ການແພດຫວຽດນາມດີ! ຫຼັງມີຜູ້ຕິດເຊື້ອໂຄວິດ-19 ປິ່ນປົວຫາຍດີແລ້ວ 16ຄົນ

ການແພດຫວຽດນາມດີ! ຫຼັງມີຜູ້ຕິດເຊື້ອໂຄວິດ-19 ປິ່ນປົວຫາຍດີແລ້ວ 16ຄົນ

11th March 2020 0 By Education

ນັບວ່າເປັນຂ່າວດີອີກຢ່າງໜຶ່ງທີ່ເກີດຂຶ້ນທ່າມກາງສະພາບການລະບາດຂອງໂຄວິດ-19 ອັນໂຫດຮ້າຍ ແລະ ຮຸນແຮງຢູ່ຫຼາຍປະເທດໃນທົ່ວໂລກ ນັ້ນກໍ່ຄື ຫວຽດນາມສາມາດຮັກສາຜູ້ຕິດເຊື້ອດັ່ງກ່າວຫາຍດີແລ້ວ 16ຄົນ ເຖິງແມ່ນວ່າຈະມີຜູ້ປ່ວຍເພີ່ມຂຶ້ນນັບມື້ກໍ່ຕາມ ແຕ່ນີ້ຖືເປັນັສນຍານທີ່ດີອັນສ້າງກໍາລັງໃຈໃຫ້ແພດໝໍຜູ້ປິ່ນປົວຄົນໄຂ້ໄດ້.

ຕາມແຫຼ່ງຂ່າວຈາກ VOVWORLD ໃຫ້ຮູ້ວ່າ: ຫວຽດນາມມີກຳລັງຄວາມສາມາດ ແລະ ປະສົບການພຽງພໍເພື່ອຄວບຄຸມໂລກລະບາດ, ລະບົບວິທະຍາສາດ-ເຕັກໂນໂລຊີ, ຖັນແຖວແພດໝໍເກັ່ງ, ມີໂຮງໝໍລົງເລິກສະເພາະຂະແໜງ ເຊິ່ງໄດ້ປິ່ນປົວຜູ້ທີ່ຕິດ Covid – 19 ຈຳນວນ 16 ຄົນຫາຍດີເປັນປົກກະຕິ ແລະ ອອກໂຮງໝໍເປັນທີ່ຮຽບຮ້ອຍແລ້ວ.

ຫວຽດນາມໃນໄລຍະທີ່ຜ່ານມາມີຜູ້ຕິດພະຍາດອັກເສບປອດສາຍພານໃໝ່ ແຕ່ຍັງບໍ່ມີຜູ້ໃດເສຍຊີວິດ. ນີ້ແມ່ນເນື້ອໃນປະກາດສະຫຼຸບຂອງ ທ່ານນາຍົກລັດຖະມົນຕີ ຫງວຽນຊວັນຟຸກ ຢູ່ກອງປະຊຸມຄະນະປະຈຳລັດຖະບານກ່ຽວກັບການສະກັດກັ້ນ, ຕ້ານໂລກລະບາດ Covid – 19.

ຄະນະປະຈຳລັດຖະບານໄດ້ເຫັນດີເປັນເອກະພາບກັບບົດລາຍງານຂອງຄະນະຊີ້ນຳການສະກັດກັ້ນ, ຕ້ານໂລກລະບາດ Covid -19 ແຫ່ງຊາດ, ຫວຽດນາມໄດ້ກະກຽມຮັບມືເປັນຢ່າງດີ ເພື່ອບໍ່ໃຫ້ຕົກຢູ່ໃນທ່າຮັບໃນການຄວບຄຸມສະພາບການ.

ປັດຈຸບັນ, ຫວຽດນາມ ໄດ້ຮັບເອົາ ຜູ້ຕິດເຊື້ອ Covid – 19 ໃໝ່ຕື່ມອີກ 18 ຄົນ. ຕໍ່ໜ້າການຜັນແປຢ່າງສັບສົນຂອງສະພາບໂລກລະບາດ, ທ່ານນາຍົກລັດຖະມົນຕີໄດ້ຮຽກຮ້ອງໃຫ້ບັນດາກະຊວງ, ຂະແໜງການ, ທ້ອງຖິ່ນ: ປະກາດຂໍ້ມູນຂ່າວສານທີ່ກ່ຽວຂ້ອງເຖິງໂລກລະບາດ Covid – 19 ຕ້ອງຮັບປະກັນໃຫ້ທັນການ, ຄົບຖ້ວນ, ເປີດເຜີຍ, ໂປ່ງໃສ, ຊອກຫາຜູ້ເປັນແຫຼ່ງລະບາດໃຫ້ໄວທີ່ສຸດ ແລະ ບັນດາຜູ້ທີ່ສຳຜັດກໍ່ຕ້ອງໄດ້ ແຍກຕົວຢູ່ຕ່າງຫາກ.

ພ້ອມກັນນັ້ນ, ຕ້ອງຮັບປະກັນການສະໜອງບັນດາປະເພດສິນຄ້າບໍລິໂພກໃຫ້ພຽງພໍເພື່ອຕອບສະໜອງຄວາມຕ້ອງການຂອງປະຊາຊົນ.

ນອກນີ້ທ່ານນາຍົກລັດຖະມົນຕີກໍ່ເຫັນດີໃຫ້ໂຈະຊົ່ວຄາວຕໍ່ການຍົກເວັ້ນ ວີຊາ ແຕ່ຝ່າຍດຽວກັບ 8 ປະເທດຄື: ແດນມາກ, ນອກແວ, ແຟງລັງ, ຊູແອັດ, ອັງກິດ, ຝລັ່ງ, ເຢຍລະມັນ, ແອັດສະປາຍ ແລະ ໂຈະຊົ່ວຄາວກ່ຽວກັບຜົນສັກສິດຂອງ ວີຊາທີ່ອອກໃຫ້ຊາວຫວຽດນາມທີ່ພວມອາໄສຢູ່ຕ່າງປະເທດ ແລະ ຊາວຕ່າງປະເທດທີ່ເປັນ ເມຍ, ຜົວ, ລູກ ຂອງຊາວຫວຽດນາມທີ່ອາໄສຢູ່ 8 ປະເທດດັ່ງກ່າວ.