ທະຫານແກ່ນສານຂອງພັກ ຍາມໃດກໍ່ຕ້ອງກຽມພ້ອມຮັບໃຊ້ຊາດບ້ານເມືອງ

ທະຫານແກ່ນສານຂອງພັກ ຍາມໃດກໍ່ຕ້ອງກຽມພ້ອມຮັບໃຊ້ຊາດບ້ານເມືອງ

4th April 2022 0 By Education

ທະຫານເປັນກຳລັງສຳຄັນຂອງຊາດ ເປັນຫຼັກຮົ້ວທີ່ໝັ້ນແກ່ນເປັນທີ່ເພິ່ງພາຂອງປະເທດຊາດ ເມື່ອປະຊາຊົນຕ້ອງການ ສະນັ້ນບໍ່ວ່າໃນຍາມສົງຄາມ ຫຼື ສັນຕິພາບ ທະຫານຕ້ອງຮຽນຮູ້ວິຊາສະເພາະຂອງຕົນໃນການສູ້ຮົບຕີຕ້ານສັດຕູ.

ໂຮງຮຽນທະຫານທ້ອງຖີ່ນແຂວງບໍ່ແກ້ວໃນລະຫວ່າງວັນທີ 31 ກັນຍາ 2021 – 1 ເມສາ 2022,  ໄດ້ສຳເລັດບັ້ນຝຶກອົບຮົມ-ຫັດແອບການເຄື່ອນທັບຊ້ອມຮົບ ຂອງນັກຮຽນທະຫານໃໝ່ ຊຸດທີ 29 ສົກຮຽນ 2021-2022. ເປັນກຽດເຂົ້າຮ່ວມເຄືອນທັບຂອງ ສະຫາຍ ພັນໂທ ສຸບິນ ສີຍາລາດ ຄະນະບໍລິຫານງານພັກກອງບັນຊາການ ຮອງຫົວໜ້າຫ້ອງເສນາທິການ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາໂຮງຮຽນ, ພະແນກການກ່ຽວຂ້ອງ, ພະນັກງານ ຄູ-ອາຈານ ຕະຫຼອດຮອດ ນັກຮຽນເຂົ້າຮ່ວມ.


ໃນການເຄື່ອນທັບຊ້ອມຮົບຕົວຈິງຄະນະຮັບຜິດຊອບ ໄດ້ສະຫຼຸບຕີລາຄາຄືນຜ່ານການອົບຮົມ-ຫັດແອບ ເຄື່ອນທັບພາກສະໜາມ ແລະ ການຍິ່ງລູກປືນແທ້ ຕະຫຼອດໄລຍະ 02 ວັນ, ມີນັກຮຽນເຂົ້າຮ່ວມຫັດແອບຈຳນວນທັງໝົດ 149 ສະຫາຍ, ຍິງ 8 ສະຫາຍ, ໂດຍປະຕິບັດຕາມແຜນການຮຽນ-ການສອນ ກໍຄືເນື້ອໃນຫັດແອບສັງລວມຂັ້ນໝູ່ເຊິ່ງປະກອບມີ: ອາແລັກປ່າວເຫດອອກຈາກກົມກອງເຂົ້າຫາເຂດເຕົ້າໂຮມປິດລັບ, ໝູ່ທະຫານລາບພົບທົ່ງແປ້ນ, ໝູ່ທະຫານລາບພົບເສັ້ນທາງ 3 ແຍກ, ໝູ່ທະຫານລາບພົບບ້ານປະຊາຊົນ ແລະ ໝູ່ທະຫານລາບພັກທັບຊົ່ວຄາວ.

