຫວະ, ຫັດກາຍແທງກະບີ 4 ທິດ 28 ຈັ່ງຫວະ ແລະ ຝຶກແອບຊ້ອມມວຍ 38 ຈັ່ງຫວະ ຂອງເຫຼົ່າທະຫານຊາຍແດນຕື່ມອີກ.

ຂ່າວ-ພາບ: ກິດຕິສັກ ບົວໄລ