ພາຊົມ ລົດໄຟ EMU ຂະບວນທີ 3​ ມາພ້ອມກັບຕູ້ບັນຈຸຜູ້ໂດຍສານຊັ້ນທຸລະກິດ ຫຼື Business Class ບ່ອນນັ່ງກວ້າງຂຶ້ນ, ຕັ່ງປັບໄດ້ຫຼາຍລະດັບ ມາຮອດນະຄອນຫຼວງວຽງຈັນແລ້ວ

ພາຊົມ ລົດໄຟ EMU ຂະບວນທີ 3​ ມາພ້ອມກັບຕູ້ບັນຈຸຜູ້ໂດຍສານຊັ້ນທຸລະກິດ ຫຼື Business Class ບ່ອນນັ່ງກວ້າງຂຶ້ນ, ຕັ່ງປັບໄດ້ຫຼາຍລະດັບ ມາຮອດນະຄອນຫຼວງວຽງຈັນແລ້ວ

10th April 2022 0 By Admin

ຕາມຂ່າວ ຊີອາໄອ ລາຍງານວ່າ: ຕອນຄໍ່າວັນທີ 9 ເມສາ 2022  ລົດໄຟຂະບວນລ້ານຊ້າງ (EMU) ຄັນໃໝ່ຫຼ້າສຸດ ຫຼືຂະບວນທີ 3 ໄດ້ມາຮອດສະຖານີວຽງຈັນ ພ້ອມກັບຕູ້ບັນຈຸຜູ້ໂດຍສານຊັ້ນທຸລະກິດ ຫຼື Business class ສຸດຫຼູ ແລະ ຊັ້ນ 1 ຫຼືFirst class.

ຕາມການລາຍງານໃຫ້ຮູ້ວ່າ: ລົດໄຟຂະບວນທີ 3 ແມ່ນລົດໄຟ EMU ຂະບວນລ້ານຊ້າງ ທີ່ໄດ້ຮັບການປັບປຸງພາຍໃນຕູ້ໃຫ້ເປັນຕູ້ Business class ສຸດຫຼູຈໍານວນ 1 ຕູ້ແລະ ຊັ້ນ 1 ຫຼື First class ຈໍານວນ 7 ຕູ້ ເຊິ່ງເປັນລົດໄຟທີ່ໃໝ່ຫຼ້າສຸດຂອງລົດໄຟລາວ-ຈີນ. ພາຍຫຼັງການປັບປຸງ ແລະຕິດຕັ້ງຢູ່ຈີນແລ້ວ, ລົດໄຟຂະບວນນີ້ໄດ້ເດີນທາງຈາກນະຄອນຄຸນໝິງມານະຄອນຫຼວງວຽງຈັນຕັ້ງແຕ່ວັນທີ 6 ເມສາ.


ລົດໄຟຂະບວນດັ່ງກ່າວໄດ້ປັບປຸງໃຫ້ຊັ້ນທຸລະກິດຢູ່ຕູ້ທີ 8, ສ່ວນຕູ້ທີ 1-7 ແມ່ນບ່ອນນັ່ງຊັ້ນ 1. ຕັ່ງນັ່ງຕູ້ຊັ້ນທຸລະກິດລົດໄຟລາວ-ຈີນແມ່ນນຳໃຊ້ຕັ່ງນັ່ງແບບດຽວກັນກັບຕູ້ຊັ້ນທຸລະກິດຂອງລົດໄຟຂະບວນ ຟູ້ຊິງ CR400AF ຢູ່ສປ ຈີນ ເຊິ່ງປັບບ່ອນນັ່ງຕູ້ຂອງຊັ້ນ 1 ຈາກ 56 ບ່ອນນັ່ງມາເປັນ 18 ບ່ອນນັ່ງ, ໃນນັ້ນບ່ອນນັ່ງຄູ່ 6 ຊຸດ ແລະບ່ອນນັ່ງດ່ຽວ 6 ຊຸດ ເຊິ່ງຕັ່ງນັ່ງສາມາດປັບລະດັບຕ່າງໆ ຕາມທີ່ຮ່າງກາຍຕ້ອງການຢ່າງສະດວກສະບາຍ ພ້ອມທັງໝຸນໄດ້ 180 ອົງສາຕາມທິດທາງລົດເດີນ.


ສໍາລັບການຊື້ປີ້ ສາມາດຊື້ໄດ້ທີ່ສະຖານີລົດໄຟລາວ-ຈີນທີ່ໄດ້ເປີດບໍລິການ ຫຼືຈຸດຂາຍປີໄດ້, ເຊິ່ງຂະບວນລົດໄຟໃໝ່ນີ້ຈະເລີ່ມບໍລິການໃນວັນທີ 12 ເມສານີ້ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມນັບມື້ນັບຫຼາຍຂຶ້ນ. ສໍາລັບລາຄາຕູ້ Business class ຂໍ້ມູນເບື້ອງຕົ້ນແຈ້ງວ່າ ລາຄາຈາກວຽງຈັນ-ບໍ່ເຕັນແມ່ນ 990.000 ກີບ/ຄົນ, ວຽງຈັນ-ຫຼວງພະບາງ 585.000 ກີບ/ຄົນ, ວຽງຈັນ-ວັງວຽງ ແມ່ນ 302.000 ກີບ/ຄົນ ແລະວຽງຈັນ-ສະຖານີອື່ນໆ ລາຄາແມ່ນຈະແຕກຕ່າງກັນ.


ໃນຂະນະດຽວກັນນັ້ນ, ລົດໄຟຂະບວນທໍາມະດາທີ່ລາຄາສຸດຄຸ້ມ ກໍໄດ້ມາຮອດສະຖານີວຽງຈັນໃນຫວ່າງບໍດົນນີ້ ແລະຈະເລີ່ມໃຫ້ບໍລິການໃນວັນທີ 13 ເມສາເຊັ່ນກັນ ເພື່ອຕ້ອນຮັບປີໃໝ່ລາວນໍາອີກ. ສໍາລັບລາຄາລົດໄຟຂະບວນທໍາມະດານີ້ແມ່ນຢູ່ໃນລາຄາທີ່ແຈ້ງໄປໃນໄລຍະຜ່ານມາ.