ຜ່ານການປະຕິບັດຕົວຈິງເຫັນວ່າ: ນັກຮຽນມີຄວາມຮັບຜິດຊອບສູງໃນການຊີ້ນຳ-ບັນຊາຕາມພາລະບົດບາດຂອງຕົນ ແລະ ຖືກຕ້ອງຕາມແຜນການເນື້ອໃນການອົບຮົມ-ຫັດແອບທີ່ກຳນົດໄວ້, ຮັກສາໄດ້ດ້ານກຳລັງ ແລະ ຈຳນວນພົນ, ປະຕິບັດບັນດາຂໍ້ກຳນົດ, ກົດລະບຽບຂອງການຫັດແອບໄດ້ດີ, ທຸກສະຫາຍມີຄວາມອົດທົນຜ່ານຜ່າຕໍ່ກັບສະພາບສິ່ງແວດລ້ອມດິນຟ້າອາກາດ, ພູມມີປະເທດອັນສະຫຼັບຊອບຊ້ອນ, ເຖິງວ່າຈະພົບອຸປະສັກຕະຫຼອດການຫັດແອບ ແຕ່ກໍຍັງຮັກສາໄດ້ຄວາມສາມັກຄີພາຍໃນ ແລະ ກຳໄດ້ບົດຮຽນທາງພາກທິດສະດີຫຼັກການ ສາມາດນຳມາໝູນໃຊ້ເຂົ້າໃນພາກປະຕິບັດຕົວຈິງໄດ້ເປັນຢ່າງດີ, ພ້ອມທັງຮັກສາໄດ້ຄວາມປອດໄພໄດ້ 100% ຕີລາຄາຜົນໄດ້ຮັບຂອງບັ້ນເຄື່ອນທັບຊ້ອມຮົບໃນຄັ້ງນີ້ ບັນລຸໄດ້ 100% ຂອງແຜນການອົບຮົມ-ຫັດແອບການເຄືອນທັບຊ້ອມຮົບ.

ຕອນເຊົ້າຂອງວັນທີ 1 ເມສາ 2022 ແມ່ນໄດ້ສືບຕໍ່ຈັດຕັ້ງປະຕິບັດຍິງລູກປືນແທ້, ຢູ່ທີ່ ສະໜາມຍິ່ງປືນຂອງໂຮງຮຽນທະຫານທ້ອງຖິ່ນແຂວງບໍ່ແກ້ວ ປະຈໍາປີ 2021-2022 ໃຫ້ທະຫານໃໝ່ຊຸດທີ 29. ເພື່ອເຮັດໃຫ້ການຍິ່ງລູກປືນແທ້ໃນຄັ້ງນີ້ ໄດ້ຮັບປະສິດທິພາບສູງ ຄະນະຊີ້ນຳ ແລະ ຄູ-ອາຈານຕ້ອງເອົາໃຈໃສ່ເນັ້ນໜັກໃຫ້ນັກຮຽນແຕ່ລະສະຫາຍ ຈົ່ງຍົກສູງຄວາມຮັບຜິດຊອບຂອງຕົນ ເພື່ອດັບສູນເປົ້າໝາຍໃຫ້ໄດ້ຕາມຄາດ ໝາຍທີ່ວາງໄວ້, ຊິ່ງສາມາດສະຫຼຸບຕີລາຄາຜົນໄດ້ຮັບຕົວຈິງ ຂັ້ນເກັ່ງ 110 ສະຫາຍ ເທົ່າກັບ 73,8%, ຂັ້ນກາງ 20 ສະຫາຍ ເທົ່າກັບ 13,4%, ຄາດໝາຍ 16 ສະຫາຍ ເທົ່າກັບ 10,7 %.

ຈາກການປະຕິບັດຍິ່ງລູກປືນແທ້ໃນຄັ້ງນີ້ ກໍ່ເພື່ອເຮັດໃຫ້ ພະນັກງານ-ນັກຮົບ, ນາຍ ແລະ ພົນທະຫານ ມີຄວາມຊຳນິຊຳນານ ໃນການດັບສູນເປົ້າໝາຍ ແລະ ໜູນໃຊ້ເຂົ້າໃນວຽກງານຕົວຈິງໃຫ້ມີຄຸນນະພາບ ແລະ ສາມາດຮັບມືກັບສະພາບການໄດ້ທັນເວລາ ເອົາໃຈໃສ່ປະຕິບັດຂໍ້ກຳນົດກົດລະບຽບ ພາກສະໜາມໄດ້ຢ່າງເຂັ້ມງວດ ສາມາດຮັບປະກັນຄວາມປອດໄພໄດ້ 100%, ທັງນີ້ ກໍ່ເພື່ອເປັນການປະຕິບັດແຜນການອົບຮົມ-ຫັດແອບ ພາກທິດສະດີ ການປະຕິບັດຕົວຈິງ ແລະ ເປັນການເສີມຂະຫຍາຍກຳລັງແຮງ, ຄວາມຮູ້ຄວາມສາມາດໃຫ້ພະນັກງານ-ນັກຮົບທົ່ວໂຮງຮຽນ ໃຫ້ຮັບຮູ້ທ່າຈັ່ງຫວະ ແລະ ວິທີນຳໃຊ້ອາວຸດຍຸດໂທປະກອນຂອງກອງທັບໃຫ້ມີຄວາມຊຳນິຊຳນານ ຂື້ນຢ່າງບໍ່ຢຸດຢັ້ງ.