ການກູ້ໄພ ຖ້ຽວບິນລຳເກີດເຫດຂອງຈີນຍັງຕ້ອງດຳເນີນຕໍ່ຈົນກວ່າຈະພົບກ່ອງດຳຄົບ

ການກູ້ໄພ ຖ້ຽວບິນລຳເກີດເຫດຂອງຈີນຍັງຕ້ອງດຳເນີນຕໍ່ຈົນກວ່າຈະພົບກ່ອງດຳຄົບ

25th March 2022 0 By Education

ການກູ້ໄພ ເຮືອບິນໂດຍສານທີ່ເກີດອຸບັດຕິເຫດຕົກລົງພ້ອມຜູ້ໂດຍສານ 100 ກວ່າຄົນທີ່ ເກີດຂຶ້ນເມື່ອວັນທີ 21 ມານາຜ່ານມາ ຮອດມື້ນີ້ ເຈົ້າໜ້າທີ່ກູ້ໄພຍັງໜ້າທີ່ຂອງຕົນຢ່າງຕໍ່ເນື່ອງຈົນກວ່າຈະບັນລຸເປົ້າໝາຍ ຄືກ່ອງດຳໜ່ວຍທີສອງ, ສ່ວນໜ່ວຍທີ1 ຄາດວ່າຈະໃຊ້ເວລາອີກ 10 ກວ່າວັນຈິ່ງສາມາດຖອດລະຫັດ ແລະໄດ້ເນື້ອໃນໃຈຄວາມທີ່ບັນທຶກໄວ້.

ຕາມຂ່າວລາຍງານຜູ້ຊ່ຽວຊານແຈ້ງໃຫ້ຮູ້ວ່າ: ການຖອດລະຫັດກັບດຳເຮືອບິນລຳເກີດເຫດຕ້ອງໃຊ້ເວລາ 10 ຫາ 15 ວັນ
ປັດຈຸບັນ, ໜ່ວຍງານກູ້ໄພ ກຳລັງດຳເນີນການຊອກຄົ້ນຫາກັບບັນທຶກຂໍ້ມູນການບິນ ຫຼືກັບດຳໜ່ວຍທີ 2 ຢູ່ຕາມສະຖານທີ່ເກີດເຫດເຮືອບິນຕົກຂອງບໍລິສັດການບິນ CHINA EASTERN . ແຕ່ຢູ່ສະຖານທີ່ເກີດເຫດໄດ້ມີຝົນຕົກ ເຊິ່ງອາດຈະເຮັດໃຫ້ດິນນ້ຳຝັງສິ່ງຂອງທີ່ສຳຄັນ ແລະເຮັດໃຫ້ການກູ້ໄພປະສົບຄວາມຫຍຸ້ງຍາກຫຼາຍຂຶ້ນ.


ສ່ວນກັບບັນທຶກຂໍ້ມູນສຽງ ຫຼືກັບດຳໜ່ວຍໜຶ່ງທີ່ຖືກຄົ້ນພົບເຫັນແລ້ວ, ຜູ້ຊ່ຽວຊານກ່າວວ່າ: ຕ້ອງຜ່ານການຖອດເອົາ, ແປລະຫັດ ແລະວິເຄາະຂໍ້ມູນ, ຈຶ່ງສາມາດອອກບົດລາຍງານໄດ້ ໂດຍຕ້ອງນຳໃຊ້ເວລາປະມານ 10 ຫາ 15 ວັນ ຈຶ່ງສາມາດໄດ້ຮັບຜົນການວິເຄາະເບື້ອງຕົ້ນ. ແຕ່ຖ້າຢາກໄດ້ຜົນສະຫຼຸບສຸດທ້າຍ ຍັງຕ້ອງໃຊ້ເວລາດົນກວ່ານີ້.

ເຮືອບິນໂດຍສານລຳທີ່ເກີດເຫດຂອງບໍລິສັດ CHINA EASTERN ຖ້ຽວບິນ MU5735 ໄດ້ບິນອອກຈາກນະຄອນຄຸນມິງໃນເວລາ 13:16 ໂມງ ຂອງວັນທີ 21 ມີນານີ້, ຮອດເວລາ 14:17 ໂມງ ໄດ້ບິນໄປເຖິງເຂດອາກາດທີ່ຄຸ້ມຄອງໂດຍນະຄອນກວາງໂຈ່ວໃນ ລະດັບຄວາມສູງ 8.900 ແມັດ. ເວລາ 14:20 ໂມງ, ພະນັກງານຄວບຄຸມການຈະລາ ຈອນທາງອາກາດໄດ້ພົບລະດັບຄວາມສູງການບິນຂອງເຮືອບິນລຳນີ້ຕົກຕ່ຳລົງຢ່າງວ່ອງໄວ ແລະກະທັນຫັນ ຈຶ່ງໄດ້ໃຊ້ສັນຍານເອີ້ນຈຸບິນຫຼາຍເທື່ອທັນທີ, ແຕ່ກໍບໍ່ໄດ້ຮັບສັນຍານຕອບ ຈັກເທື່ອ.

ຮອດເວລາ 14:23 ໂມງ, ເຮືອບິນລຳນີ້ໄດ້ສູນຫາຍໄປຈາກລະບົບຣາດາ. ຈາກນັ້ນໄດ້ກວດສອບແລະຢືນຢັນວ່າ, ເຮືອບິນລຳດັ່ງກ່າວໄດ້ເກີດເຫດຕົກຢູ່ບໍລິເວນເມືອງ ເຖິງຊ້ຽນ ນະຄອນອູໂຈ່ວ ເຂດປົກຄອງຕົນເອງເຜົ່າຈ້ວງກວາງຊີ. ຫຼັງເກີດເຫດເຈົ້າໜ້າທີ່ກູ້ໄພຈາກຫຼາຍພາກສ່ວນໄດ້ຮີບຮ້ອນໄປຍັງຈຸດເກີດເຫດ ແຕ່ມາຈົນຮອດມື້ນີ້ຍັງບໍ່ພົບຮ່ອງຮອຍຜູ້ໂດຍສານເລີຍ ນອກຈາກຊິ້ນສ່ວນຍົນທີ່ແຕກກະແຈກກະຈາຍ ແລະກ່ອງດຳ1 ກ່ອງເທົ່ານັ້ນ.