ໜ້າຕາດີ ແຖມເປັນພະນັກງານ ແຕ່ລົງມືອົງອາດຍາດຊີງຄຳຈາກຄໍຄົນອື່ນ

ໜ້າຕາດີ ແຖມເປັນພະນັກງານ ແຕ່ລົງມືອົງອາດຍາດຊີງຄຳຈາກຄໍຄົນອື່ນ

19th March 2022 0 By Education

ເລື່ອງລາວໂດ່ງດັງໃນຊົ່ວພິບຕາພາຍຫຼັງຊາຍໜຸ່ມຜູ້ໜຶ່ງກໍ່ເຫດຊີງຊັບຢ່າງອົງອາດກາງເມືອງໃຫຍ່ ໜ້າສູນການຄ້າວຽງຈັນເຊັນເຕີ້ ທີ່ໜ້າເວດທະນາແຮງກວ່ານັ້ນຄື ຜູ້ຊາຍຄົນນັ້ນເປັນພະນັກງານ ແລະໜ້າຕາພໍເຂົ້າວັດເຂົ້າວາຢູ່ ບໍຮູ້ຫີວໂຫຍມາແຕ່ໃສຄືໃຈກ້າໜ້າທົນ ລົງມືຊີງຊັບບໍເກງໃຈລະບຽບກົດໝາຍບ້ານເມືອງ.

ເລື່ອງລາວທີ່ຖືກເຜີຍແຜ່ຈາກສື່ສັງຄົມອອນລາຍເຟັສບຸກ ມີເຫດການຍາດຊີງຊັບ ຂອງພົນລະເມືອງ ເກີດຂື້ນໃນເວລາ 15 ໂມງ ຂອງວັນທີ 18 ມີນາ 2022 ຢູ່ທີ່ຖະໜົນຄູວຽງ ໜ້າສູນການຄ້າວຽງຈັນເຊັນເຕີ ໃນຄະນະກຳລັງຍ່າງຂ້າມທາງ ມີຄົນຮ້າຍຂັບຂີ່ລົດຈັກຍີ່ຫຍໍ້ຊູຊູກີ ສີຂາວ ຄັນໝາຍເລກ ຍມ 6188 ສວນທາງມາແລ້ວຍາດດຶງສາຍຄຳຂອງນາງ ນໍວ່າງຍົງປໍ ປະຊາຊົນ ບ້ານສີລາເລກ ເມືອງເງິນ ແຂວງຫຼວງພະບາງ ພາຍຫຼັງເກີດເຫດ ພົນລະເມືອງດີຫຼາຍຄົນເຂົ້າສະກັດກັ້ນຈັບກຸມຜູ້ກະທຳຜິດເຊີ່ງໜ້າ ນຳສົ່ງເຈົ້າໜ້າທີ່ ປກສ ເມືອງສີສັດຕະນາກ ດຳເນີນຄະດີຕາມກົດໝາຍ.

ຕາມການລາຍງານຂອງ ພັທ ອິນປັນ ຫາດາວເຮືອງ ຮອງຫົວໜ້າກອງບັນຊາການ ປກສ ເມືອງສີສັດຕະນາກ ບອກວ່າ: ພາຍຫຼັງພົນລະເມືອງດີນຳສົ່ງມອບຕົວຜູ້ຖືກຫາ ກໍໄດ້ທຳການສືບສວນ-ສອບສວນເບື້ອງຕົ້ນ ຊາບຊື່ທ້າວ ພະນົມພອນ ອາຍຸ 30 ປີ ອາຊີບພະນັກງານ ບ້ານໂພນສະຫວາດ ເມືອງສີໂຄດຕະບອງ ນວ.

ເຊີ່ງຜູ້ກ່ຽວໃຫ້ການວ່າ ໃນມື້ເກີດເຫດເວລາ 15:00 ໂມງ ຂອງວັນທີ 18 ມີນາ 2022 ທ້າວ ພະນົມພອນ ກໍໄດ້ຂັບຂີ່ອອກຈາກບ້ານ ເລາະໄປຕາມຖະໜົນ ພໍຮອດໜ້າສູນການຄ້າວຽງຈັນເຊັນເຕີ ພົບເຫັນ ເປົ້າໝາຍ ກຳລັງຍ່າງຂ້າມທາງ ຈິ່ງໄດ້ລົງມືຍາດຊິງດຶງສາຍຄໍ ແລະ ຈະເອົາຕົວຫລົບໜີ ໄດ້ມີພົນລະເມືອງດີ ຈຳນວນຫຼາຍຄົນເຂົ້າສະກັດກັ້ນຈັບຕົວ ທ້າວ ພະນົມພອນ ສົ່ງຕົວໃຫ້ ກອງບັນຊາການ ປກສ ເມືອງສີສັດຕະນາກ ດຳເນີນຄະດີຕາມກົດໝາຍ.

ຜ່ານການສືບສວນ-ສອບສວນ ກອ່ນໜ້ານີ້ ໃນ ເດືອນ ມີນາ 2022 ເຄີຍເຄື່ອນໄຫວຍາດຊີງຊັບຜູ້ຍີງນັ່ງຂາຍໝາກເບັງແຄມທາງ ເຂດບ້ານຫອມ ໃຕ້ ເມືອງຫາດຊາຍຟອງ ໄດ້ສາຍຄຳ 1 ບາດ.


ກອງບັນຊາການ ປກສ ນະຄອນຫຼວງວຽງຈັນ ຂໍສະແດງຄວາມຍ້ອງຍໍຊົມເຊີຍ ຕໍ່ການຕັດສິນໃຈໃຫ້ຄວາມຊ່ວຍເຫຼືອຜູ້ເຄາະຮ້າຍ ແລະ ການເຂົ້າສະກັດກັ້ນຈັບກຸ່ມຜູ້ກະທຳຜິດ ດ້ວຍຄວາມກ້າຫານ ບໍ່ສະທ້ານຢ້ານກວາຕໍ່ເຫດການທີ່ເກີດຂື້ນ ດ້ວຍຄວາມເສຍສະຫລະ ປະກອສ່ວນເຂົ້າໃນວຽກຮັກສາຄວາມສະຫງົບ ຄວາມບໍ່ເປັນຮຽບຮ້ອຍ ຂອງພົນລະເມືອງ ຈິ່ງຮຽກຮ້ອງມາຍັງພົນລະເມືອງທຸກຊັ້ນຄົນ ຈົ່ງປະຕິບັດ ສິດ ແລະ ພັນ ຂອງຕົນມີສ່ວນຮ່ວມ ຖ້າພົບເຫັນເຫດການທີ່ຜິດກົດໝາຍ ແລະ ລະບຽບການ ຂໍໃຫ້ແຈ້ງມາທີ່ເບີ 020 28899774 ຫຼື ເຟັສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.