ເມືອງສາລະວັນ ຈັດເທສະການໝາກພ້າວນາໄຊ ຕິດພັນກັບບຸນໃຫຍ່ລະປຶບ ຊົນເຜົ່າກະຕາງ

ເມືອງສາລະວັນ ຈັດເທສະການໝາກພ້າວນາໄຊ ຕິດພັນກັບບຸນໃຫຍ່ລະປຶບ ຊົນເຜົ່າກະຕາງ

15th March 2022 0 By Admin

ວັນທີ 15 ມີນາ 2022 ນີ້, ຢູ່ບ້ານນາໄຊນ້ອຍ ເມືອງ ແລະ ແຂວງສາລະວັນ ໄດ້ຈັດເທສະກການໝາກພ້າວນາໄຊ ຕິດພັນກັບບຸນໃຫຍ່ລະປຶບ ຊົນເຜົ່າກະຕາງ ໂດຍມີ ທ່ານ ໂພໄຊ ໄຊຍະສອນ ເຈົ້າແຂວງສາລະວັນ, ທ່ານ ຈັນສີລອນ ສີສົມບູນ ເຈົ້າເມືອງສາລະວັນ ທັງເປັນປະທານຈັດງານ, ມີ ການນຳຂັ້ນແຂວງ, ອາດີດການນໍາຂອງແຂວງ, ການນໍາຂອງເມືອງ 8 ຕົວເມືອງ, ການນໍາຈາກເມືອງທ່າແຕ່ງ, ເມືອງລະມາມ ແຂວງເຊກອງ, ເມືອງບາຈຽງຈະເລີນສຸກ ແຂວງຈໍາປາສັກ ແລະ ພາກສ່ວນກ່ຽວຂ້ອງ ເຂົ້າຮ່ວມ.


ໃນພິທີ, ທ່ານ ຈັນສີລອນ ສີສົມບູນ ໄດ້ກ່າວເປີດງານຄັ້ງນີ້ວ່າ: ງານດັ່ງກ່າວແມ່ນການສຸມໃສ່ການຈັດຕັ້ງປະຕິບັດວາລະແຫ່ງຊາດ ໂດຍສະເພາະແມ່ນ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສົ່ງເສີມການຜະລິດ, ວາງສະແດງຕໍ່ຍອດຜະລິດຕະພັນ, ແປຮູບຈາກຜົນຜະລິດກະສິກຳ ໂດຍສະເພາະແມ່ນແປຮູບຈາກໝາກພ້າວ ຕິດພັນກັບການສ້າງບ້ານພັດທະນາ ຕາມທິດ 3 ສ້າງ, ເຮັດໃຫ້ຊົນນະບົດກາຍເປັນບ້ານໃຫຍ່ ຄ້າຍຄືຕົວເມືອງນ້ອຍ. ພ້ອມນີ້, ຍັງເປັນການຊຸກຍູ້ສົ່ງເສີມການປູກໝາກພ້າວ ແລະ ການຮັກສາຮີດຄອງປະເພນີອັນດີງາມຂອງຊົນເຜົ່າກະຕາງ ແລະ ເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມນັບມື້ນັບຫລາຍຂຶ້ນ, ສ້າງຜະລິດຕະພັນໝາກພ້າວ ກາຍເປັນສິນຄ້າ ສ້າງລາຍຮັບໃຫ້ປະຊາຊົນ ແລະ ເປັນການເປັນເຕົ້າໂຮມຄວາມສາມັກຄີຂອງປະຊາຊົນ ບັນດາເຜົ່າພາຍໃນແຂວງສາລະວັນ ແລະ ຕ່າງເມືອງ, ຕ່າງແຂວງ ນໍາອີກ.


ການຈັດງານຄັ້ງນີ້, ຍັງເປັນການຟື້ນຟູການແກ້ໄຂຄວາມຫຍຸ້ງຍາກທາງດ້ານເສດຖະກິດ, ຂຸດຄົ້ນທ່າແຮງບົ່ມຊ້ອນ ຂອງທ້ອງຖິ່ນທາງດ້ານການຜະລິດ, ການບໍລິການ, ການແປຮູບຜົນຜະລິດກະສິກຳ ໃຫ້ມີຄວາມຫລາກຫລາຍເຂົ້າສູ່ຕະຫລາດກວ້າງຂຶ້ນ, ທັງເປັນການສ້າງບັນຍາກາດດ້ານການທ່ອງທ່ຽວ, ມີຫລາຍກິດຈະກໍາຈັດຂຶ້ນ ເປັນຕົ້ນ ເປີດນຳໃຊ້ ຫໍກວນ, ປູກຕົ້ນພ້າວ, ປະກວດຮ້ອງເພງ, ໝໍລຳ, ສິລະປະພື້ນບ້ານ, ງານຕະຫລາດນັດຂາຍສິນຄ້າ ເຄື່ອງອຸປະໂພກ-ບໍລິໂພກ.

ການວາງສະແດງຜະລິດຕະພັນສິນຄ້າຂອງພະແນກການອ້ອມຂ້າງແຂວງ ແລະ ບັນດາເມືອງ, ລັດວິສາຫະກິດ ແລະ ຜູ້ປະກອບການ ແນໃສ່ເພື່ອຊຸກຍູ້ສົ່ງເສີມດ້ານການທ່ອງທ່ຽວ ການຊື້-ຂາຍ ແລກປ່ຽນສິນຄ້າພາຍໃນ ແລະ ມີກິດຈະກໍາການແຂ່ງຂັນກິລາມວນຊົນ, ກິລາທົ່ວໄປ ເຊັ່ນ: ແລ່ນກະໂປະໝາກພ້າວ, ແກ່ກ້ານພ້າວ, ຍິງໜ້າເກັກ, ແຂ່ງຂັນກິນໝາກພ້າວ, ອົມນ້ຳໝາກພ້າວ, ກິລາບານເຕະ-ບານສົ່ງ ແລະ ອື່ນໆ.


ຂ່າວ: ວິໄລວອນ, ພາບ: ກິນດາວັນ