ປະແຕ່ງຕັ້ງ ທ່ານ ສົມກຽດ ພະສີ ຈາກຫົວໜ້າກົມປະຊາສຳພັນ ເປັນຮອງລັດຖະມົນຕີ, ຮອງຫົວໜ້າ ຫສນຍ

ປະແຕ່ງຕັ້ງ ທ່ານ ສົມກຽດ ພະສີ ຈາກຫົວໜ້າກົມປະຊາສຳພັນ ເປັນຮອງລັດຖະມົນຕີ, ຮອງຫົວໜ້າ ຫສນຍ

11th April 2022 0 By Admin

ກອງປະຊຸມສະຫລຸບວຽກງານ ປະຈຳໄຕມາດ 1 ແລະ ຈຸດສຸມໄຕມາດ 2 ປະຈໍາປີ 2022; ການເຜີຍແຜ່ຂໍ້ຕົກລົງ ວ່າດ້ວຍລະບຽບການ ແລະ ກົນໄກການເຮັດວຽກ ຂອງຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ແລະ ປະກາດການຈັດຕັ້ງ ພະນັກງານນໍາພາ-ຄຸ້ມຄອງ ຂອງ ຫສນຍ ໄດ້ຈັດຂຶ້ນ ໃນວັນທີ 8 ເມສາ 2022 ໂດຍການໃຫ້ກຽດເຂົ້າຮ່ວມໂອ້ລົມ ຂອງທ່ານ ພັນຄໍາ ວິພາວັນ ນາຍົກລັດຖະມົນຕີ; ມີທ່ານ ອາລຸນໄຊ ສູນນະລາດ ລັດຖະມົນຕີ, ພ້ອມດ້ວຍ ພະນັກງານ-ລັດຖະກອນ ທົ່ວ ຫສນຍ ເຂົ້າຮ່ວມ.


ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການເຜີຍແຜ່ ຂໍ້ຕົກລົງ ເລກທີ 546 ວ່າດ້ວຍລະບຽບການ ແລະ ກົນໄກການເຮັດວຽກຂອງ ຫສນຍ ເພື່ອກຳນົດຫລັກການ, ກົນ ໄກ, ວິທີການ, ລະບອບການພົວພັນ ແລະ ຄວາມຮັບຜິດ ຊອບ ຕໍ່ໜ້າທີ່ຕົ້ນຕໍຈໍານວນໜຶ່ງ ພາຍໃນ ຫສນຍ ແນໃສ່ເຮັດໃຫ້ການປະຕິບັດພາລະບົດບາດ ຂອງຕົນ ໂດຍສະ ເພາະ ການເປັນເສນາທິການດ້ານເນື້ອໃນ, ການປະສານງານ ແລະ ບໍລິການຮັບໃຊ້ ໃຫ້ແກ່ລັດຖະບານ,​ ນາຍົກລັດຖະມົນຕີ ແລະ ບັນດາຮອງນາຍົກລັດຖະມົນຕີ ມີຄວາມວ່ອງໄວ, ໂປ່ງໃສ, ທັນການ, ມີປະສິດທິພາບ ແລະ ປະສິດທິຜົນ. ຈາກນັ້ນ, ຍັງໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານ ຂອງ ຫສນຍ ປະຈຳໄຕມາດ 1 ແລະ ທິດທາງແຜນການ ຄາດມາດໄຕມາດ 2 ຂອງປີ 2022 ເຊິ່ງເຫັນວ່າ ມີຜົນສໍາເລັດໃນຫລາຍດ້ານ, ຄຽງຄູ່ກັນນັ້ນ ກໍຍັງມີຂໍ້ຄົງຄ້າງຈຳນວນໜຶ່ງ ທີ່ຍັງຕ້ອງໄດ້ພ້ອມກັບສືບຕໍ່ປັບປຸງແກ້ໄຂ ໃຫ້ສຳເລັດ ຕາມແຜນການທີ່ວາງໄວ້.


ໂອກາດດຽວກັນນີ້, ກໍໄດ້ປະກາດການຈັດຕັ້ງ ພະນັກງານນໍາພາ-ຄຸ້ມຄອງຂອງ ຫສນຍ ເພື່ອສືບຕໍ່ປັບປຸງກົງຈັກການຈັດຕັ້ງ ພາຍໃນໃຫ້ມີຄວາມເຂັ້ມແຂງ, ຄ່ອງຕົວ, ຮັບ ປະກັນລັກສະນະສືບທອດ, ປ່ຽນແທນ, ແທດເໝາະກັບສະພາບຄວາມເປັນຈິງ ແລະ ສອດຄ່ອງກັບຄວາມຮຽກ ຮ້ອງຕ້ອງການ ຂອງວຽກງານ ກໍຄືການຈັດຕັ້ງປະຕິບັດ ພາລະບົດບາດ, ສິດ, ໜ້າທີ່ ຕາມໂຄງປະກອບກົງຈັກການຈັດຕັ້ງ ຫສນຍ ໃຫ້ມີປະສິດທິພາບ ແລະ ປະສິດທິຜົນ ສູງຂຶ້ນເລື້ອຍໆ. ໃນພິທີ, ຜູ້ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ຄື: ແຕ່ງຕັ້ງ ທ່ານ ສົມກຽດ ພະສີ ເປັນຮອງລັດຖະມົນຕີ, ຮອງຫົວໜ້າ ຫສນຍ; ທ່ານ ສະຖິດ ເພັດສິງເລືອງ ເປັນຫົວໜ້າກົມປະ ຊາສຳພັນ; ທ່ານ ຈັນທະພອນ ແກ້ວມາລາວົງ ເປັນຫົວໜ້າກົມບໍລິຫານ, ພິທີການ ແລະ ການເງິນ; ທ່ານ ຄົມສັນ ໄຊຍະສານ ເປັນຫົວໜ້າກົມນິຕິກຳ; ທ່ານ ວິແກ້ວ ບຸບຜາວັນ ເປັນຫົວໜ້າກົມກວດກາ; ທ່ານ ເຂິງຄຳ ແກ້ວໜູຈັນ ເປັນຫົວໜ້າກົມຄົ້ນຄວ້າ-ສັງລວມ; ທ່ານ ນາງ ບຸນໜັກ ດາລາງາແກ້ວ ເປັນຫົວໜ້າກົມຈັດຕັ້ງ ແລະ ພະນັກງານ; ທ່ານ ວັນນະລາດ ໃຈຍາວົງ ເປັນຫົວໜ້າກົມເລຂາ.


ພ້ອມນັ້ນ ຍັງອະນຸມັດພະນັກງານ ອອກພັກການ ຮັບອຸດໜູນບຳນານ; ຂໍ້ຕົກລົງ ຂອງນາຍົກລັດຖະມົນຕີ ແຕ່ງ ຕັ້ງຜູ້ຊ່ວຍວຽກທ່ານລັດຖະມົນຕີ, ຫົວໜ້າ ຫສນຍ. ພ້ອມດຽວກັນນີ້, ທ່ານຫົວໜ້າກົມຈັດຕັ້ງ ແລະ ພະນັກງານ ຫສ ນຍ ໄດ້ຂຶ້ນຜ່ານຂໍ້ຕົກລົງ ຂອງລັດຖະມົນຕີ, ຫົວໜ້າ ຫສ ນຍ ຄື: ແບ່ງຄວາມຮັບຜິດຊອບ ຂອງບັນດາທ່ານ ຜູ້ ຊ່ວຍວຽກທ່ານລັດຖະມົນຕີ, ຫົວໜ້າ ຫສນຍ; ແຕ່ງຕັ້ງຮອງຫົວໜ້າກົມ ຈຳນວນ 1 ທ່ານ; ຮັບເອົາພະນັກງານ ຈາກກະຊວງແຜນການ ແລະ ການລົງທຶນ ຈຳນວນ 2 ທ່ານ; ອະນຸມັດ ໃຫ້ພະນັກງານ ຫສນຍ ໄປປະຈຳການ ຢູ່ກະຊວງອື່ນ ຈຳນວນ 2 ທ່ານ.

 

ຂ່າວ-ພາບ: ກົມປະຊາສຳພັນ ຫສນຍ